¹ Ominu bud mungol yóm tey udél bong gu lem yóm Gónô Dwata, mudél ebè yó kem hitu hógów Dwata, monen, “Lemwót ye ne. Ne ye e kok te tonok yó kem hitu tukung gónón nô yóm tey lebut Dwata kem tau.” ² Tahu se. Lemwót yóm tanay hógów Dwata koken yóm kun tukung ete tonok. Ne tódô sen‑gengen se yóm tey bkukang alì sidek kdesen gotu gnóm yó kem tau deng nô bélê le yóm kun ilô yóm lóbô tehe tanay sut, ne yó kem deng hemtahu bè yóm lennged tehe hmoen. ³ Ne lemwót yóm gewu hógów Dwata koken yóm kun tukung elem mohin. Ne tódô baling litô kmetel, ne kdéen mowil nô lemen, gotu le matay. ⁴ Ne ominen lemwót yóm getlu hógów Dwata koken se kun tukung elem yó kem él mlel ne bè yó kem tbul él. Ne gotu le baling litô yó kem él. ⁵ Ne gungolu se udél yóm hógów Dwata le mkok tukung elem él, monen, “Ó Dwata, laen kô dù belenen yóm kóm kmò. Uu se yóm sana Dwata tenbut bè kbuten efet ni nem kmoen ni. Bong tedeng yóm ktafakem kul ni, ⁶ yakà dengen gamà litô yó kem tau hemtahu béléem ne yó kem tehe tugodem lan le monok kul. Yó gónóm mon, gotu hinumem kul litô yó kem tau monok yó. Bong knóón bélê le nim tafakem kul ni.” ⁷ Ne gungolu yóm mudél gu bè yóm gónó le gel mtem yóm hboo le ebè Dwata, monen, “Bong tahu se, Dwata, yóm hol gónó mogot, yóm laen dù là gbekem du. Bong tedeng yóm ktafakem kul ni.” ⁸ Ne lemwót yóm gfat hógów Dwata koken se kun tukung bè mata kdaw anì temnù kkinien, anì mluf yó kem tau bè alì sidek kkinì kdaw. ⁹ Tahu se. Gotu le mluf yó kem tau. Deng mom sónmò le hemtolo ke Dwata, abay se du yóm wen kfasangen mò du ni kem hlayam ni. Okóm là dog knogol le du yóm sidek nmò le, ne là se dog dóyón le ke Dwata. ¹⁰ Ne lemwót yóm glimu hógów Dwata koken se kun tukung eta yóm gónón myón kmamal yóm lóbô tanay sut yó. Ne tódô baling mget kifu bè klamang benwu nogoten. Ne yó kem tau nogoten, gotu gesfà le dilak le lan le alì tendo heslaf bè yóm tenduk le. ¹¹  Tey kehtolo le yóm Dwata nô bè longit lemwót bè yó kem tey dê tenduk le ne bè yóm alì kdes bkukang le. Okóm là kô dog knogol le du yó kem sidek nmò le. ¹² Ne lemwót yóm gnem hógów Dwata, koken se kun tukung bè yóm tey él bong boluyen Yufratis. Botong kti yóm él bong yó anì wen lan le mifal du yó kem tau hol geta lemwót fi gu dmata kdaw. ¹³ Ominu yó tódô mton yó kem tlu busaw alì sidek halas le, hol lómón ke fak ktonu kul. Hesut le gu lem bak yóm swaga, ne gu lem bak yóm lóbô tanay sut, ne gu lem bak yóm fen tmugod kul. ¹⁴ Ni kem tlu busaw ni, tey dê hentaw ton nmò le. Gotu le mógów ebè yó kem kdéen tau hol geta talak tonok, gotu sentifun le lu anì na le e mò gida bè yóm kdaw alì knikò tau deng tehe eles olu Dwata, yóm Dwata laen dù là gbeken du. ¹⁵ Ne mudél yóm hol gónó mogot, monen, “Ngem, angat le gotu ktut bè yóm kkólu, lómón kektut le ke sut yóm tau mnagaw. Hligal kun yóm tau eles mingat do, yóm tau deng eles hentifesen yóm nes leseken anì là mógówen là mnes bè yóm kkólu, ne anì laen dù gónón myak bè gónón wen. ¹⁶ Bong yó kem busaw, gotu sentifun le yó kem tau hol geta ne yó kem sendalù le bè yóm benwu boluy le du bè Hibru, Armagidon. ¹⁷ Ominen lemwót yóm ghitu hógów Dwata koken yóm kun tukung talak kmawang. Tódô sen‑geng gungolu se yóm tey mudél bong gu bè hóm Gónô Dwata bè longit, gu bè yóm gónón myón yóm fen kmamal, monen, “Deng gotu deng ne.” ¹⁸ Tódô sen‑gengen se mkal yóm tey silà, lel yóm tey lungkul lugung, ne yóm tey leték, ne tey linol bong. Nim linol ni, là deng wen semnged du he mbut bè hol kbut tau te tonok. Ni se hol yéen linol bong. ¹⁹ Ne yóm tey syudad bong Babilun, botong tlu gónón mesdoli. Gotu gebà snéen yó kem dumu syudad talak tonok. Là kô na a klifót Dwata du yóm alì kegsalà le yó kem tau bè Babilun yó, ne hol hegnómen kul yóm tey kebuten kul, lómón ke wen ninum lóbô hinumen kul. ²⁰ Bè yóm linol bong yó, gotu le lana yó kem hungul te mohin ne yó kem kdéen bulul, là kô bud tonem kul. ²¹  Ne tey bulók kulón lembang btang gu bè longit, na limu folò kilu keblat le. Gotu le btang eta yó kem tau. Ya tey sidek kehtolo le ke Dwata lemwót bè nim tey bulók kulón alì hmayam kul ni.