¹ Timbow me deng gotu nô te kbu, wen tau tmulón du kum, Marta kun boluy yóm hungul yó. ² Tey khódó le kum yó kem tau menwu bè yó. Kendel le hbong bélê me ofi mò gónó me mnalang, bà mon tey tnaw, lel kulón. ³ Yó nmò Pol, gbót ma koyu. Timbow suen lem ofi yó kem koyu nwahen, wen tey ulal tódô hewà gu lemen lemwót bè yóm kkinien. Tódô téwéng bè tdok Pol. ⁴ Timbow ton yó kem tau menwu bè yó yóm kékéten ke Pol yóm ulal yó, stulón le, mon le, “Déke tehe wen dô hnatayen tau ni. Kun bagì là matayen lem mohin, okóm ni là hewuhem du.” ⁵ Okóm tódô hilik Pol yóm ulal yó, ne bkas elem ofi, ne là se kô gnóm Pol du teduken. ⁶ Sónmò yó kem tau mangat kboloken, duhen ke tódô mugod matay bè yó. Tey kegen le mangat du, okóm laen dù hemenen. Bud nili le kehedem le du, hendem le kô du se yóm sotu dwata. ⁷ Yóm tau mogot du yóm benwu yó, boluyen Publiyus. Moni bè yóm gónó me nô bè yó yóm kun tonok. Tey tilob khódóhen kum, hyu tinoken mi ebè gónóen. Tlu kdaw me nô bè yó bè gónóen. ⁸ Bede yóm mà Publiyus, wen desen, kinì ne mkê litô. Glok Pol na a mógów ebéléen, ne mni béléen bè Dwata, ne nenoken. Tódô mkó se yóm desen. ⁹ Timbow tngón yó kem dumu tau yóm nmò Pol yó, tódô le gotu sludus ebéléen yó kem tau gemnóm des lemwót bè klamangen yóm benwu yó. Ne tódô gotu hkó Pol se yó kem tenduk le. ¹⁰ Tey dê tódô blay le kum yó kem tau bè yó. Bè yóm bud kewót me bè yó, tey wen blay le kum yó kem wen mu me du bè yóm bud kógów me. ¹¹ Song medo me bè Marta, deng tlu bulón me. Smakay me bè yóm owong boluyen Dwata Héng, sotu owong lemwót bè syudad Aliksandriya. Yó nmoen bè yó, nen hendeng yó kem bulónen sidek kdaw. ¹² Timbow me lemwót bè yó bè Marta, semnuk me bè syudad Sirakus. Tlu kdaw me na nô bè yó. ¹³ Bud kewót me bè yó, song me bud semnuk bè syudad Ridyum. Hayahen bè yó, tey tilob lenos temodol kum. Lewu kdaw me te mohin, gfet me bè benwu Putyuli, ne bè yó kum gónó kmó. ¹⁴ Ne wen tau hemtahu ton me bè yó, na le nali mi anì nô me bélê le sotu fedyan. Tahu se, timbow sotu fedyan me bélê le, omin me hlós ebè Rom. ¹⁵ Bè yóm kógów me yó, deng sana gungol le mi yó kem tau hemtahu bè Rom, glok le na a semlong kum bè fedyan Apiyus, ne bè yóm mon le Tlu Gónô Mefet. Tey mgel nawa Pol bè yóm ktonen kul, ne tey kdóyónen ke Dwata. ¹⁶ Bè yóm kegdek me bè Rom, là bnanggù le ke Pol, olon mdengen gónô gónó le hemnô du ne wen sendalù mentey du. ¹⁷ Timbow deng tlu kdaw me bè yó, gotu tinok Pol yó kem Ju gel malak yó kem dumu le Ju bè Rom. Tikóng le gotu sbung, mon Pol mò kul, “Kem dou dumu tau Israél, balù yóm klaen dù salau bè yó kem dumu tekuy Ju, ne là se kô glafangu du yó kem adat lemwót bè yó kem tehe fù tekuy, tódô bnanggù le ou bè Jirusalim, tódô eted le o elem tdok yó kem tau Rom. ¹⁸ Timbow snólók le ou yó kem tau Rom mogot kukum, laen se kô dù salà ton le béléu ke bang gónóhu tô matay. Tô le móyô ke hewà le ou. ¹⁹ Okóm timbow kat dmendel yó kem dumu tekuy Ju, yó gónóhu hkukum ke Sisar, abay se laen dù bud gmou. Bede laen dù gónóhu tmifù kul yó kem dou dumu Ju. ²⁰ Ni se gónóhu tminok kuy ni,” mon Pol, “anì hol tulónu kuy yóm ni. Bè ktahuhen, yó gónó le kemdina do lanu alì kemgel nawa yóm tau hendón nefet nawa yó kem tau Israél.” ²¹ Ne bnalà le Pol, mon le, “Laen kô deng sulat lemwót gu bè Judiya he ke wen tulón le gdek ebéléem. Ne laen se dù kem dumu me Ju lemwót bè yó ke wen sidek tulón le gdek ebéléem. ²² Okóm móyô me hmungol du yóm kóm tulón, abay se tngón me se tey dê tau semkbê du yóm kóm gónó hemtahu.” ²³ Tahu se, na le na bnuteng yóm bud kesebung le ebè Pol. Timbow hto yóm buteng le yó, ya tey kwen le bud sbung ebè yóm gónô gónó Pol nô. Tódô sendaw le nô bè yó lemwót hlafus kól kifu. Gotu tulón Pol kul yóm kmò kogot Dwata tau. Ne gel wen nwahen lemwót bè yóm hlau Musis, ne wen se gel nwahen bè udél yó kem gna tugod Dwata teganay mò gónón heglileb du bélê le yóm tulónen gdek ebè Jisas. ²⁴ Wen se bélê le hemtahu du yóm tulónen, ne wen se là. ²⁵ Bè yóm kewót le bè yó, là ssotuhen kehedem le lemwót bè yóm sotu bud tulón Pol kul, yóm monen, “Bong tahu se yóm tehe udél yóm Tulus Dwata ebè yó kem tehe fù tekuy teganay, hlanen bè Isaya, yóm sotu tehe gna tugoden. ²⁶ Yó monen, ‘Lemwóti ne, nam e tulón yó kem tau, monem mò kul, anien he ke gungol ye, là kô glileb ye du. Anien he ke ton ye, là kô dilô ye du. ²⁷ Abay se ni kem tau ni, là móyô le dmalang. Deng mom nseng le klingu le. Deng le mom hidong. Ke bê le nmò yóm yó, dilô le yóm gel ton le, ne tengon le lanen yóm gel gungol le, ngangen ne efet le semfulék ebéléu, mon Dwata, ne gotu le baling bud hyu.’ ²⁸ Ne bud mon Pol, “Duhen yó, hyu ke eles tngón ye deng hetngón Dwata bè yó kem tau là Ju le yóm lan le gewà gu lem hatay. Mom lu hmungol du.” ²⁹ Kogol yóm mon Pol ni, omin le tódô gotu lemwót yó kem Ju, ya tey keskaf le mon són lu lemwót bè yóm ktolok Pol. ³⁰ Lewu halay Pol nô bè yóm gónô gónóhen nô, okóm gel bnayaden yóm knóen bè yó. Tey gel khódóhen yó kem tau mauy du. ³¹ Sal gel tulónen kul yóm kmò kogot Dwata tau, ne gel tulónen yóm gdek ebè Jisas Krays yóm gónó tekuy mogot. Bè yóm gel ktulónen du, laen kô dù klikoen, ne laen se dù tau tô hemseng du.