¹ Bè yóm tolo knô Apulus bè Kurin, lemwót ke Pol tódô hnalaken yóm sotu prubinsya efet kól bè Ifisus. Ne wen kem tau hemtahu gesmangen bè yó. ² Ne snólóken lu, monen, “Deng kól bélê ye kô yóm Tulus Dwata bè yóm deng kehtahu ye?” Mon le se, “Là he. Là deng tngon me du he kum yóm Tulus Dwata monem yó.” ³ Mon Pol mò kul, “Mò kmoen se yóm kehbabtays ye?” Mon le se, “Lómón yó sem tehe kbabtays Jan.” ⁴ Mon Pol se, “Yóm tehe kbabtays Jan mò ilô yóm tau ke deng knogolen yó kem sidek gel nmoen. Okóm sotu gel tulón Jan yó kem tau Israél, ke hol hentahu ye yóm sut huli du, duhen Jisas.” ⁵ Bè yóm kungol le yóm tulón Pol yó, tódô le hbabtays hlan le bè boluy yóm gónó le mogot Jisas. ⁶ Omin Pol mnok kul. Tódô sut bélê le se yóm Tulus Dwata, ne sket le mudél bè yóm udél là deng kul kenhulung du, ne tódô gotu tulón le se yóm deng hetngón Dwata kul.  Wen dô sfolò lewu kwen le. ⁷ Tlu bulón Pol na mung bè yóm gónó le gel stifun yó kem Ju bè yó. ⁸ Là kóen likò bè yóm gel ktoloken kul. Gel niten lu stulón snéen, ne wen hetngonen kul mò gónó le hemtahu du yóm gel ktoloken kul gbak ebè yóm kogot Dwata tau. ⁹ Okóm wen se bélê le mgel kulu le, là kô le móyô hemtahu. Tey sidek kebkó le bè yó lem yóm kul gónó gel stifun yó kem Ju gbak ebè yóm kun kmò klan Jisas. Tódô tnagak Pol lu, niten yó kem tau hemtahu bè Jisas. Kewoten bè yó, ket kdawen nô bè yóm gónô gónóhen gel tmolok yóm sotu tau boluyen Tiranus. Bè yó gónón mit kul stulón yó kem tau. ¹⁰ Botong lewu halay Pol mò du nim ni. Tey kbólen yóm Udél Dwata efet gotu gungol yóm kdéen tau bè klamangen Asya, senged se yó kem tau Ju ne yó kem tau là Ju le. ¹¹ Bè yóm knô Pol bè yó, tey dê hentaw ton gel hmò Dwata hlanen béléen. ¹² Balù yó hem olo mesalahen duhen ke kayaben, ke nit le bè yó kem tau wen des le, kaem tódô mkó se yó kem des le. Balù yó kem tau nalak busaw, tódô gel mdó se yó kem busaw malak kul. ¹³ Wen se kem dumu Ju gel mógów bè yó kem dumu benwu na le e hdó yó kem busaw gel malak yó kem tau. Tô tilów le se kul hdó busaw hlan le bè boluy Jisas. Gel mon le bè yó kem busaw, mon le, “Lemwót bè kun boluy yóm Jisas gel tulón Pol, mdóhi bè yóm tau nalakem yó.” ¹⁴ Wen hitu logi setwoli, ngà yóm sotu tau hol geta gel demsù ebè Dwata boluyen Skiba, tilów tô nmò le se kul yóm hdó busaw. ¹⁵ Okóm mom monen mò kul yóm busaw, monen, “Tngónu Jisas, ne tngónu se Pol, okóm yu, là kô tngónu kuy.” ¹⁶ Ne ominen tódô demlu yó kem hitu logi yó koni, gotu le boug béléen laen kô dù gmò le. Botong le gotu gehewas laen dù nes lem gónô yóm tau nalak busaw yó koni, ne gotu le hnalì, tódô le mlóy. ¹⁷ Tódô kdéen tau bè Ifisus, kem Ju ne kem tau là Ju le, gotu temngón du yóm gfà le yó koni. Ya tey sidek klikò le, ne tendo temnù któtólen yóm boluy Jisas, yóm hol gónó mogot. ¹⁸ Bè yó kem tau hemtahu, tey dê bélê le tódô gotu benkas tulón le bè gónón wen yóm kul gel nmò. ¹⁹ Tey dê tau wen genbek snalig le. Gotu nwit le yó kem bok gel lolò le, ne tódô gotu nlob le lu. Wen dô limu folò libu btesen yóm bok nlob le yó. ²⁰ Ya tey kbólen yóm Udél Dwata, ne dilô kdéen tau yóm tey kfasangen. ²¹ Kogol ni kem ni, yó hendem Pol nen bud mlan tmonok lem prubinsya Masdunya ne Akiya, ominen hlós mulék ebè Jirusalim. Yó monen, “Sok kogolu gu bè Jirusalim, là gbeku du ke là hlóse ebè syudad Rom.” ²² Ne wen lewu tau gel tmóbóng du hegnahen ebè Masdunya, Timuti ne Irastus. Okóm ke Pol, nen ne legen udì bè prubinsya Asya. ²³ Bè yóm kbeyen Pol bè yó bè Ifisus, geslaen yóm tey kehelobo le du yó kem tau bè yó yóm tolok gubak ebè yóm kun kmò klan Jisas, yóm hol gónó mogot. ²⁴ Yó buten, yóm sotu tau gel temwél boluyen Dimitriyus. Yó gel nmoen yóm tau yó, gel temwél yó kem ngà gónô udì skél bè yóm gónô gónó le gel tmaba yóm kul dwata bè yó boluyen Artimis, yóm dwata libun bélê le. Ne tey dê tau mò nmò béléen, ne tey wen gel guta le bè kehbalù le to yóm tenwél le yó. ²⁵ Gotu sentifun Dimitriyus yó kem tau mò nmò béléen ne yó kem dumu tau hulung temwél, monen mò kul, “Ó kem dumuhu logi, tngón ye se yóm kendengen tekuy lemwót bè yóm gel nmò tekuy ni ²⁶ Deng ton ye se, ne deng gungol ye yóm kun nmò yóm tau boluyen Pol. Yó gel monen, yóm dwata lenbù nmò tau, sundu tahu Dwata du. Deng tey dê tau hemtahu du yóm toloken yó, là olon bè ni du bè Ifisus, deng dô lengeben klamang prubinsya Asya. ²⁷ Ke hlós yóm nmò Pol yó,” mon Dimitriyus, “déke angat sidek nawa yó kem tau bè yóm gel nmò tekuy. Yó bong du he, là wen bud mu le du yóm gónô gónó le gel tmaba ebè Artimis, ne kô lana yóm któtólen, igoen du yóm dwata gel tnaba yó kem tau bè klamangen Asya, balù bè klamangen benwu.” ²⁸ Bè yóm kungol le du yóm udél Dimitriyus, ya tey kehelobo yó kem tau, tódô le gotu hetê, mon le, “Tey tótól Artimis, yóm dwata tekuy kem tau bè Ifisus.” ²⁹ Gotu le gbót helobo se kul yó kem dumu tau bè yóm syudad yó, ne gotu le hetê. Tódô senkfô le Gayus ne Aristarkus, yó kem lewu tau mung ke Pol lemwót bè Masdunya. Nit le lu ebè yóm sotu gónô bong gónó le gel stifun skukum. ³⁰ Timbow tngón Pol yóm yó, ominen tô mógów etu bélê le, okóm là hlus le du yó kem dumuhen hemtahu. ³¹ Balù yó kem dumuhen wen glal le bè prubinsya, tminok le ebéléen anì hol béen abay mógów bè yó. ³² Okóm yó kem tau stifun bè yóm gónô bong yó koni, olo le tódô beyen gotu hetê, ne lelen là senged yóm hentê le. Tey dê bélê le, là kô tngón le du buten yóm kestifun le yó. ³³ Ofo kul mon du yó kem dumu ke Aliksandér buten, abay se du dók yó kem Ju mdà lem blóng yó kem tey tau wen bè yó. Yó nmò Aliksandér, hdaen hólólen anì hotok udél yó kem tau, abay se wen tô balaen kul. ³⁴ Bè yóm kton yó kem tau là Ju le yóm ke Ju Aliksandér, tódô le bud gotu hetê. Botong lewu uras le semsulit du yóm mon le, “Tey tótól Artimis, yóm dwata tekuy kem tau bè Ifisus.” ³⁵ Botong mógów elem blóng le yóm sotu tau wen glalen bè yóm syudad yó nen e hnotok lu, monen mò kul, “Ó kem dumuhu bè ni bè Ifisus, tódô tngón kdéen tau yóm kut kesgifà du yóm kun gónô yóm kut dwata Artimis, dalang se yóm botu mtulus btang gu bè longit. ³⁶ Là kô gehkéng tau du nim ni. Boluy se ni du kat henbnes ye ni? Bê ye nmò kut yó du angat gónón huli sel ye. ³⁷ Tódô kem nwit ye edini ni kem lewu tau ni, okóm laen sem dù deng hennagaw le lem gónô yóm dwata tekuy, ne laen se dù sidek udél le gubak etahen. ³⁸ Ke wen se tahu duón le Dimitriyus kul, ne yó kem dumuhen tau temwél, yake ne le hlan bè yó kem tau mogot kukum. Mdengen se yóm kdaw tekuy gel seyón bè kukum anì hyu semtulón du ke tedu senfatay ye. ³⁹ Okóm ke wen dumu nóyô sentulón ye, hol ne kuy hlan bè yóm gel kiting tekuy du. ⁴⁰ Ngem kà tnafaken tekuy yóm tau hol geta bélê tekuy ke henlós ye yóm nmò ye ni. Ke snólók le bélê tekuy buten nim kat hentê ye ni, tedu se balà ye du?” ⁴¹ Kogol yóm kudélen yó, ominen gotu hulék kul yó kem tau sbung bè yó.