¹ Ne tekuy snéen nim kmoen ni yóm gónó Dwata e fmasad du yóm benwu angat gónó tekuy hlós henek nô yó. Duhen yó, hol tekuy eles temgama, kô là guta tekuy du yóm benwu fasaden yó. ² Yakà dengen gefet bélê tekuy ne yóm Tulón Hyu, hol lómón yóm tehe kgefeten bélê le se kul ekni. Okóm laen kô dù ofol le hmungol du, abay se là hentahu le du ³ Okóm bélê tekuy, kem tau hemtahu, angat guta tekuy se yóm deng fasad Dwata tekuy yó. Okóm yó kem tau là hemtahu du, là kô guta le du, hol lómón yóm tehe mon Dwata, yóm monen, “Tey sidek kebutu kul, ya tey kget kmonu du, ‘Hol là kô le gehlós edu kul yóm benwu mò gónó le hlós henek nô.’ ” Sundu yó gónó Dwata mon du yó ke là dengen deng he kmoen du yóm benwu monen yó, deng kem deng là sekna ne, tehe segeng bè yóm kedlimunen yóm klamangen. ⁴ Yakà wen monen bè Sulat Dwata gbak ebè yóm tehe ghituhen kdaw, yó monen, “Bè ghituhen kdaw hegnô Dwata, abay se deng gotu deng ne kdê nmoen.” ⁵ Ne bud sensulit Dwata yóm tehe monen, “Hol là kô le gehlós edu kul tum benwu mò gónó le angat hlós henek nô.” ⁶ - ⁷ Yó kem tau tanay hmungol du yóm Tulón Hyu, là kô guta le du yóm monen yó, abay se monem, là kô le hemtahu. Yó gónóm mon, angat wen he kem dumu tau heflós Dwata edu.  Yó gónó tekuy temngón du nim ni, abay se deng bud wen kdaw blay Dwata tekuy. Yóm kdaw blayen tekuy yó, deng tódô monen, “Ni kemdaw ni.” Yó se yóm udél htugoden ke Dabid ekni, bede deng hilu latu halayen ne kegenen. Yó monen, “Ke sok gungol ye nim kemdaw ni yóm udél Dwata ebélê ye, hol bê ye abay là himón.” ⁸ Yóm lomi benwu monen gónó le hlós henek nô yó, sundu benwu Kanan du. Ke deng duhen yó yóm benwu gónó Juswa e malak kul, sana là mon Dwata du ne ekni wen benwu gónó le angat hlós henek nô. ⁹ Bè ktahuhen, bélê tekuy kem tau Dwata, tolo wen he gónó tekuy tahu hegnô, lómón yóm tehe kun kehegnô Dwata bè yóm ghituhen kdaw ekni. ¹⁰ Ke deng guta tekuy yóm fasaden tekuy yó, là bud nmò tekuy du ne yóm kut nmò, tódô tekuy hegnô, hol lómón se yóm tehe kun kehegnô Dwata ekni. ¹¹ Duhen yó, hol hotu tekuy són gel tekuy anì guta tekuy yóm kehegnô yó koni. Hol ten‑gama kuy anì là mo tekuy mom mkél bè yó kem tau gnan ekni, là kô dog guta le du lemwót bè yóm là kehtahu le. ¹² Yóm Udél Dwata, tey mlan, ne tey gembek. Ke hningón tekuy yóm udél Dwata, hol lómón ke sudeng, tey gembon ke wen tenbeken. Milud he kegbonen yóm udél Dwata, abay se tódô gotu tngón Dwata yóm kmò tekuy ne yóm knawa tekuy. Ne gotu henklolen yóm nô lem nawa tekuy ne yóm nô lem hendem tekuy. ¹³ Laen kô dù gebnos bè Dwata. Balù sotu bè yó kem deng dlimunen ke mone tô gebnos béléen, gotu tonen kentihen. Bè soluhen gónó tekuy angat mdà hulin kdaw, ne angat gotu benkas ebéléen kdê yó kem deng nmò tekuy. ¹⁴ Duhen yó, hol hbegel tekuy yóm kehtahu tekuy. Yakà wen yóm tey hyu fen semblóng tekuy ebè Dwata, deng gna kól ditu ne bè soluhen. Du se Jisas, yóm Ngà Dwata. ¹⁵ Yóm gel blóng tekuy ebè Dwata yó, deng gotu tngónen yóm gónó tekuy gel lunog, ne tey kkoduhen tekuy. Abay se bè yóm tehe knóen te tonok, deng gnómen se kun yóm kdéen sindil lómón yóm tekuy, okóm là gemsalaen yó yóm kun. ¹⁶ Duhen yó, bê tekuy abay likò hloni ebè Dwata, yóm gónón hol nô yóm tóbóng. Ke hloni tekuy ebéléen, angat ton tekuy yóm tey kkoduhen tekuy ne yóm tey kun któbóng bè ket kehtóbóng tekuy béléen.