¹ Ou se Pol yóm smulat ebélê ye ni, yóm sotu tau gel tóbóng lówó Krays Jisas. Deng nélék Dwata ou, ne deng tnabahen o mò gel hógówen mit yóm Tulón Hyu lemwót gu béléen. ² Deng tehe eles fasad Dwata snéen teganay nim Tulón Hyu ni hlanen bè yó kem tehe gna tugoden, hol lómón yóm deng snulat le bè Sulat Dwata. ³ Yó hol lemen nim Tulón Hyu ni, duhen yóm Ngaen, Jisas Krays. Tulónen yóm tehe le kehebalingen tau semfu gu bè yóm tehe Dabid. ⁴ Bud tulónen snéen yóm hol tahu keDwatahen. Yó gónó Dwata hegefan du yóm kengaen du, duhen yóm bud kehlowilen du bè yóm tehe katayen, hlanen bè yóm tey kegbeken. ⁵ Mlan bè yóm Ngaen yó, wen tey hyu hmò Dwata dou, duhen yóm gel khógówen dou elem blóng yó kem tau là Ju le anì hol megdóyón Krays. Nitu yóm Tulón Hyu lem blóng le anì gbót nimón le Jisas se kul lemwót bè yóm kehtahu le béléen. ⁶ Gomong ye snéen kuy, yu kem tau menwu bè syudad Rom. Deng tnaba Dwata yu anì baling ye hol kun tau Jisas Krays. ⁷ Ne duhen yó, smulate ebélê ye, yu kem kun kenbong nawa Dwata bè Rom. Deng tnabahen yu mò hol kun tau. Yó hem Dwata, yóm Mà tekuy, ne Jisas Krays yóm gónó tekuy mogot, hol tendo tmóbóng kuy ne tendo henek nawa ye. ⁸ Ni tanay monu mò kuy, tey kedóyónu ke Dwata bè yóm kdê ye bè yó, hlanu bè Jisas Krays, abay se deng gefet bè klamangen benwu yóm kuy kehtahu bè Jisas. ⁹ Tódô tngón Dwata là kóen skó yóm tendo gel knihu bélê ye. Nim Dwata monu ni, du se yóm Dwata hol gónóhu hmotu nawahu mit yóm Tulón Hyu gbak ebè yóm Ngaen. ¹⁰ Yó hol hnihu bè Dwata anì wen lanu hol mauy kuy ke lemwót bè kun kóyô, abay se deng tey kegenu ne tendo móló mógów edyó. ¹¹ Tey kóyóu tô hol ston kuy anì wen lanu temgel kuy anì lemnok ye bè kehtahu ye. ¹² Yó kóyóu ke hol tekuy segduf bè yóm kehtahu tekuy. ¹³ Là klifót ye du kô, kem dumuhu setwoli, deng hilu duléku ne móló mógów edyó bélê ye, okóm wen gel hemseng dou. Móyóe ke tmoloke lem blóng ye anì wen bélê ye hemtahu snéen, lómón yóm kul kehtahu yó kem dumu tau là Ju le tehe gónóhu gel tmolok. ¹⁴ Là gbeku du ke là tulónu du ebè kdéen tau yóm Tulón Hyu gel nwitu. Kihu ke tau temngón duhen ke tau laen dù tngónen, ke tau mnagì duhen ke tau là mnagien. ¹⁵ Yó gónóm mon, tey tô ódódu tmolok yóm Tulón Hyu bélê ye snéen yu kem tau menwu bè Rom ¹⁶ Nim Tulón Hyu gel nwitu ni, laen kô bang gónóhu myak heglalag du. Kaem bè yó se gónón gfan yóm kfasang Dwata lemwà kdéen tau gu lem hatay ke hemtahu le bè Jisas, lemwót bè yó kem tau Ju kkólen bè yó kem tau là Ju le. ¹⁷ Ne bud bè yó kem Tulón Hyu yó gónó Dwata hegfan du bélê tekuy yóm gónón baling tedeng ktonen kut mlan bè kehtahu tekuy. Lómón yóm deng monen bè Sulat Dwata, yóm monen, “Ke deng tedeng kton Dwata du yóm tau lemwót bè kehtahuhen, du se yóm tau gmuta du yóm klowil laen dù sónen.” ¹⁸ Hegfan Dwata gu bè longit yom keheliboen kut yó kem tau kat gel mò sidek. Yóm sidek nmò le yó, yó se gónón gseng ebélê le yóm ktahuhen lemwót gu bè Dwata. ¹⁹ Angat tey ktafak Dwata kul yó kem tau yó lemwót bè yóm là kehmóyô le du yóm deng hetngon Dwata bélê le. ²⁰ Lemwót bè yóm tehe kedlimon Dwata tonok efet nim kmoen ni, deng eles wen ne lan tau dmili du yóm Dwata, balù yóm là kton le du lem uyóhen. Yó gónó le gmileb du, duhen bè yó se kem deng dlimunen. Bè yó gónó le mton du yóm tey kegbek laen kô dù hol sónen, ne yóm hol keDwatahen. Yó gónóm mon, laen kô dù lasun tau ke là tengin le ke Dwata. ²¹ Deng tngón le se yóm kwen Dwata, okóm là nadat le du ne là kô dog dóyón le du bè yóm gel któbóngen kul. Yó bunguhen yóm nmò le yó, tódô kmifu lem hendem le laen kô dù nefeten. ²² Ofo kul ke hulung le hedem, okóm là. Lu se yó kem tau nungel. ²³ Là kô dog hentahu le du yóm Dwata laen dù son katayen. Deng mom yó hentahu le yóm dwata kéng kul lenbù nmò. Wen heskél le bè tau, igoen se matay yóm tau. Wen se heskél le bè onuk koyu, wen se bè ógóf, wen se bè ulal. ²⁴ Yó gónóm mon, tódô bayà Dwata lu. Là bud hensengen du balù kihu sidek kul knóyô lówó, ne nmò le bè kem dumu le yóm nmò kat kenyak. ²⁵ Deng kenbê le yóm ktahuhen lemwót gu bè Dwata, mom hentahu le yóm kéng. Ne deng le mom tmaba ebè yóm kun deng dlimun Dwata, ne demsù le ebélê le. Là dog hentahu le du yó dum Dwata fen dmimon yóm kdien, igoen du he hol knóón ke là hotoken yóm kdóyón tekuy du. ²⁶ Bè yóm kekbê le ke Dwata, yó gónó Dwata tódô mayà kul ebè yó kem knóyô lówó kat hemyak kul. Balù yó kem libun, deng mom heswì le yóm hol tahu klanen bè kesyehen tau. Deng mom yó nmò le, ssamuk hono libun. ²⁷ Lómón yó se nmò kem dumu logi, deng tódô kenbê le yóm tahu klanen bè kesyehen. Deng mom yó henlom nawa le yó kem kul dumu logi, ne nmò le yóm nmò kat kenyak. Yó uléken yóm nmò le yó, tódô gnóm le bè lówó le yóm ktafak Dwata kul. ²⁸ Lemwót bè yóm kekbê le yóm ktahuhen gbak ebè Dwata, yó gónó Dwata tódô mayà kul. Yó gónóm mon, hono là hyuhen yóm kehedem le. Ne baling le tódô galak du yó kem nmò là hyuhen yó. ²⁹ Tódô kdéen klasi sidek gotu no lem hendem le. Kat le móyô hemsidek kem dumu le tau. Kóyô le ke són lu gónón e skok yóm kdéen. Tey dê sidek nmò le. Mahil le mófô. Són nawa monok nô bélê le. Sónmò le mit sfatay bè kem dumu le. Tey le hulung smukat. Sónmò le gel sutó nawa. Tey lemnek ksumóng le, ³⁰ ne tey gel sidek kestulón le kem dumu le. Tey knutó nawa le Dwata, ne tódô gel nfà le kem dumu le. Tey kehton le salù. Hono kem tau heklabak. Sónmò le matul kmò le sidek. Sotuhen, là dog nimón le yó kem tuha le. ³¹ Laen dù afas nawa le. Là gsaligem kul. Laen dù keslayuk nawa le bè kem dumu le tau, ne laen se dù keskodu le. ³² Deng hónô tngón le yóm monen bè hlau Dwata ke wen tau mò du yó kem sidek yó, sal gel tódô hnatay. Okóm là kô dog hdon le du. Tódô henlel le mò du, lel le semgduf kem dumu le mò sidek.