¹ Bong yóm tau mò fen gel blóng le ebè Dwata yó kem Ju, sal gel nélék le bè yó kem dumu le tau. Sal gel mlan béléen ke wen gel dsù le ebè Dwata, duhen ke wen gel blay le ebéléen bè yóm kegsalà le. ² Yóm tau gel blóng le ebè Dwata yó, sal gel wen gónón lunog snéen kun. Yó gónóm mon, tey kganag nawahen bè yó kem dumuhen tau wen kul salà là gehedem le du. ³ Lemwót bè yóm kun gónó lunog se kun, là són du bè kem dumuhen tau yóm gónóhen gel demsù, okóm gel demsù ebè Dwata bè kun salà snéen. ⁴ Yóm tau mò du nim nmò ni, tey bong kadat le du. Là kô wen tau tódô lembù mò du nim nmò ni. Sal gel nélék Dwata yóm tau fen mò du, lómón yóm tehe kéléken ke Aron ekni, yóm hol tanay tau mò blóng le ebéléen. ⁵ Senged snéen ke Krays, là kô nan e ten‑gna mon du, ou dé mò fen blóng tau ebè Dwata. Kaem tódô Dwata yóm fen mélék du, yó monen mò du, “Uu yóm hol Ngau. Deng duhen ni ne yóm kdawu hegfan du yóm hol kngau kóm.” ⁶ Sotu tehe bud mon Dwata mò du, yó monen, “Uu se yóm mò blóng tau ebéléu, ne laen kô tul sónen yóm kmoem du, hol lómón yóm tehe keseblóng Mélkésédék yó kem tau ebéléu ekni.” ⁷ Bè yóm tolo knô Jisas te tonok ekni, tey khotuhen nawahen gel mni bè Dwata, mung du yóm tey kkiken ne yóm gel kosok lewoken, abay se gbek Dwata lemwà du bè yóm katayen. Lemwót bè yóm keheglaanen bè Dwata ne yóm hol óyóen mimón du, hnungol Dwata yóm knihen ebéléen. ⁸ Baluen ke du se yóm hol kun Ngà Dwata, kaem nan na hol dnalang yóm kimónen ke Maen mlan bè keglayamen ⁹ Tikóng deng gotu nmoen yóm hmò Maen du, yó gónó Dwata hlan du tahen yóm kegewà tekuy gu lem hatay. Kdéen tau mimón du, gotu blayen kul yóm klowil laen dù sónen. ¹⁰ Yó boluy Dwata du tau mò blóng ebéléen, lómón yóm tehe kun keseblóng tau Mélkésédék. ¹¹ Bè ni kem tulónu kuy ni koni, tey dê he yóm tô nóyô tulón me kuy, okóm tey mgel tmulón du kuy, abay se laen dù hol óyô ye dmalang. ¹² Tey deng kegen ye hemtahu, yake deng ye kem olò hulung tmolok ne yóm Udél Dwata bè kem dumu ye. Là myó. Hyu ke wen tau na bud tmolok kuy yóm hol tanay dnalang yóm tau hemtahu lemwót bè yóm Udél Dwata. Yó gónóhu e hmingun kuy, hol lómón yóm ngà tolo tmutù. Là deng gbeken du he mken du yóm mgel. ¹³ Ne yóm ngà tolo tmutù monu yó, hningónen yóm tau là deng hol tngónen du he yóm kmò kimónen yóm Udél Dwata anì tedeng kmoen. ¹⁴ Okóm ke deng nimónen Dwata yóm tau, lómón ke deng gbeken mken yóm ken mgel. Abay se deng tendo gel dnalangen se kun milô du yóm hyu ne yóm sidek.