¹ Ominu tódô bud mton yóm Ngà Ubiha, kóhen yóm tanay dket bè yó kem hitu dket bè yóm sulat lenulun. Ne sen‑gengen se mudél yóm sotu bè yó kem fat mtulus, bede lómón ke lemték kmò kudélen, monen, “Géhéli edini ne.” ² Tahu se. Wen kudà bukay tonu, ne wen tau smakay tahen kmulóng boho. Wen kuruna blay le du, ne ominen yó tódô lemwót mit sfatay bè yó kem hohonen, bede laen kô dù gmò le béléen. ³ Timbow deng lemwót yóm sotuhen yó koni, omin yóm Ngà Ubiha mkó du yóm gewuhen dket bè yóm sulat lenulun. Ne sen‑gengen se mudél yóm gewuhen bè yó kem fat mtulus, monen, “Géhéli edini ne.” ⁴ Ne tahu se, tódô tonu se yóm kudà hulô hsut. Ne wen kfasang blay le yóm tau smakay tahen mò na a mit sgida ebè klamangen benwu anì na le e stibó yó kem tau. Ne wen tey sudeng tahà blay le du. ⁵ Timbow bud lemwót yóm tau smakay kudà hulô yó koni, omin yóm Ngà Ubiha mkó du yóm getluhen dket bè yóm sulat lenulun. Ne sen‑gengen se mudél yóm getluhen bè yó kem fat mtulus, monen, “Géhéli edini ne.” Ne tahu se, tódô tonu se yóm kudà hitem hsut, mogot timbang yóm tau smakay tahen. ⁶ Ne bud wen udél gungolu gu bè yó kem fat mtulus, mon le, “Yóm sukéy sendaw, tek sotu semun msó. Ke hulékem bè msó sibù, tek tlu semunen. Okóm béem hensidek yóm koyu ulib ne yóm hulu boluyen grép.” ⁷ Timbow bud monol yóm yó koni, bud kó yóm Ngà Ubiha yóm gfaten dket bè yóm sulat lenulun. Ne sen‑gengen se mudél yóm gfaten bè yó kem fat mtulus, monen, “Géhéli edini ne.” ⁸ Ne tahu se, tódô tonu se yóm kudà malù bulow mélél. Yó boluy yóm tau smakay tahen, Hatay. Ne wen tau eles huli du boluyen Hidis. b Benlay le lu kwalis hmatay tau, botong gbut tau bè klamangen benwu gbek hnatay le. Yó kmò keglà le kul, hlan le bè gida, ne bè bitil bong, ne bè kem des, ne bè yó kem ógóf lóbô lem bnes. ⁹ Timbow bud monol yóm yó koni, omin yóm Ngà Ubiha mkó yóm glimuhen dket bè yóm sulat lenulun. Tódô tonu laan yóm gónó le gel demsù ebè Dwata lóyóf yó kem tau tehe matay bnonok lan le tehe gel mit yóm Udél Dwata, ne lan le gel tmulón du yóm ktahuhen gbak ebè Jisas Krays. ¹⁰ Hgel le udél le, mon le, “Ó Dwata, yóm gónó me mogot, laen kô dù là gbekem du. Uu se yóm laen dù belenen ne laen kô dù kéngen. Kegenen de duen yóm kkukumem yó kem tau te tonok ne yóm ktafakem kul bè yóm tehe kbonok le kum?” ¹¹ Ominen wen semket bemlay kul nes bukay. Ne monen mò kul, “Na ye na bud hlun hegnô he. Na ye hangat yóm katay yó kem dumu tóbóng lówóhu, hol lómón se yóm kuy.” ¹² Timbow deng yóm yó, tódô tonu yóm Ngà Ubiha, bud kóhen yóm gnemen dket bè yóm sulat lenulun. Tódô sen‑gengen se mbel te tonok yóm tey linol bong. Tódô baling hitem yóm mata kdaw, hol lómón khitemen yóm nes alì hitem. Ne yóm bulón, hol lómó khulóen litô. ¹³ Ne yó kem blotik, tódô le btang ete tonok lómón ke bungu koyu tbó bè lenos bong. ¹⁴ Ne tódô lana yóm longit, hol lómón yóm sulat lenulun. Ne tódô le gotu lana bè sana kul gónó gel nô yó kem bulul ne yó kem hungul te mohin, là kô bud tonem kul ne. ¹⁵ Yóm kdéen tau te tonok, tódô le gotu tô hebnos lem yó kem kilib ne lem blóng yó kem botu lembang ditu lem bulul, kdéen tau hol geta, ne kdéen tau wen glalen, ne kdéen geta bè yó kem sendalù, ne yó kem tau kwasa, ne yó kem tau wen kfasang le, ne kdéen dumu tau, tau hesek ne tau là heseken, gotu le tô hebnos. ¹⁶ Tmaba le ebè yó kem bulul ne yó kem botu lembang, mon le, “Hugón ye kum eta me dé, bnos ye mi anì là ton matahen kum yóm Hol Geta myón bè yóm gónón kmamal, ne bè yóm tey ksidek kebut yóm Ngà Ubiha. ¹⁷ Abay se deng hto ne yóm kul kdaw tmafak, ne laen kô dù tau gewà gu lemen.”