¹ Timbow deng sfolò fat halayen bè yó, ominu yó bud mógów ebè Jirusalim. Slomong me Barnabas, mung kum Taytus snéen. ² Yó gónóhu mógów lan Dwata hegefan béléu. Yóm kkól me ditu, gotu le stifun yó kem tau malak yó kem tau hemtahu bè yó, laen kô dù dumu tau gbool bélê me, són mi. Yó hol tulónu kul, duhen yóm Tulón Hyu gel hetengónu lem blóng yó kem tau là Ju le. Yó gónóhu mò du yóm yó, abay se là móyóe du ke laen dù gónón e kól yóm deng tehe nmou dalang se yóm tolo nemou ni kmoen ni. ³ Ne tahu se, gotu senkotuk le. Ngem yó dém Taytus, yóm ngà Grik dumuhu, là kô nubug tnulì le du yó kem Ju. ⁴ Okóm wen se móyô mò du. Lu se yó kem tau sut hlingu le tau hemtahu anì hnungol le yóm mò kmò me du ke wen tau là Ju le hemtahu bè Krays Jisas. Yó kóyô le ke hlolò me yó kem tau là Ju le yóm kum hlau kem tau Ju. ⁵ Okóm balù udì ke dog bninguy me yóm kul tulón. Yó hol nalu me ke béen wen bud tnù le du yóm ketahuhen deng tulón me kuy, duhen yóm Tulón Heyu gbak ebè Jisas. ⁶ Timbow gungol yó kem tau gel malak bè yó, bà udì ke wen tenù le du. Uma kóm yó kem tau yó, laen kô dù gónón stólóng béléu ke tau malak duhen ke là, abay se yóm Dwata, là kenukumen du yóm olon gfan ta. ⁷ Bè ktahuhen, tódô dilô le yóm deng kélék Dwata dou mò fen tmolok yóm Tulón Heyu bè yó kem tau là Ju le, hol lómón se yóm deng kéléken ke Pitér mò fen tmolok bè yó kem tau Ju. ⁸ Yakà tódóen lemwót bè kefasang yóm Dwata kehógówen dou ebè yó kem tau là Ju le, hol lómón yóm kehógówen ke Pitér ebè yó kem tau Ju. ⁹ Yó kem tau fen gel malak bè yó, le Jim ne Pitér ne Jan, dilô le se kul yóm deng kwen sigang Dwata tahu. Omin le mkem lem hólól me lewu me Barnabas mò ilô yóm deng kessotu me bè yóm kmò me nemò bè Krays. Ne deng gotu senkotuk me snéen yóm kehelós me tmolok lem blóng yó kem là Ju le lewu me Barnabas, ne lu se fen tmolok lem blóng yó kem Ju. ¹⁰ Tek sotu tinok le kum, són yóm gel keblay bè yó kem tau élél hemtahu lem blóng le bè yó bè Jirusalim. Ne yó se sotu alì gel nô bè nawahu senéen dou. ¹¹ Sotu kedaw bè yó bè yóm kekól Pitér bè syudad Antyok, tey kudélu du lem blóng yó kem tau, abay se là kóen heyu yóm nmoen. ¹² Bè yóm tanay kekólen bè yó, tódô segeduf meken bè yó kem tau là Ju le. Timbow sut yó kem tau Ju hógów Jim, helós là dogen bud hegbool meken bélê le Pitér yó kem tau là Ju le, abay se likò yó kem kun dumu Ju alì megenek klolò le du yó kem hlau Musis. ¹³ Botong le gebót likò bè Pitér yó kem dumu Ju deng hemtahu gbót mken. Balù Barnabas, botong gbót se kun bè yóm kul klikò yó. ¹⁴ Timbow tonu yóm là bud klolò le du yóm ketahuhen lemwót bè yóm Tulón Hyu, yó gónóhu tódô mon du mò ke Wè Pitér lem blóng yó kem tau, monu, “Tauhi Ju se kóm, Wè, okóm bè yóm kenóem bè ni, kéng tô là Juhi, deng nemungem yóm kul adat yó kem tau là Juhen. Ke yó se nmoem, tô kmò keheloloem du kul du yó kem tau là Juhen yóm hlau tekuy kem Ju?” ¹⁵ Bè ketahuhen, kesfu me Ju se kum. Là kô me semfu gu bè yó kem tau là Ju le, yóm gel bnoluy me, “tau gemsalà” lemwót bè yóm là ketengón le du yóm hlau Musis. ¹⁶ Okóm deng tengón me ne, tek sotu gónón tedeng kton Dwata du yóm tau, tek són bè kehetahuhen bè Jisas Krays. Là kóen lemwót bè yóm kloloen du yóm hlau Musis yó. Yó gónó me hemtahu bè Krays Jisas se kum kem Ju anì tedeng keton Dwata kum lemwót bè kehetahu me béléen. Là se kóen lemwót bè yóm klolò me du yó kem hlau Musis, abay se laen kô deng tau he ke tedeng kton Dwata du lemwót bè kloloen yó kem hlau. ¹⁷ Duhen yó, yó dé hol nalu me ke tedeng keton Dwata kum lemwót bè yóm kesesotu me bè Krays, déke yó mon kem dumu tau, deng me baling tau gemsalà se kum, deng me mekél bè yó kem tau là Ju le, abay se là bud gel lolò me du yó kem hlau Musis kun. Ke tahu se yóm mon le yó, deng Krays dilóu mit kum mò salà, abay se deng du tles lolò me. Là kô yó du. ¹⁸ Ke tô bud lolou yóm hlau tehe tebelu, mom bè yó ne gónón gefan yóm kuléhu du, abay se là kô gbeku lemolò du. ¹⁹ Bong bè yó dum hlau yó, olohen mom mit dou elem hatay lanu gmulé du. Yó gónóhu tódô tmebel du anì glolou Dwata. Ne lemwót bè yóm deng kehetahuhu bè Krays, hol lómón ke denge gomong matay béléen bè kros. ²⁰ Yó gónóm mon, là kô ou du ne nim mowil ni, Yakem Krays, yóm nô béléu. Són yóm kehetahuhu tendo gunon no nawahu abay se tey kebong nawan dou, gloken fen hamà béléu yóm kun klowil. ²¹ Bede ke deng tedeng se kton Dwata du yóm tau bè kloloen yó kem hlau genan, laen kô dù muhen yóm katay Krays. Okóm béléu dou, tey bong któbóng Dwata dou hlanen bè yóm katay Krays.