¹ Tey ye bakà, kem tau bè Glasya. Tau du de yóm deng gónó ye tawan? Igò me deng tehe hegtukul du bélê ye muhen yóm katay Jisas Krays bè kros. ² Tulón ye do kun. Yó kô gónó Dwata bemlay du kuy yóm Tulusen lanen sekel klolò ye du yóm hlau Musis? Là kô yó du. Kaem yó dé gónó Dwata bemlay du kuy yóm Tulusen lemwót bè yóm deng kungol ye du yóm Tulón Heyu ne bè yóm deng kehetahu ye du. ³ Bê ye mom hbakà dé. Yóm kebut kehetahu ye, tódô lemwót bè yóm Tulus Dwata. Okóm ni, ofo kuy mon du kô ke gbek ye hemdeng du lemwót bè yóm kuy kegebek? Là kô gbek ye du. ⁴ Yóm kdê deng gel glan ye lemwót bè yóm deng kehetahu ye, laen dù bud muhen bélê ye ne kô? Kaem wen. ⁵ Deng tehe sù Dwata bélê ye yóm Tulusen, ne wen se yó kem hentaw ton gel nemoen lem blóng ye. Bè yóm kmoen du bélê ye ni kem ni, lemwót bè yóm klolò ye du yóm hlau kô? Là kô yó du. Kaem yó dé gónón lemwót bè yóm deng kungol ye du yóm Tulón Hyu ne yóm deng kehetahu ye du. ⁶ Senged se ke Abraham ekni, monen bè Sulat Dwata, monen, “Tódô hentahu Abraham yóm fasad Dwata du, ne lemwót bè yóm kehetahuhen yó gónón tedeng keton Dwata du.” a ⁷ Yó gónóm mon, yó kem tau hemtahu, lómón ke lu yóm hol semfu gu bè Abraham. ⁸ Deng tehe eles tulón Dwata bè Sulaten teganay yóm angat ktedeng ketonen kul yó kem tau là Ju le lemwót bè yóm kehetahu le béléen. Deng tehe tulón Dwata ke Abraham se yóm Tulón Heyu yó, yó monen, “Helanu béléem yóm angat któbóngu yóm kdéen tau bè klamangen benwu.” b ⁹ Ne tahu se, hentahu Abraham yóm tulón Dwata du yó, ne tey któbóng Dwata du lemwót bè yóm kehetahuhen. Dalang se nim kmoen ni, yóm kedéen tau hemtahu, tey któbóng Dwata kul lómón se yóm tehe ketóbóngen ke Abraham. ¹⁰ Bong yó kem tau tô smalig yóm klolò le yóm hlau Musis, angat tey ktafak Dwata kul. Abay se deng monen bè Sulat Dwata, monen, “Angat tnafak Dwata yóm tau ke là gotu loloen du yóm kdê deng snulat bè yó kem hlau Musis.” c ¹¹ Deng hónô tengón tekuy, balù sotu bè yó kem tau lemolò yóm hlau Musis ke tedeng kton Dwata kul, abay se deng monen bè Sulat Dwata, monen, “Tek sotu gónón tedeng kton Dwata du yóm tau, són bè kehetahuhen. Bud bè yó snéen gónón gmuta du yóm klowil laen dù sónen.” d ¹² Là kô bè kehetahu du yóm klolò tau du yóm hlau Musis. Lómón se yóm monen bè Sulat Dwata, “Song gutahen yóm klowil laen dù sónen yóm tau, ke tódô gotu loloen kdéen nô lem yóm hlau Musis.” e ¹³ Okóm laen kô dù tau gembek lemolò du nim ni. Yó gónóm mon, deng tekuy mom megtafak du. Okóm ke Krays, du fen megtafak lanen msok tekuy bè yóm deng kegetafak tekuy yó. Abay se deng monen bè Sulat Dwata, yó monen, “Ke wen tau matay bè kros, yó se ilô yóm ketafak Dwata du.” ¹⁴ Yó gónó Krays mesok tekuy gu lem hatay mò gónón dohò yóm tehe fasad Dwata ke Abraham bè yóm khomong któbóngen yóm kdéen tau là Ju le. Yó gónóm mon, lemwót bè yóm kehetahu tekuy bè Krays gónó Dwata ¹⁵ Ó kem dumuhu setwoli, wen tulónu kuy lemwót bè yóm sana gel nemò tekuy. Ke hol heget tekuy yóm senfasad tekuy, sal gel wen gónó tekuy fema. Ne yóm senfasad deng fenma laen kô dù tau bud gembek mekó du ne temnù du. ¹⁶ Bè yóm tehe fasad Dwata ke Abraham ne bè yóm sotu semfu gu béléen, là kô monen du ke fasaden bè yó kem dumu semfu gu bè Abraham. Okóm monen bè yóm sotu semfu gu bè Abraham, duhen Krays. ¹⁷ Yó hol lemen yóm monu. Yóm deng tehe fasad Dwata ke Abraham là kô bud nilihen du. Là kô yó du tles Dwata du yóm hlau tehe hesulaten ke Musis bè yóm fat latu bud tlu folò halay kogol yóm kfasaden du yó. Là kô gebeken du yóm hlau snulat Musis ke tô genbaen yóm deng fasad Dwata. ¹⁸ Ke mlan bè klolò tekuy yóm hlau Musis gónó tekuy gmuta du yóm fasad Dwata laen kô dù muhen yóm fasad yó. Okóm deng eles gegna ne kfasad Dwata du ke Abraham yóm fasaden tekuy yó. Là kóen na a mlan bè klolò tekuy yóm hlau Musis. ¹⁹ Duhen yó, ke lómón yó se kmoen tedu se muhen yóm kehesulaten du ke Musis yóm hlau? Yó muhen mò hdilô du bè yó kem tau yóm salà le. Wen mu Dwata du efet yóm kedaw kkól yóm tau monen semfu gu bè Abraham, yóm tau gónó Dwata e mon du yóm tehe fasaden yó. Bè yóm tehe keblay Dwata du ke Musis yóm hlau, wen hógówen gu bè longit mò blóngen ebè Musis. Bong ke Musis kun, mò fen blóngen ebè kem tau. ²⁰ Okóm yóm tehe keblay Dwata du ke Abraham yóm fasaden, laen kô dù blóngen ebélê le. Tódô du mudél ebè Abraham. ²¹ 1 Déke ofo kuy mon du là segemung le hlau Musis yóm fasad Dwata. Là kô yó du. Ke gbek yóm hlau bemlay tekuy yóm klowil laen dù sónen, deng duhen yó ne yóm lan tekuy baling tedeng bè kton Dwata tekuy. Okóm là kô yó du. ²² Deng monen bè Sulat Dwata, tódô kedéen tau bè klamangen benwu, gotu le gmung bè yóm óyô le mò sidek. Yó gónóm mon, tek sotu gónó tekuy gmuta du yóm klowil tehe fasad Dwata tekuy, són bè kehetahu tekuy bè Jisas Krays. ²³ Gu laan tekuy là deng hemtahu he, hol lómón ke bnangguen tekuy yóm hlau. Là kô tekuy gewà du efet deng tengón tekuy yóm lan tekuy hemtahu bè Krays. ²⁴ Sotuhen, hol lómón ke tau munung ngà yóm hlau yó. Yó se hlun gónó tekuy galak efet kól bè yóm kedaw ksut Krays te tonok. Timbow kól, du ne tles gónó tekuy galak. Lemwót bè kehetahu tekuy béléen, yó se gónón tedeng keton Dwata tekuy. ²⁵ Là bud tekuy galak du ne yóm hlau, abay se deng sut yóm gónó tekuy hemtahu, duhen Krays. ²⁶ Lemwót bè yóm kehetahu ye, deng ye gotu baling ngà Dwata ne, ne deng ye sesotu bè Krays Jisas. ²⁷ Deng ye hebabtays mò ilô yóm kesesotu ye bè Krays, deng glolò ye ne yóm kun kmò Krays. ²⁸ Duhen yó, laen kô dù gónó ye stólóng kem tau hemtahu bè Krays, tau Ju duhen tau là Ju le, tau klifen duhen tau là klifenen, logi duhen libun. Tódô gotu senged yóm kdê ye lemwót bè yóm deng kessotu ye bè Krays Jisas. ²⁹ Ke deng nfunen yu Krays, henged ye deng semfu gu bè Abraham ne, ne wen se kuy du yóm tehe fasad Dwata du ekni.