¹ Ominu yó bud mton yóm sotu hógów Dwata htuntun gu bè longit, nkemen yóm kunsì yóm sol leyóng, ne wen tey lingkal senkebeng kulóngen. ² Tódô kenfóen yóm swaga, yóm sana ulal là sekna, duhen Seitan, yóm alì hulung dmelem yó kem tau hemtahu bè Dwata. Tódô nféten efet lemibu halay, ³ ne tódô tudaen elem tum sol leyóng. Ominen yó bud tmikeb du ne kendaduhen, ne wen ilô nmoen tahen anì là gekà le du. Yó gónóhen bmanggù ke Seitan anì là bud gsukaten kul yó kem tau bè klamangen benwu efet kdeng yóm lemibu halay. Okóm kogol yóm lemibu halay yó, na le bud hliwà likót. ⁴ Ominu yó bud mton yó kem bangkù gónó le myón yó kem tau benlay le glal kmukum. Bud tonu se lóyóf yó kem tau deng tehe hnatay le lan le tmulón yóm ktahuhen tehe tolok Jisas, ne lan le tmolok Udél Dwata. Ni kem tau ni, là kô hentahu le du yóm lóbô tanay sut. Dalang se yóm lennged hmoen, là kô hentahu le du. Ne là se henmóyô le du yóm kun ilô yóm lóbô, yóm gel nmò le lem uyó le duhen ke te henmù le. Ni kem tau tehe hnatay le ni, gotu le bud mowil, ne gotu le mung kmamal bè Krays bè yóm lemibu halay. ⁵ Ni se yóm hol tanay kehlowil Dwata yó kem tau tehe matay. (Bong yó kem dumu tau deng tehe matay, là tagad hlowil Dwata kul he efet kdeng yóm lemibu halay.) ⁶ Tey kehligal yó kem tau matay gomong hlowil Dwata bè yóm tanay kehlowilen tau yó, ne tey bong kehyuhen bélê le. Là se kô le mlan lem lanaw ofi, yóm gel mon le gewuhen dulék matay tau. Ni kem tau hlowil Dwata ni, lu se yó kem tau fen gel blóng kem dumu tau ebè Dwata ne ebè Krays. Gotu le mung kmamal bè Krays bè yóm lemibu halay. ⁷ Kogol yóm lemibu halay, omin le bud hewà ke Seitan gu lem blangguen. ⁸  Tódô bud lemwót Seitan nan e bud smukat kem tau bè klamangen benwu, duhen yóm gel bnoluy le Gog ne Magog. Gotu sentifunen lu anì na le e gnida Dwata. Ya tey kwen le, lómón kwen le helek bè kilil mohin. ⁹ Tódô lenngeb le yóm benwu yó, ne gotu lenibut le yóm kamfù yó kem tau Dwata ne yóm syudad kenbong nawahen, duhen Jirusalim. Okóm tódô wen ofi gu bè longit btang eta le, gotu genlaen lu yóm kdê le. ¹⁰ Bong ke Seitan kun, yóm deng smukat kul, tódô tudà le elem lanaw ofi, yóm ofi wen kbudahen senflós dmilóf. Bè yó se kul deng gónó nô yóm lóbô tanay sut ne yóm fen gel tmugod du. Bè yó gónó le tendo heslaf seflósen kemdaw ne kifu, ne laen kô dù sónen yóm tendo keheslaf le yó. ¹¹ Ominu yó bud mton yóm bangkù alì sminang bukay gónón myón yóm fen kmukum, ne tonu se yóm myón tahen. Ne bè yóm ketngelu du, tódô lana bè yó bè soluhen yóm tonok ne longit, là kô bud tonem kul ne, bà udì. ¹² Ne tonu se yóm kdéen tau deng tehe matay, yó kem tau hol geta kólen bè yó kem olo leneken, gotu le mdà bè solu yóm bangkù sminang bukay yó. Ne omin le lemungkà yó kem bok. Ominen bud wen sotu bok lenungkà le, duhen yóm bok lowil. h Ne yó kem tau deng tehe matay, gotu knukum Dwata lu lemwót bè yóm tehe gel nmò le, yóm deng snulat le bè yó kem bok lenungkà le yó. ¹³ Tódô kdéen tau tehe matay lem mohin, gotu le mdà bè yó. Ne yóm kdéen tau tehe nô bè yóm benwu gónó le nô yó kem tau deng matay, gotu le mdà bè yó snéen kul. Gotu knukum Dwata lu yóm kdê le lemwót bè yó kem tehe gel nmò le. ¹⁴ Omin Dwata mò són yóm hatay, dalang se yóm benwu gónó le nô yó kem tau deng matay, tódô tudaen lu elem lanaw ofi. Nim lanaw ofi ni, ni se yóm gel mon le gewuhen dulék matay tau. ¹⁵ Yóm tau ke là nóen bè yóm bok lowil yóm kun boluy, tódô tudà le elem lanaw ofi.