¹ Timbow deng gefet bè yóm kdaw kehwit le kum ebè benwu Itali, wen sotu tau Rom boluyen Julyus fen mogot ke Pol ne yó kem dumu tau blanggù homong hwit le. Nim Julyus ni, kfitan bè yóm sotu lumbuk sendalù Rom boluyen “Kem Sendalù Sisar.” ² Motun me te owong bè yó bè Seseriya, yóm sotu owong lemwót bè syudad Adramityum. Nim owong snakay me ni, wen gónón ne slob bè yó kem syudad nô bè kili mohin snakuf Asya. Mung kum Aristarkus, tau Masdunya lemwót bè syudad Tisalunika. ³ Deng hayahen bè yó, dmuung me bè yóm sotu syudad boluyen Sidon. Tey hyu nawahen ebè Pol yóm kfitan Julyus, tódô bayaen yóm nen keslob bè yó kem dumuhen hemtahu bè yó anì wen tóbóng le du yóm wen muhen du. ⁴ Timbow me bud lemwót bè yó, wen tey lenos semlong kum. Yó gónó me hemilo yóm hungul te mohin boluyen Siprus anì wen gónó me geklung bè yóm tey lenos. ⁵ Yó lan me mówóng, mius me bè prubinsya Silisya ne bè prubinsya Pamfilya, ne na me dmuung bè Mira, yóm sotu syudad snakuf Lisya. ⁶ Timbow ton yóm kfitan mentey kum yóm sotu owong lemwót bè syudad Aliksandriya mógów ebè Itali, yó nmò me bud me mili edu. ⁷ Timbow me lemwót bè yó, tey ganag yóm owong snakay me, bà mon tey lenos te mohin. Tey deng dê ne kdaw me, omin me mius bè yóm benwu boluyen Snidus. Tódô tô henkteng me yóm lan me yó, okóm là gbek me du. Yó gónó me heklung bè yóm sotu hungul udì te mohin boluyen Krit. Ngangen ne mius me bè yóm benwu boluyen Salmun. ⁸ Yóm kógów me yó, tódô me kem mówóng hmilol kili, bede tey mgel kógów me. Ngangen ne gefet me bè yóm sotu ngà benwu gónó le gel dmuung bè yó bè Krit, yóm boluyen Lusuk Menek. Nim gónó me dmuung ni, là mayuken bè yóm sotu benwu boluyen Lasya. ⁹ Lemwót bè yóm tey kganag kógów me yó koni, deng mem gafiten mi yóm tey ksidek kdaw, là buden hyu ke hlós yóm owong. Ne mon Pol mò ku, monen, ¹⁰ “Ó kem dumuhu, tódô tengónu ke hlós tekuy ni, enget gbà nim owong tekuy ne enget gotu betang yó kem lulónen, ne déke wen matay bélê tekuy.” ¹¹ Okóm là dog hnungolen ke Pol yóm kfitan mentey ku. Mem yó hnungolen yóm tau mit owong ne yóm tau funen. ¹² Yóm lusuk gónó me dmuung yó, là hyuhen ke geslà bè yó yóm bulónen tey sidek kdaw. Kat mlom óyô le hlós ebè Finik mò gónó le nô bè yóm bulónen sidek kdaw, abay se yóm Finik, sotu lusuk bè Krit malù geklung bè lenos, abay se smolu e desdef. ¹³ Timbow mbel fi bè iwóng me yóm lenos hyu, omin le tnana tô lemwót ebè Finik, ofo ku ke géhél le gefet bè yó. Omin le kemteng eta yóm blangawen, ne tódô le mówóng hmilol Krit. ¹⁴ Okóm là legenen bè yó, deng na a mbel gu lem bulul yóm tey lenos bong. ¹⁵ Timbow glumfak bélê me yóm tey lenos yó, là kóen bud tedeng ne kógów yóm owong. Tódô bayà yó kem tau mit du anì tódô gmung bè lenos. ¹⁶ Bè yóm kiwes me bè Kawda, yóm sotu hungul udì te mohin fi bè kwanan me, malù me geklung bè lenos. Ya tey keglayam me semketeng du eta owong yóm ówóng udì. ¹⁷ Ne wen tébéd hget bkes le bè lówó yóm kafal bong snéen. Yó knikò le, kô gemlan bè gónón là ngelem bè kili yóm benwu fi bè iwóng me boluyen Libya, déke gebeng le lem yóm helek bè yó, ngem kà gbaen yóm owong. Yó gónó le gotu mkó yóm layal yóm owong, tódô bayà le ne yóm kafal anì tódô mung bè lenos. ¹⁸ Yóm tey lenos bong yó, bà udì ke dog teflok. Timbow hayahen bè yó, nbut le ne gotu tmudà yó kem lulón le elem mohin. ¹⁹ Ne bud hayahen bè yó, gotu tudà le elem mohin yó kem ngom owong. ²⁰ Tey dê kdawen là kô me mton kdaw, balù kinab blotik là kô ton me du. Tódô senflósen yóm tey lenos bong. Là kô bud hendem me du ne ke bud me lemowil. ²¹ Ya ni du kem tau mit du, là kô getngón le du mken. Mdà lem blóng le Pol, monen, “Ó kem dumuhu, ke tehe nimón ye yóm monu, là kô deng gtagak tekuy du he Krit, ne là kô ni du se gefà tekuy, ne là se wen getudà ye elem mohin. ²² Okóm ni,” monen, “hol hnungol ye ou. Hgel ye nawa ye, laen kô dù lana bélê tekuy he yó, balù sotu, olon yóm owong enget gbà. ²³ Yó gónóhu mon du yóm monu ni, abay se ebuteng wen hógówen ebéléu gu bè longit yóm Dwata mfun dou, yóm tendo nimónu. ²⁴ Yó monen mò dou, monen, ‘Béi hlikò, Pol, nem na gemdà bè solu Sisar he. Lemwót bè yóm kkodu Dwata kóm, tódô gomong lemowil béléem yó kem dumuhem nô lem owong ni.’ ²⁵ Yó ne, kem dumuhu,” mon Pol, “hgel ye nawa ye. Tódô snaligu yóm deng tulón Dwata dou. ²⁶ Okóm,” monen, “enget wen hungul te mohin gónón e dmungkul tekuy yóm lenos ni.” ²⁷ Botong sfolò fat butengen kegenen tendo mówóng kum lenos bè yóm mohin boluyen Miditiranyan. Hol btang sóól buteng se bè yóm gesfoloen fat buteng, tódô gnóm yó kem tau mit owong yóm deng kloni me bè benwu. ²⁸ Gloken wen blat hloyol le elem él mò gónó le bemtes du yóm kenelemen. Tanay kebtes le du, lewu folò difuhen elaan. Legen udì bè yó, bud bentes le, ne yó kngelemen olon sfolò limu difu. ²⁹ Yó tenafa nawa yó kem tau mit owong, kô glaf bè hagang yóm owong. Yó nmò le, hloyol le fat blangaw bè sekéen anì là gógówen elem botu bè kili mohin yóm owong. Ya tey kehdón le du ke olò géhél mwas. ³⁰ Yó kem tau mit owong, tô tilów le mebel lan le hewà. Yó nmò le, hloyol le elaan yóm ówóng udì ne hningón tô hloyol le bè kulu owong yóm dumu blangawen, ne hlós lan le tô hewà. ³¹ Okóm mon Pol mò yóm kfitan ne yó kem sendaluhen, monen, “Ke tô le hewà yó kem tau mit owong, laen kô na a mowil bélê ye.” ³² Tahu se, gotu kenleng yó kem sendalù yóm tébéd fét yóm ówóng udì ne hebtang le lem mohin. ³³ Timbów deng móyónen mwas bè yó, nubug Pol yó kem tau anì mken le, monen mò kul, “Deng sfolò fat butengen ni ne kegen ye hembala du yóm gfà tekuy ni, ne là dog getngón ye du olò mken. ³⁴ Olò ye na mken dé anì mgel ye. Laen kô tau angat lana bélê tekuy, balù sotu.” ³⁵ Timbow deng kudél Pol, nwahen yóm tnafay ne nen mni bè Dwata bè yó lem blóng le. Deng kekbéngen du, ominen mken. ³⁶ Timbow ton yó kem dumu tau, ominen yó malù mgel nawa le, ne gbót le mken se kul. ³⁷ Yó kde me nô lem yóm owong yó, lewu latu bud hitu folò nem kdê me. ³⁸ Timbow deng kken le, omin le gotu tmudà du elem mohin yóm halay lulón le anì malù maan yóm owong. ³⁹ Timbow deng mwas bè yó, mton le benwu ne yó kem tau mit owong, okóm là dilô le du. Ton le wen lusuken, ne tey hyu helek bè kililen. Ne yó hendem yó kem tau mit owong ke tódô bè yó bè yóm lemsokoken yó gónó le tmilów htengen du yóm owong. ⁴⁰ Gotu kenleng le fét yó kem blangawen, tódô hebtang le elem mohin. Ne ntó le snéen yó kem fét yó kem kwa gel semtódô kógów yóm owong. Ne omin le heketeng eta yóm layal bè kulu yóm owong anì tedeng kwiten du ebè yóm lemsokoken yóm lenos. Ne tahu se, hlós me ebè kililen. ⁴¹ Okóm deng mom gtengen lem helek kulu yóm owong bè yóm gónón là nelem mohin, tódô gotu gbà sekê yóm owong bè yóm tey lewók yó. ⁴² Yó tô atul yó kem sendalù, tô gotu hnatay le yó kem tau bnanggù nwit le anì là kmohung le ebè kilil yóm benwu tô nefet le, déke mo le mom mlóy. ⁴³ Okóm là móyóen yóm kfitan ke matay Pol, yó gónón mólów kul, ne monen mò yó kem tau, “Kdê yó kem hulung kmohung, gna ye kmohung ebè kilil ne kuy.” ⁴⁴ Tahu se, gotu le kmó. Ominen gotu hekmó yó kem là hulungen kmohung. Són yó lowil le kul, són yó kem sufà kfal lemkà bè yóm owong. Gotu me se gefet ete kembu, laen se dù lana bélê me.