¹ Ó kem dumuhu setwoli, ke wen ton ye sotu bè yó kem kuy dumu hemtahu wen gónón btang bè kloloen ke Dwata, hol henganag ye nawa ye tmóbóng du, yu kem tau gulit kloloen du yóm Tulus Dwata, anì mulék heyu se kun. Okóm eles tengama ye, kô wen gónó ye gsindil se kuy. ² Hol tnóbóng ye kem dumu ye ke wen kat blat bélê le se kul. Ke yó se nemò ye, deng glolò ye ne yóm kun hlau Krays. ³ Ke yó hendem yóm sotu tau hono heyu yóm gel nmoen, olohen mom tmundug knóen yóm tau yó. ⁴ Yake ket tau dé hol hemklol du yóm kun kmò. Ke heyu, baling gesengel nawahen gemnóm du, là bud hegetahen du yóm kun nemò bè yóm nemò yó kem dumuhen. ⁵ Kaem ket tau se smolu du yóm kun nmò. ⁶ Sotuhen, ke wen tau tmolok udél Dwata bélê ye, bong knóón ke gel benlay ye ke gel wen ton ye. ⁷ Bê ye hetondo knô ye. Laen kô dù tau gemkel ke Dwata. Yóm tau ke wen huluhen, yó se nutahen. ⁸ Bud lómón yó se yóm nemò tekuy. Ke tódô loloen kun kenóyô yóm tau, angat gutahen hatay laen dù sónen. Okóm ke loloen yóm kun kóyô yóm Tulus Dwata, angat gutahen klowil laen dù sónen. ⁹ Duhen yó, bê tekuy abay hetakas mò du yóm heyu, abay se angat wen tey guta tekuy du ke là hetakas tekuy. ¹⁰ Yó gónóm mon, ke wen lan tekuy tmóbóng kem dumu tekuy, hol tnóbóng tekuy lu, sélétem mon bè yóm hol dumu tekuy hemtahu. ¹¹ Dou lan tdok smulat du nim sfuhen ni. Henénég ye dé yóm tey kebang lanu smulat. ¹² Yó kem tau tendo mubug kuy lemolò du yóm hlau bè logi, yó se yó kem tau olo le beyen heklabak ne hton salù bè yó kem dumu le. Abay se ke són yó tô tolok le yóm katay Krays bè kros, ke là hmung le du yóm hlau bè logi yó, angat wen gónó le hemsidek kul yó kem dumu le Ju. ¹³ Yó kem tau yó, tey klolò le du yóm htulì, okóm là kô na le e gotu glolò du kdê yó kem dumu hlau. Yó gónó le alì semgyok kuy anì wen gónó le hesalu bè kem dumu le Ju ke deng glolò ye yóm kul tolok. ¹⁴ Okóm béléu dou, tek sotu yóm saluu, són yóm katay Jisas Krays bè kros yóm gónó tekuy mogot. Lemwót bè yóm katayen yó, là kô bud gwiten dou ne yóm dê kenbeyen talak tonok ne là kóe bud gfét du snéen. ¹⁵ Laen kô muhen yóm tnulì duhen ke là tnulì du. Yó dé hol bong muhen bè Dwata ke deng nô bélê tekuy yóm lomi klowil lemwót béléen. ¹⁶ Yó kem tau lemolò du yóm monu yó koni, Dwata he hol todo henek nawa le ne hol kmodu kul. Là olon lu du, yake gotu le gomong lemen snéen kul kdê yó kem kun tau Dwata. ¹⁷ Ni se mò sónu du, hol béen abay wen tau bud tô hemkéng du yóm kehmò Jisas du do nim nmou ni. Hnénég ye ni dé lówóhu, deng hono lekes halì. Ni se ilô yóm deng kimónu du yóm gel dók Jisas do. ¹⁸ Yó ne kóó, kem dumuhu setwoli. Yó hem gónó tekuy mogot Jisas Krays hol todo tmóbóng kuy se kuy.