¹ Kogol yóm gotu kesbal me, ominen lemwót yóm kafal snakay me, tódô me hekteng ebè Kos, yóm sotu hungul te mohin. Hayahen bè yó, gefet me bè Rudis, bud sotu hungul te mohin. Timbow me lemwót bè yó, bud me hlós ebè Patara. Bè yó gónó me kmó. ² Ne bud wen kafal ton me mógów ebè prubinsya Funisya, ne yó gónó me bud smakay. ³ Tódô me hlós efet ton me Siprus fi bè iwóng me, yóm sotu hungul te mohin, okóm tódô hekteng yóm kafal snakay me ebè prubinsya Sirya, ne kmó me bè yó bè syudad Tayal. Bè yó gónó le hekmó yó kem lulónen yóm kafal yó. ⁴ Wen yó kem tau hemtahu bè Jisas ton me bè yó, ne hitu kdaw me nô bélê le. Mlan bè kun kfasang yóm Tulus Dwata, yó gónó le mon du mò ke Pol, “Hol béi abay mógów ebè Jirusalim.” ⁵ Okóm timbow deng hto yóm buteng me lemwót, tódô me bud lemwót. Glok le gotu mung kum ebè kilil mohin yó kem tau hemtahu bè yó, balù yó kem tuha libun le ne yó kem ngà le. Ne gotu me mtud bukol bè kilil mohin, mni me bè Dwata. ⁶ Timbow deng kni me, omin me gotu sbal lemwót, ne bud me motun elem kafal, mulék le se kul. ⁷ Ominen lemwót bè yó bè Tayal yóm owong snakay me, hlós ebè Tulimas. Bud me na ston yó kem dumu me hemtahu bè yó. Tek suloy me bélê le. ⁸ Timbow hayahen bè yó, bud me lemwót, ngangen semnuk me bè syudad Seseriya, bè yó hlós gónó me kmó. Mefet me bè Filip, yóm sotu tau gel tmolok bè kem dumu benwu. Du se sotu bè yó kem hitu tehe nélék le bè Jirusalim mò gel tmóbóng yó kem dumu tau hemtahu. ⁹ Wen fat ngaen sawang libun nim Filip ni, wen khulung le tmugod ke Dwata se kul. ¹⁰ Timbow me deng legen udì bè yó, gdek se yóm sotu tau tugod Dwata boluyen Agabus lemwót bè prubinsya Judiya. ¹¹ Mógów ebélê me, ne tódô nwahen yóm hilet Pol, gotu lébéden gu bè tihen ne bè sigelen. Yó udélen, monen, “Ni se udél yóm Tulus Dwata, monen, lómón ni se angat nmò le béléen yó kem dumuhen Ju bè Jirusalim, yóm fun nim hilet ni, ne angat eted le elem tdok yó kem tau là Ju le.” ¹² Timbow gungol me yóm yó, yó gónó me gotu tô semtulon ke Pol yóm kógówen ebè Jirusalim. ¹³ Okóm mom mon Pol, “Moen de ke mkik ye? Ten geed ye hemblat nawahu nim nmò ye ni. Balù kihu nmò le béléu ditu bè Jirusalim, kihu ke nfét le ou duhen ke hnatay le ou, syan ke lolou yóm kun kóyô Jisas.” ¹⁴ Timbow là gbólów me du, tódô bayà me, olo me mon du mò du, “Dwata he mò du béléem yóm kun kóyô.” ¹⁵ Timbow me bud legen udì bè yó, omin me gotu htifes ne lemwót me subô ebè Jirusalim. ¹⁶ Wen se kem tau hemtahu lemwót bè yó bè Seseriya mung kum, nwit le mi ebè gónô Mnasun, yóm tau lemwót bè Siprus. Bè yó bélê le gónó me nô. Du se sotu tau hemtahu lemwót bè kbuten. ¹⁷ Yóm kgefet me bè Jirusalim, tey khódó le kum yó kem tau hemtahu bè yó. ¹⁸ Hayahen bè yó, mung kum Pol nen e stulón ke Jim. Gotu le nô bè yó snéen yó kem dumu tuha gel malak yó kem tau hemtahu bè yó. ¹⁹ Deng kesfódó le, gotu tulón Pol kul se yóm deng nmò Dwata bè yó kem tau là Ju le lemwót bè yóm ktoloken lem blóng le yó. ²⁰ Tey kdóyón le ke Dwata bè yóm kungol le du yóm tulón Pol kul. Ominen wen se kul tulón ke Pol, mon le, “Deng tódô kem tngónem ne kóó yóm deng tey hilu libu tau Ju deng hemtahu bè Jisas, okóm tolo tey mget klolò le du yóm hlau Musis. ²¹ Deng wen ne tmulón du bè yó kem Ju hemtahu bè Jisas bè ni bè Jirusalim yóm gel ktolokem bè yó kem Ju menwu lem blóng yó kem tau là Ju le. Yó kun gel monem, bê ye bud lolò ne yó kem hlau Musis ne bud mon le gel tolokem yó kem tau, bê le bud lolò ne yó kem hlau bè ktulì kem ngà ne yó kem dumu adat le. ²² Là galu he ke là deng tngón le du yóm kkólem bè ni. Tedu se tô atul tekuy du nim ni?” mon Jim. ²³ “Yake tódô nmungem yóm mon me ni,” monen. “Wen fat tau bè ni, wen yóm tehe kul fasad bè Dwata. ²⁴ Mungi kul ebè Gónô Dwata, gbóti bélê le bè yóm klolò le du yóm sana hlolò lemwót bè keheyu tekuy. Fen bnayadem bli yóm angat dsù le anì hetebungaw le mò ilô yóm deng kdeng yóm tehe fasad le ke Dwata. Ke ton yó kem tau nim nmoem ni,” mon Jim, “tódô tngón le là tahuhen yóm gel gungol le, abay se ton le yóm kloloem yóm hlau Musis. ²⁵ Okóm bè yó kem tau là Ju le, deng tehe wen sulat hwit me ebélê le mò gónó me tmulón du kul yóm olo hlolò me kul. Yó mon me sok wen ken deng dsù ebè dwata kéng, hol bê le abay ken. Ne yóm litô, bê le abay ken. Dalang se yóm utón ke là deng kó le du litóen, bê le abay ken. Ne hol bê le abay mò samuk.” ²⁶ Tahu se, tódô nmung Pol yóm atul le yó. Hayahen bè yó, nwiten yó kem fat tau, ne lolò le yóm sana hlolò lemwót bè khólós le. Kogolen bè yó, omin Pol husek elem Gónô Dwata, tulónen bè yó yóm kdaw kehdeng le du yóm khólós le, ne yóm kdaw kwen hedsù le ebè Dwata, yóm ket kul na sotu. ²⁷ Deng móyónen hto ne yóm ghituhen kdaw klolò le du yóm kmò khólós le yó, wen kem Ju lemwót bè prubinsya Asya mton ke Pol bè Gónô Dwata. Yó nmò le, senbeweg le yóm kdéen tau bè yó efet tódô senkefô le Pol, hetê le, mon le, ²⁸ “Ó kem dumu me tau Israél, tnóbóng ye mi. Ni se yóm tau tendo tmolok bè yó kem dumu benwu. Yóm toloken yó, hen gnoken tekuy kem tau Israél, dalang se yóm hlau Musis, kekólen bè nim Gónô Dwata nii. Lelen yó he selob yóm Gónô Dwata bè yóm kwiten elemen yóm tau là Juhen. Deng nuléhen yóm hlau bè Gónô Dwata yóm nmoen yó.” ²⁹ (Yó gónó le mon du yóm yó abay se deng tehe ton le bè yóm syudad yó yóm le kmungen ke Pol Trufimus, yóm tau là Juhen lemwót bè Ifisus. Ofo kul mon du ke deng nit Pol husek elem Gónô Dwata.) ³⁰ Bè yóm kesbeweg le yó, gefet bè yó kem dumu tau bè klamangen Jirusalim, omin le gotu mlóy etu. Tódô sensogot le Pol, ne senketeng le ete klósól yóm Gónô Dwata, ne henmung heget le bengen. ³¹ Yó nmò le, tô hnatay le Pol bè yó, okóm kendel gefet bè yóm kmandér yó kem sendalù Rom yóm kwen tau sfatay bè Jirusalim. ³² Ominen kendel htaba yó kem kfitanen ne yó kem sendalù le, tódô le kendel muluk elem blóng yó kem tey tau sbung bè yó. Timbow ton yó kem tau yóm tey sendalù nalak yóm kmandér, omin le yó hemotok yóm kesboug le ke Pol. ³³ Tódô hekteng ebè Pol yóm kmandér ne kenfóen, ne hféten, botong lewu kdina fét le du. Mudél yóm kmandér, monen, “Tau du de ni? Tedu salaen?” ³⁴ Tódô le gotu segeng hetê, okóm là sengeden yóm hentê le. Timbow là medengen kbalà le du yóm kmandér yó, tódô dóken yó kem sendaluhen anì nwit le Pol ebè kamfù le. ³⁵ Hol ndà Pol se yóm gónó maut yóm gónô gónó le e mit du, tódô gotu sendelu yó kem tey tau bè yó. Tódô senkayang kem sendalù eta Pol lem gónô, bà mon se tey dê tau tô semsalu du. ³⁶ Senmò le tendo hetê huli ke Pol yó kem tey tau, mon le, “Hnatay tekuy.” ³⁷ Hol le se deng tô husek elem kamfù yó kem sendalù, mon Pol se mò yóm kmandér, “Hyu kô ke wen tulónu kóm.” “Ne,” mon yóm kmandér, “hulungi udél Grik kô? ³⁸ Là uu du kô yóm tau tehe lemwót bè Idyip, yóm fat libu tau mit suk nalaken ditu lem yóm benwu là hyu menwu du, tô mit sfatay bè gubérnor?” ³⁹ Mon Pol se, “Là ou du. Tauhe Ju dou, lemwóte bè syudad Tarsus, yóm sotu benwu tótól snakuf prubinsya Silisya. Hnihu béléem anì nem ne hudél ou likót bè ni kem tau sbung ni.” ⁴⁰ Tahu se. Mdà ditu ta Pol bè yóm hol són aut, ne hdaen eta sigelen anì là bud le hebenes yó kem tau. Timbow laen dù bud hebnes, ominen mudél ebélê le bè udél Hibru, yóm kul udél, monen.