¹ Là bud tekuy menolemen du ne yóm hlau Musis, abay se deng hegewa Krays tekuy. Yó gónóm mon, hol tekuy hebegel anì là bud tekuy menolemen du yóm hlau yó. ² Hnungol ye dé, ou se Pol mon du nim ni. Ke htulì ye mò tô lan ye anì tedeng kton Dwata kuy, laen kô dù muhen bélê ye ilóu yóm katay Krays. ³ Bud nulitu bélê ye yóm monu yó koni. Ke wen tau tô hetulì anì tedeng keton Dwata du, là kóen hyu ke là tódô gotu loloen du yóm kdéen hlau. ⁴ Ke wen bélê ye, ke tô hlanen bè kloloen yóm hlau Musis gónón tedeng kton Dwata du, deng mom senkóhen knóen bè Krays. Ne là gomongen bè yóm kun tóbóng Dwata. ⁵ Okóm bélê tekuy du, són kengel nawa tekuy yóm nmò Dwata bélê tekuy mò gónón tedeng ktonen tekuy. Kun kefasang yóm Tulus Dwata mò du nim ni, hlanen bè yóm kehetahu tekuy. Ne yó se yóm todo nangat tekuy. ⁶ Ke deng me sesotu bè Krays Jisas, laen kô muhen bélê me kum yóm htulì. Senged se ke wen, duhen ke là. Yó dé bong muhen bè Dwata, ke deng hol gfan bè yóm kesbong me nawa yóm kehtahu me. ⁷ Tehe tey tedeng klolò ye ke Krays. Tau du se hemseng kuy anì là bud lolò ye du yóm ktahuhen? Tedu se aluhen kuy du yóm tau yó? ⁸ Là kóen na a lemwót bè Dwata, abay se du deng tehe tmaba kuy ebéléen. ⁹ Yóm tolok sekban yó, lómón yóm gel mon le, “Ke wen ken bali, ke bolem bè yóm ken lomi, baluen ke tek udì, tódô gotu bali yóm kedéen.” ¹⁰ Okóm bélê ye kuy, tolo mgel nawahu kuy. Lemwót bè yóm deng kesesotu tekuy bè yóm gónó tekuy mogot, tódô tengónu là kô glolò ye du yóm tolok keng yó. Nô kihu ne yóm tau sembeweg kuy bè yó, Dwata he tmafak du. ¹¹ Ke béléu dou, kem dumuhu setwoli, ke tahu se yóm gel mon le gel hlolou yó kem tau yóm hlau bè kehetulì, moen se du ke gel hensidek le ou yó kem dumuhu Ju? Ke tahu se yóm mon le yó, là kô lenbut le dou, baluen ke homong toloku yóm katay Krays bè kros. ¹² Yó kem tmolok sekban yó, yake bê le dog hensawang yóm alì óyô le mò du yóm kehtulì yó. Hyu ke tódô hlós knafun le knô le ne. ¹³ Bélê ye kuy, kem dumuhu setwoli, deng tnaba Dwata yu ebéléen anì là bud ye menolemen du ne yó kem hlau Musis. Okóm baluen ke là bud ye menolemen du, hol bê ye abay tódô nemung yóm sidek knóyô lówó ye. Yó dé tles nmò ye, tnóbóng ye kem dumu ye lemwót bè kesebong ye nawa. ¹⁴ Abay se yóm kdê hlau Musis yó, enget gotu glolò tekuy lu ke lolò tekuy yóm sotuhen, yóm monen, “Hol kenbong nawahem kem dumuhem tau lómón kebong nawahem yóm kóm knô.” h ¹⁵ Okóm ke lómón knawa ógóf lem bnes yóm tendo nô bélê ye, ke sónmò ye sfatay ne sefdes, hol ten gama ye, déke gotu ye seglà. ¹⁶ Yó hol monu mò kuy, yake hol ye halak dé bè Tulus Dwata. Ke yó se nemò ye, là kô bud bninguy ye du yó kem sidek kenóyô lówó ye. ¹⁷ Abay se yóm sidek kenóyô lówó tau, kenbéen yóm kun kóyô yóm Tulus Dwata. Dalang se yóm Tulus Dwata, kenbéen yóm sidek kenóyô lówó tau. Kaem sfohon le yóm lewu le yó. Yó gónóm mon, ke halak kuy bè Tulus Dwata, là kô gmò tekuy du ne yóm knóyô lówó tekuy yó. ¹⁸ Ke Tulus Dwata se fen malak tekuy, là bud tekuy ghesek du ne yóm hlau Musis. ¹⁹ Tey dilô yó kem tau ke són yóm kul knóyô gónó le gel galak. Sal le gel mò sidek, ne là mólós kehedem le, ne dê nmò le yóm gónó le hemyak kenô. ²⁰ Ne lel le hemtahu bè dwata kéng, ne tey ksalig le bè imò le. Sónmò le sekelit ne sfatay. Gel le sélés nawa ne sefatay, ne tey dê nalu nawa le. Tey alì mahil mesgólól kehedem le. ²¹ Yó mò kul, gel le mófô. Ne tey gel kehlengel le, segdófón honohen lu. Bong dê he dumuhen gel nmò le lómón ni kem ni. Bud nulitu bélê ye yóm deng tehe eles tulónu kuy. Yó kem tau gel mò du ni kem ni, là kô le na a gmung bè yóm tau nogot Dwata. ²² Okóm ke tendo tekuy halak bè Tulus Dwata, wen bunguhen. Yó bunguhen, duhen yóm kesebong nawa, ne yóm kligal, ne yóm kenek nawa, ne yóm kanay nawa, ne yóm kganag nawa, ne yóm keheyu kmò, ne yóm keteneb nawa, ²³ ne yóm khulung heglaan, ne kehulung mafas nawa. Ke deng gotu glolò tekuy ni kem ni, laen kô dù gulé tekuy du yó kem hlau Musis. ²⁴ Yó kem tau deng nfun Krays Jisas, gotu kenbê le mò du yóm kdê sidek knóyô lówó tau. ²⁵ Deng wen ne yóm lomi klowil blayen tekuy yóm Tulus Dwata. Yake du dé yóm hol malak tekuy. ²⁶ Hol béen tlek wen heton salù, ne bê tekuy abay gel kemlit kem dumu tekuy, ne hol bê tekuy abay sélés nawa.