¹ Nalonza, n'oku ntyo, mumenye kanga entambala eli ndarhi n'oku yilwa enyanya wenyu, n'enyanya wa balala bali Laodikiya, n'oku ngasi boshi barhasagi bona emalanga gani bw'omubiri, ² ahanyuma nji babe n'omurhima guyunjwire bonjo, balungane bwenene omu buzigire, n'oku yunjula obugale bw'obwenge omu kumenya ehwe lya Nyamuzinda, bamenye Kristu, ³ ehwe libishirwe mw'obugale bw'obushinganyanya n'okumenya. ⁴ Nderhere ebyo mpu nta muntu njo barhebekage n'emyazi y'oku baheza. ⁵ Bulala, chiro nakaba ntaliho oku mubiri, ndi haguma nenyu omu muka, mubone haguma n'obushagaluke okubona muyorhere bwinja buzira kavulindi, n'okulanga obwemere bwenyu omu Kristu. ⁶ Nantyo, kulala mwa yemeraga Nahano Yesu-Kristu, mulame omu yewe, ⁷ munamenyere kw'emizi n'oku jirwa omu yewe, oku simikir'oku buyemere, kugerera enyigirizo mwa habwaga, n'oku yorha mwa jira ebijiro by'olukogo. ⁸ Mu manye hankajira omuntu w'oku bajira baja n'efilozofiya n'oku bwenge bw'oku rhebekana, buyemerere emigenzo y'abantu, oku bilemwa by'egulu,n'okurhaba oku Kristu. ⁹ Bulala omu yewe muba mulamire obushinganyanya boshi bw'omu Nyamuzinda, buba omu mubiri. ¹⁰ Nenyu muherhe byoshi omu yewe, yeli mukulu wa byoshi birhambula n'obukulu boshi. ¹¹ N'omu yewe mu mwakembulwaga buzira fune, aliko ku kembulwa kwa Kristu, kuba omu kuhogola omubiri gw'echaha : ¹² Mwa bishirwe haguma naye omu shinda kugerera obu batizo, kandi mwa fukire haguma naye omu shinda, oku bwemere bw'obuhashe bwa Nyamuzinda, wamufulaga omu mifu. ¹³ Mwe mwali mufire enyanya w'ebyaha byenyu n'oku rhakembulwa kw'emibiri yenyu, ashubiri baha akalamo haguma naye, arhubabalira ebyaha byerhu byoshi; ¹⁴ azimya echijiro ch'emyazi yalirhusidakire n'oku rhuchira olubanja, n'oku lushandula omu kuchiheba oku musalaba; ¹⁵ anyeg'amami n'obuhashe boshi, n'oku bihana buzira shoni emalangambere g'abantu boshi, n'oku bahima enyanya w'omusalaba. ¹⁶ Ler'omuntu arha chibachiraga olubanja oku biribwa n'oku nywebwa, chang'oku bilolere olusiku lukulu, oku yasha kw'omwezi, changw'e Sabato : ¹⁷ Ebyo byoshi biri chifuniko ch'ebinji byayinja, alik'omubiri guli omu Kristu. ¹⁸ Nta muntu, omu bwirhohye bwage na kugerera oku kuza bamalayika, nji baba nyegage oluhembo lw'oku libira kwenyu, n'okuleka ebilorho byage n'oku chiyunjuza obuchibone enyanya w'enkengero z'omubiri, ¹⁹ buzira kuchiheba oku mukulu, olala omubiri goshi, gurhabalwa n'oku chishwekera haguma kugerera enungo n'emisi, kwanalerha okukula nk'oku Nyamuzinda ahanaga. ²⁰ Akaba mwafire haguma na Kristu oku bilemwa by'e gulu, chichi nka muchiba mulamire omu gulu, mwayemezwa emiziro : ²¹ Omanye wankarhola ! Omanye wanka nywakwo ! Omanye wanka humakwo ! ²² Bino byoshi bya lemerwaga okuheza, n'okujirwa kugerer'amarhegeko n'ezo nyigirizo z'abantu ? ²³ Bagwerhe, okuli n'okubonekana nka bwirhonzi, omu biyerekene obukuze bw'okuchihana, oku chiyandagaza, n'oku babaza omubiri, aliko nta kamaro na nta shololo y'oku hima kw'omubiri.