¹ Kogol ni kem ni, tódô gungolu yóm tey genged udél tau sbung bè longit, tódô le gotu segeng mon du, “Dóyón tekuy dé Dwata. Du se yóm lemwà tekuy gu lem hatay. Tek sónen du se yóm hol geta ne yóm hol mfasang. ² Yóm kkukumen tau, hono tahu ne hono tedeng. Deng tnafaken yóm libun hdóyón yó lanen mit kul elem sidek yóm kdéen tau bè klamangen benwu. Deng bnelesen yóm tehe gel khatayen yó kem tóbóng lówóhen.” ³ Omin le gotu mensag, mon le, “Hol dóyón tekuy dé Dwata. Ngem tu dé kebelen yóm ofi mken du yóm syudad bong tuu, laen kô nan e són.” ⁴ Ne lemwót yó kem lewu folò fat tau tuha ne yó kem fat mtulus, gotu le hegluduk bè solu Dwata, yóm myón bè yóm gónón kmamal, mon le, “Bong tahu se. Hol dóyón tekuy dé Dwata.” ⁵ Ominu mungol yóm mudél gu bè yóm gónón myón yóm fen kmamal, monen, “Dóyón tekuy dé Dwata, yu kem tau tóbóng lówóhen, dalang se yu kem tau gel kmikò du, lemwót bè yó kem tau hol geta kkólen bè yó kem tau hkawang.” ⁶ Ominu bud mungol yóm tey genged udél tau, hol lómón ke lungkul yóm tey hikong, ne hol lómón ke yóm tey lugung. Yó udél le, mon le, “Hol dóyón tekuy dé Dwata. Deng duhen ni ne yóm kkamalen yóm klamangen yóm Dwata gónó tekuy mogot, yóm laen dù là gbeken du. ⁷ Hol tekuy hligal dé, hol dóyón tekuy yóm tey kegetahen, yakà dengen hto ne yóm buteng kmò le ken bè lówó yóm Ngà Ubiha, ne deng eles hetifes ne yóm libun angat yehenen. ⁸ Yó nes hesek le du, duhen yóm nes sminang bukay, yóm nes hol mólós.” (Yó hnigaden yóm nes bukay leseken yó, duhen yó kem nmò hyu gel nmò yó kem tau Dwata.) ⁹ Ominen mon du mò do yóm hógów Dwata, “Ni snulatem. Tey kehligal le yó kem tau deng tinok le ebè yóm mò ken bong bè lówó yóm Ngà Ubiha.” Ne bud monen mò do, “Yóm deng snulatem yó, hol udél lemwót lem bak Dwata.” ¹⁰ Botonge tódô hegluduk klohok tihen lanu tô dmóyón du, okóm mom yó monen mò do, “Bê. Béem nmò yó. Tódô senged kut fen gel tóbóng lówó Dwata. Dalang se yó kem dumuhem setwoli là mkó du nawa yóm ktahuhen tehe gel tolok Jisas kul. Olon Dwata dé hol dóyónem.” Yakà ktahuhen du yóm tehe tolok Jisas, yóm ktahuhen yó tehe gel htulón Dwata yó kem tugoden ekni. ¹¹ Ominu yó mton yóm longit tódô hnas. Ne wen tonu kudà bukay mdà bè yó, ne wen smakay tahen. Yó boluy yóm smakay tahen, Gsalig ne Tahu. Tey tedeng yóm kkukumen tau ne tedeng snéen yóm kesfatayen yó kem hohonen. ¹² Hol lómón ke dilóf ofi yóm lem matahen. Ne tey dê kuruna bè kuluhen. Ne wen boluy deng snulat bè lówóhen, okóm laen dù temngón du lanen yóm boluy yó, tek són du. ¹³ Yóm nes leseken, tódô tfeng litô. Ne yó boluy le du, “Udél Dwata.” ¹⁴ Ne gotu le huli du yóm kdéen sendalù bè longit. Gotu le smakay kudà bukay snéen kul, ne gotu le mnes bukay, yóm nes mólós. ¹⁵ Yóm smakay tukô gna kul yó, wen hsut gu lem baken lómón ke sudeng alì telem mò atuen yó kem tau hol geta bè klamangen benwu. Yóm kkamalen kul tey mefges lómón ktétélen bala tók. Lómón ketken le yóm bungu grép anì molo élen, lómón yó se ketkenen mdà kul elaan yó kem hmohon du. Ni se kehegfan Dwata du yóm alì sidek kebuten kul, yóm Dwata laen kô dù là gbeken du. ¹⁶ Wen boluy snulat bè yóm nesen ne bè hahahen snéen, monen, “Yóm Hol Geta bè kdéen tau hol geta ne yóm hol gónó le mogot yó kem kdéen mogot.” ¹⁷ Ominu mton yóm sotu hógów Dwata mdà bè gónón sóól yóm mata kdaw. Tey kehgelen udélen tmaba ebè yóm kdéen onuk koyu gel móyóng talak kmawang, monen, “Géhél ye edini ne. Eles ye stifun bè yóm tey ken bong nmò Dwata bélê ye. ¹⁸ Géhél ye na ye e tnukô unged yó kem tau matay bè gida, yó kem tau hol geta ne yó kem geta bè yó kem sendalù, ne yó kem sendalù le. Tnukô ye unged yó kem kudà ne yó kem tau smakay kul, ne unged yóm kdéen tau, tau klifen ne yó kem tau là klifenen, yó kem tau hol geta kólen bè yó kem tau olo leneken, gotu tnukô ye unged le.” ¹⁹ Ominu yó mton yóm deng kestifun yóm lóbô tanay sut ne yó kem tau hol geta te tonok, mung kul yó kem tey sendalù le. Yó nmò le, na le e mit sgida bè yóm myón ta yóm kudà bukay yó koni ne yó kem mung du. ²⁰ Bè yóm kesfatay le, kenfô le yóm lóbô yó, mung du yóm gel tugoden, yóm tehe gel mò yó kem hentaw ton ke gel nô bè solu yóm lóbô yó. Lemwót bè yó kem hentaw ton tehe nmoen gónón smukat yó kem tau deng wen ilô yóm lóbô nô bélê le, yó kem tau deng hemtahu du yóm lennged hmoen. Yóm lóbô yó koni ne yóm tugoden, gotu tudà le lu igò le tolo mowil elem tum lanaw ofi wen kbudahen tendo dmilóf. ²¹ Ne kdê yó kem sendalù le, gotu hnatay yóm smakay kudà bukay yó koni, hatayen kul yóm sudeng hesut gu lem baken. Ya tey sidek kegtu yó kem onuk koyu tmukô du yóm unged yó kem tau deng hnatayen.