¹ Paulo, ntumwa ya Yesu Kristu oku bulonza bwa Nyamuzinda, na mwenewerhu Timoteyo, ² oku bacheswe na bene berhu bemezi omu Kristu bali e Kolosayi; olukogo n'omurhula mu bihabwe kugerera Namahanga Darha ! ³ Rhukuzize Nyamuzinda, Darha wa Nahano werhu Yesu Kristu, na buzir'okuleka okubahunira, ⁴ bula rhwayunvirhe obuyemere bwenyu omu Yesu Kristu n'obuzigire oku bala boshi bachere; ⁵ aliko oku munihiro muba mulangalire e bikwirire omu mpingu, n'oku mwazi gw'okuli, omwazi gw'obuholo mwabaga mwa menyere. ⁶ Guli ahagarhi kenyu, n'omw'igulu lyoshi; gwayanire emburho, gwana kula, kuguma na kulala nenyu, kurhenga lula lusiku mwanyunvaga n'okumenya olukogo lwa Nyamuzinda nk'oku kunali. ⁷ Kugerera enyigirizo mwa habwaga n'Epafrasi, murhabazi werhu muzigirwa omu kasi, na murhumisi okwanene omu kasi ka Kristu. ⁸ N'olala wa rhumenyisaga obuzigire Muka ana bakolesa . ⁹ Cho chirhumire nerhu, kurhenga lula lusiku rhwabwirwaga ogw'omwazi, rhurhalekaga oku bahunira Nyamuzinda n'oku muhema abayunjuze oku menya obulonza bwage, omu bushinganyanya n'omu bwenge bwa Muka ochere; ¹⁰ Na ntyo mulambagire oku kwanene omu Nahano n'oku musimisa omu byoshi, muburhe amalehe omu ngasi bijiro binja n'oku yushuka omu kumenya Namahanga ¹¹ Muchizibuhye omu byoshi kugerera emisi y'obuhashe bwage, omu ngasi lugero mubeho n'okuba n'obushagaluke n'okulembera ; ¹² muna kuze Darha, ola wabajiraga muyemere okuhabwa oku bintu bya bashinganyanya omu bulangashane, ¹³ Ye warhuchungulaga omu buja bw'omwizimya n'oku rhulerha omu bwami bw'omugala w'obusime, ¹⁴ warhuchungulaga, arhukulira ebyaha. ¹⁵ Y'eshusho lya Nyamuzinda orhabonekana, y'e fula omu bilemwa byoshi. ¹⁶ Bulala omu yewe byalemerwe byoshi e biri empingu n'okw'igulu, ebiboneka n'ebirhaboneka, entebe, obushinganyanya, obuhashe, obukulu. Byoshi ye wabilemaga n'oku bilemerwa. ¹⁷ N'embere bibeho byoshi, na byoshi byaliri omu yewe. ¹⁸ Kandi yewe y'erhwe ly'omubiri, Eshengero; yewe gw'omurhondero, ye na fula omu bafire, na ntyo ye murhanzi muli boshi. ¹⁹ Bulala Nyamuzinda alonzez'oku muhiram'obwimana bwoshi; ²⁰ naye alonzeze okugalula ebintu byoshi omu bwira bwage, ebiri oku gulu n'ebiri omu mpingu, alerha omurhula, kugerera eshagama yage oku musalaba. ²¹ Nenyu, mwe mwaliri bigolo mira na bashombanyi kugerera enkengero n'ebijiro byenyu bibi, lero bunola ashubiri bajira bera bage. ²² Kugerera olufu lwage omu mubiri gw'omugala, mpu mubonekane emalangambere gage mwe bachesibwa, beru-kweru na buzira shembu; ²³ chaziga musere bwenene n'oku chihangana omu buyemere, buzira kuleka obunihire bw'omwazi gw'obuholo gulala mwayunvirhe, gwa yigirizwaga oku ngasi chilemwa chiba omu gulu, nani Paulo, najirirwe mukozi wayo. ²⁴ Bunola nsimire omu burhindibuke bwani enyanya wenyu, n'echimbulire oku burhindibuke bwa Kristu, na bimala oku mubiri gwani, enyanya w'omubiri gwage, y'Eshengero. ²⁵ Kugerera Eshengero najirirwe mukozi, oku kasi Nyamuzinda ampaga emalangambere genyu, mpu nyeneze omwazi gwa Nyamuzinda, ²⁶ Ehwe libishirwe kurhenga emyaka n'emyaka oku bantu boshi ba mira, aliko likala limenyikene na bachesibwa bage. ²⁷ Nde Nyamuzinda alonzaga ayereke kwali munyarenge omu bugale bw'ehwe omu barhayemerere, oku menya: Kristu ali omu mwabo, ye bulangalire bw'erenge. ²⁸ Oyola yi rhuderha, omu kuhanula ngasi muntu, n'oku yigiriza ngasi muntu n'obushinganyanya boshi, mpu rhuyereke Nyamuzinda ngasi muntu, abe mwimana omu Kristu. ²⁹ Echo chi nkola, omu kulwa haguma n'emisi, ekola bwenene omu nyono.