¹ “Budi smulat do ebè yóm fen gel malak yó kem tau hemtahu bè Sardis, monem mò du, ni udélen ebélê ye yóm gónón hol nô yóm Tulus Dwata hitu kay kfasangen, yóm mogot yó kem hitu blotik.” Yó monen, “Deng gotu tngónu se yóm gel nmò ye. Bè kuy kehedem du deng ye tótól bè kehtahu ye, okóm là he, tolo ye golu elem hatay. ² Géhél ye hetngón dé. Eles hbegel ye yóm dù ngà sufà yóm kehtahu ye gu laanen là deng gotu lana. Abay se là deng tonu du he yóm kuy kgulit bè solu Dwata. ³ Hol bud nulék ye yóm deng tehe gna gungol ye bè yóm tehe tolok le kuy ne hol hentahu ye. Hol nimón ye dé, ne hol knogol ye yó kem salà ye. Ke là hetngón ye, tódô kentutu yu lómón ksut yóm tau mnagaw, là kô tngón ye du yóm kdaw ksutu. ⁴ Okóm tolo wen se bélê ye bè yó bè Sardis, là dengen nusing yóm kuy nes. Angat ye mung do ne wen nes ye bukay, abay se yó se yóm hol knóón bélê ye. ⁵ Yó kem tau gel matù bè yó kem sidek gel sut, angat benlayu lu nes bukay, ne là kô kóhu du yóm kul boluy bè yóm bok lowil. a Ne bè yó bè solu Mà ne yó kem gel hógówen gu bè longit gónóhu tmulón du yóm deng kfunu kul. ⁶ Duhen yó, yóm tau wen klinguhen, hol hnungolen dé yóm tulón yóm Tulus Dwata bè yó kem tau bè ket simbahan.” ⁷ “Budi smulat do ebè yóm fen gel malak yó kem tau hemtahu bè Filadélfya, monem mò du, ni se udélen ebélê ye yóm laen dù belenen yóm kun kmò, yóm hono tahu yóm gel tulónen. Du se tles mogot du yóm kunsì tehe nogot yóm tehe fuen Dabid. Ke wen lenungkaen, là kô wen gembek bud tmikeb du. Ne ke wen tnikeben, là kô wen gembek bud lemungkà du.” ⁸ Yó monen, “Deng gotu tngónu se yóm gel nmò ye. Tngónu snéen yóm klaen hol genbek ye. Ewenem yó, sana klolò ye yóm dou tolok, ne là kóen mili nawa ye ebéléu. Deng wen yóm lenungkau bélê ye, ne laen kô dù tau gembek bud tmikeb du. ⁹ Ngem, deng wen bélê ye nfun Seitan, duhen yó se kem tau snalig le yóm ktau le Ju. Okóm sundu dou tau du yó kem tau yó. Angat htudu lu bukol bè solu ye, yó se mò gónó le temngón du yóm kbong nawahu kuy. ¹⁰ Lemwót bè yóm deng kimón ye du yóm tehe hlauhu kuy bè kehbala, yó gónóhu angat hol kemlung kuy kesok sut yóm kdaw angat keglayam kdéen tau bè klamangen benwu, yóm kdaw ktilów Dwata kul. ¹¹ Móyóne bud kól ne. Hol ten‑gama ye yóm kehtahu ye anì laen dù gemwa du bélê ye yóm kuy ofol. ¹² Yóm tau gel matù bè yó kem sidek gel sut, angat nitu ebè yóm Gónô Dwata bè longit, ne là kóen bud skibol bè yó ne. Hol lómón ke deng baling sotu heheken. Ne snulatu béléen se yóm boluy Dwata, dalang se yóm boluy yóm benwu Dwata, yó se yóm lomi Jirusalim, yóm benwu angat tuntun Dwata gu bè longit. Ne snulatu béléen snéen yóm dou lomi boluy. ¹³  Duhen yó, yóm tau wen klinguhen, hol hnungolen dé yóm tulón yóm Tulus Dwata bè yó kem tau bè ket simbahan.” ¹⁴ “Budi smulat do ebè yóm fen gel malak yó kem tau hemtahu bè Ludisya, monem mò du, ni se udélen ebélê ye yóm hol dohò tulónen. Du se yóm hol gulit, yóm hol gsalig, yóm tehe hedlimun Dwata yóm kentihen.” ¹⁵ Yó monen, “Deng gotu tngónu se yóm gel nmò ye. Ne tngónu snéen yóm kmò knawa ye ebéléu, là se tnawen ne là se kinien. Hyu béléu ke kinì duhen ke tnaw, olo ke yóm olohen mduf. ¹⁶ Yó gónóm mon, lemwót bè yóm olo kdufen yóm nawa ye ebéléu, tódô kóhu yu, lómón ke dfutu yu gu lem baku. ¹⁷ Igò ye sem gel mon du, ‘Denge mdengen do, deng baling hyu klowilu ni, laen kô dù gónóhu élél.’ Okóm là kô tngón ye du yóm tey ksideken bélê ye. Deng ye baling tau knodu, tau alì élél, tau mógów laen dù nes, tau butô. ¹⁸ Yó gónóm mon, wen hlauhu kuy. Bemli ye béléu dé yóm tahu blówón anì hol tahu yóm kwen kendengen ye. Ne bemli ye béléu se yóm nes bukay mò lesek ye anì là myak ye bè yóm kógów ye laen dù nes. Ne bemli ye se béléu yóm bulung mata anì bud ye mton. ¹⁹ Yó kem tau kenbong nawahu, sal gel bnólówu ne tnafaku lu anì gulit le. Duhen ni, hol knogol ye ne yó kem salà gel nmò ye. ²⁰ Ngem denge eles mdà ne mbal snolu aut ye. Ke wen tau hmungol du yóm udélu yó, ne ke hotunen o eta, motune se, ne segbóte mken béléen. ²¹ Yó kem tau gel matù bè yó kem sidek gel sut, angat wen kwalis blayu kul anì gemyón le klohoku bè yóm gónóhu myón kmamal yóm klamangen. Yóm katù le yó, hol lómón se yóm deng dou katù, ne kyónu klohok Mà bè yóm gónóhen myón kmamal se kun. ²² Duhen yó, yóm tau wen klinguhen, hol hnungolen dé yóm tulón yóm Tulus Dwata bè yó kem tau bè ket simbahan.”