¹ Ominen mógów ebéléu yóm sotu hógów Dwata tehe mogot tukung, monen mò do, “Mungi do, toloku kóm yóm kmò ktafak Dwata du yóm libun hdóyón alì tótól, duhen yóm tey syudad bong deng tehe hdà le moni bè yó kem tey dê él mlel. ² Kdéen tau hol geta bè klamangen benwu, gotu nbóten lu nim libun ni. Ne kdéen tau talak tonok, gotu gbót hlengel minum béléen mò lanen mit kul mò sidek.” ³ Lemwót bè yóm knóen béléu yóm Tulus Dwata, tódô nwiten o yóm hógów Dwata le mudél ebéléu etu bè yóm benwu laen dù tau menwu du, ne bè yó gónóhu mton du yóm libun smakay yóm ógóf lóbô hulô, tódô henok lówóhen yóm udél hemnê ke Dwata. Wen hitu kuluhen yóm lóbô yó, ne sfolò hangahen. ⁴ Yó nes leseken yóm libun yó, nes yóm hol libun boi, yóm nes ginggung megem, ne wen se yóm hol tógó khulóen. Tódô tfeng lówóhen yó kem ngom libun gel nmò le lemwót bè blówón ne lemwót bè yó kem botu sminang mebtes, ne bè yó kem pérlas. Wen tgayan blówón nkemen, tódô henok lemen yóm nmò alì sidek lemwót bè yóm gel ksamuken. ⁵ Wen boluy snulat lem uyóhen, okóm gbuni yóm lanen. Yó lanen, “Babilun, yóm syudad tey tótól, yóm hol gónó le menyê kdéen tau hdóyón ne yó kem dumu tau ssamuk honon lu.” ⁶ Ne tódô tonu se deng hlengel yóm libun yó lemwót bè yóm gel kinumen yóm litô yó kem tau hemtahu bè Dwata deng hnatayen ne litô yó kem tau là monol nawa le ebè Jisas. Bè yóm ktonu du, ya tey sidek kehtawu du. ⁷ Okóm mon yóm hógów Dwata mò do, monen, “Moen ke alì hentawem? Tulónu kóm hnigaden nim libun ni ne yóm ógóf lóbô snakayen, yóm wen hitu kuluhen ne sfolò hangahen. ⁸ Yóm ógóf lóbô tonem yó, tehe mowil te tonok, kóm deng matay. Bede móyón bud sut ne ni lemwót gu lem yóm tey sol leyóng. Okóm bè yóm ksuten, angat tudà le elem lanaw ofi mò sónen. Angat tey kehtaw le du yó kem tau te tonok bè yóm kton le du. entaw le, abay se tehe mowil, ominen matay, ne ni bud sut. Yó kem tau hemtaw du yó, duhen yó se kem tau là gsulaten yóm kul boluy bè yóm bok lowil tehe nulat le gu laanen là deng wen benwu he. ⁹ Là gbek tau hemlan du nim ni ke là hulungen hedem ne ke là hulungen temnef. Yó hnigaden yóm hitu kuluhen yó, duhen yóm hitu bulul gónóhen myón yóm libun hdóyón yó. Bud hnigaden snéen yóm hitu tau hol geta. ¹⁰  Deng limu ne gna matay bélê le, bede hanà tolo mogot benwu he yóm sotun, ne yóm sotuhen, là dengen sut he. Kesok sut, là kóen legen yóm kun kogot. ¹¹ Yóm lóbô tehe mowil, okóm deng matay, du se gwoluhen bè yó kem hitu tau mogot benwu yó koni. Yóm gwoluhen yó, bud du se sotu bè yó kem hitu. Okóm angat gógów elem lanaw ofi mò sónen. ¹² Yó hnigaden yó kem sfolò hanga yóm lóbô yó, duhen yó kem sfolò tau hol geta là deng wen knamal le he ni kmoen ni, okóm angat wen glal kmamal benwu blay le kul anì mung le kmamal bè yóm lóbô tanay sut yó. Bede tek sotu urasen yóm kkamal le yó. ¹³ Kdê yó kem sfolò tau hol geta yó koni, angat gotu ssotu kehedem le, ne gotu blay le bè yóm lóbô yóm kul kfasang ne yóm kul glal mogot benwu. ¹⁴ Angat le gotu mit sfatay bè yóm Ngà Ubiha, okóm laen kô dù gmò le béléen. Ne yó kem tau mung bè yóm Ngà Ubiha, lu se yó kem tau tehe tnabahen, deng tehe néléken, tau là monol nawa le bè yóm klolò le du. Angat le matù, abay se yóm Ngà Ubiha, du se yóm hol gónó le mogot yó kem kdéen mogot, ne du se yóm Hol Geta bè yó kem kdéen tau hol geta.” ¹⁵ Ne bud monen mò do yóm hógów Dwata yó koni, monen, “Yó kem él gónón myón yóm libun hdóyón yó, hnigaden yó kem tey genged tau lemwót bè ket benwu, ne bè ket but tau, ne bè ket kay udél tau. ¹⁶ Lemwót yóm lóbô yó ne yó kem sfolò hangahen, angat knutó nawa le yóm libun hdóyón. Tódô nwa le béléen kdê ngomen dalang se kdê nesen, tódô tebel le laen dù nes. Angat tódô gotu ken le ungeden, ne gotu bot le elem ofi tiolen. ¹⁷ Yó gónó le mò du yóm yó, abay se monem tódô nmò le yóm deng kun kehlan du bélê le Dwata. Angat tódô sensotu Dwata kehedem le anì tódô gotu blay le bè yóm lóbô yó yóm glal le mogot benwu. Ni se angat gónóhen e dohò yóm deng tehe kun olu du Dwata. ¹⁸ “Yóm libun tonem yó, hnigaden yóm tey syudad bong fen mogot yó kem kdéen tau hol geta bè klamangen benwu.”