¹ Ne tódô tonu se yóm sulat lenulun nkem yóm myón bè yóm gónón myón kmamal, kemen du sigel kwananen. Wen snulat le tahen ne lemen, ne wen hitu dketen. ² Ne wen sotu hógów Dwata alì kemgis tonu mdà bè yó, ne hgelen udélen, monen, “Tau du de knóón bang mkó du yóm dketen nim sulat lenulun nii, ne yóm knóón bang mból du?” ³ Okóm laen dù bang ton le bè longit duhen te tonok, duhen ke bè yóm benwu laan tonok ke wen knóón bang mból du duhen ke temngel elemen yóm sulat lenulun yó. ⁴ Botonge mkik, abay se laen dù ton le knóón mból du duhen ke temngel elem yóm sulat lenulun. ⁵ Okóm wen sotu bè yó kem tau tuha mudél ebéléu, monen mò do, “Béi mom mkikem dé. Ngem wen yóm bnoluy le Liyun, yóm semfu gu bè yóm tehe Juda. Bud du se yóm hol tótól tehe semfu gu bè Dabid. Deng matù bè yó kem hmohon du, yó gónón gembek mkó du yó kem hitu dket yóm sulat lenulun yóó, ne gbeken se mból du.” ⁶ Ominu yó mton yóm Ngà Ubiha mdà bè solu yóm myón bè yóm gónón myón kmamal, ne lem blóng yó kem fat mtulus, ne lem blóng yó kem tau tuha. Okóm bè yóm ktonu du, hol lómón ke deng wen tehe hmatay du. Wen hitu hangahen ne hitu se matahen. Yóm hitu yó, hnigaden yóm hitu kay kfasang yóm Tulus Dwata deng hógówen ebè klamang benwu. ⁷ Ne lemwót yóm Ngà Ubiha yó koni, tódô nwahen yóm sulat lenulun nogot sigel kwananen yóm myón bè gónón myón kmamal. ⁸ Timbow deng nwahen, tódô lemwót yó kem fat mtulus ne yó kem lewu folò fat tau tuha, gotu le hegluduk bè soluhen. Sket kul mogot heglung ne tukung blówón. Yó kem tukung blówón yó, tódô henok lemen yóm alì minggel boohen boluyen insinsu, yóm gel ntem le ebè Dwata. Yóm gel hboo le ebè Dwata yó, yó hnigaden yóm gel kni yó kem kun tau Dwata. ⁹ Ne semngal le yóm lomi sngal, monen, “Són u se yóm knóón bang ma du yóm sulat lenulun ne mkó yó kem dketen, yakà uu du yóm deng tehe hnatay le. Lemwót bè yóm litô namaem yó, yó gónón wen tau benlihem mò kun tau nfun Dwata. Yó kem tau benlihem yó, tódô lemwót bè ket but tau, ne bè ket udél tau, ne bè ket but tau. ¹⁰ Deng nmoem lu kem tau mò nogot Dwata, kem tau mò blóng kem dumu le tau ebè Dwata. Lu se yó kem tau angat mogot benwu te tonok.” ¹¹ Bud nkayu bè yó ketngelu, ne tódô gungolu se yóm tey sngal yó kem tey hógów Dwata balù hilu kati kwen le. Mdà le hilol yóm kun gónó myón yóm fen kmamal, ne hilol yó kem fat mtulus, ne yó kem tau tuha. ¹² Ya tey kesngal le, mon le, “Nim Ngà Ubiha ni, deng tehe hnatay le. Tey knóón du yóm kfasangen ne yóm kwen kendengenen, ne yóm ketngónen ne yóm kekgisen. Ne knóón du ke hol sensadat tekuy, ne ke hol hegeta tekuy, ne ke hol sendóyón tekuy.” ¹³ Ne tódô gungolu se yóm sngal yóm kentihen nô bè longit ne kentihen nô te tonok, ne kentihen nô laan tonok, ne kentihen nô lem mohin, tódô le gotu semngal, mon le, “Megdóyón yóm myón bè yóm gónón kmamal. Megdóyón snéen yóm Ngà Ubiha. Tey knóón ke laen dù tul sónen yóm kesdóyón tekuy kul ne yóm kadat tekuy kul lemwót bè yóm tey kegeta le ne yóm tey kfasang le.” ¹⁴ Mudél se yó kem fat mtulus mdà bè yó, mon le, “Tey tahu se.” Ne lemwót se kul yó kem lewu folò fat tau tuha, gotu le bud hegdungul, ya tey kdóyón le ke Dwata ne yóm Ngà Ubiha.