¹ Yóm bud kewót le Pol ne Silas yó koni, mlan le bè yó kem benwu Amfipulis ne bè Apulunya, smahul le etu bè syudad Tisalunika. Bè Tisalunika, wen kul gónó gel stifun yó kem Ju bè yó. ² Sok gel kól bè yóm Kdaw Kehegnô, tódô gel mung bélê le Pol, lómón yóm sana kun gel adat. Tlu fereyanen tendo mung kul, ne gel stulón bélê le. Wen gel tulónen kul lemwót bè yóm Udél Dwata. ³ Yó gel hetngónen kul lemwót lem Sulat Dwata, nen ne glayam he kun yóm Misaya, omin Dwata bud imowil du. Ne yó bud mon Pol, “Yóm Jisas tulónu kuy ni, du se yóm Misaya.” ⁴ Wen se bè yó kem Ju, hentahu le yóm tulón Pol, ne gmung le bélê le. Dalang se yó kem libun boi kkólen bè yó kem tau Grik deng hemtahu bè Dwata, tey wen bélê le hemtahu du yóm tulón Pol. ⁵ Okóm deng mom mélés nawa le kul le Pol yó kem dumu Ju bè yó. Yó nmò le, gotu sentifun le yó kem logi lan mò sembeweg yó kem tau bè yóm syudad yó. Tahu se, ya tey kesbeweg le kul. Tódô le gotu mogow ebè gónô Jasun na le e tô kenfô le Pol lewu le Silas anì nwit le lu hewà ebè yó kem tau. ⁶ Okóm bè yóm kkól le ditu, là kô ton le kul. Tódô umuen Jasun senkfô le, ne wen kem dumu tau hemtahu gomong snéen. Nit le lu ebè yó kem tau mogot kukum. Tey khetê le, mon le, “Yó kem tau tô kenfô me yó, ket benwu lan le sónmò le kat sembeweg yó kem tau. Ne ni deng le kól bè ni bè syudad tekuy, ⁷ ne nim Jasun nii, fen gel hnalam kul bè gónóen. Gotu nulé le yóm hlau Sisar, yóm tau hol geta bélê tekuy, yóm kdê le, abay se gel mon le wen sotu tau hol geta senta Sisar kun, boluyen Jisas.” ⁸ Timbow gungol le nim ni, gotu le hetê yó kem tau sbung bè yó dalang se yó kem tau mogot kukum. ⁹ Wen filak hebtad le ke Jasun ne yó kem dumuhen anì gewà le. Timbow deng kebtad le, omin le yó hegewa kul. ¹⁰ Timbow deng kifu, lemwót yó kem tau hemtahu, hógów le Pol ne Silas ebè Beriya. Bè yóm kkól le bè yó, tódô le hlós ebè yóm kul gónó gel stifun yó kem Ju. ¹¹ Tey le móyô dmalang yó kem tau bè yó bè Beriya senta yó kem tau bè Tisalunika. Tey tilob khungol le du yóm tulón Pol, ne gel hennagì le yóm Udél Dwata ket kdaw anì ton le ke tahu yóm gel tulón Pol kul. ¹² Tey dê bélê le hemtahu. Senged snéen yó kem libun Grik boi kkólen bè yó kem logi Grik, gotu le gbót hemtahu. ¹³ Okóm bè kungol le du yó kem Ju bè Tisalunika yóm bud ktolok le Pol yóm Udél Dwata bè Beriya, bud ktes le lu etu na le e bud senbeweg kehedem yó kem tau bè yó. ¹⁴ Yó nmò yó kem tau hemtahu bè Beriya, kendel bud hewót le Pol ebè kilil mohin, okóm tagak bè Beriya Silas lewu le Timuti. ¹⁵ Yó kem tau momung ke Pol, hlós le mung du efet kól bè syudad Atin, omin le bud semfulék. Wen udél hwit Pol ebè Silas ne Timuti anì géhél le ne e ston du bè Atin. ¹⁶ Bè yóm igò Pol mangat ke Silas lewu le Timuti bè Atin, tey sidek kegnómen du, abay se tey dê tonen bè yóm benwu yó yó kem dwata kéng tódô lenbù nmò le. ¹⁷ Yó nmoen, gel mógów ebè yóm kul gónó gel stifun yó kem Ju bè yó, gel niten lu stulón yó kem Ju ne yó kem tau là Ju le deng hemtahu bè Dwata. Lelen gel mit stulón bè yó kem tau gel tonen bè plasa. Tódô ket kdawen gel mógów ebè yó. Kihu tau tonen, gel niten lu stulón. ¹⁸ Wen se yó kem tau gel tmolok bè yóm benwu yó, nit le skuya mon Pol. Yóm kul gel ktolok yó kem tau yó, lemwót bè yó kem tehe tau gnan bélê le boluyen Épikuriyas ne Stuwik. Wen se bélê le mon du, “Tedu engit tulónen yóm tau laen dù tngónen kat móyô mudél yó?” Ne wen se mon du, “Lómón tô wen tólóng dwata lemwót bè benwu mayuk gel tulónen.” Yó gónó le mon du yóm yó, abay se Jisas yóm gel tulón Pol, ne yóm deng klowilen. ¹⁹ Yó nmò le, nit le Pol ebè yó kem tau mogot kukum bélê le boluyen Aryupagus. Ne mon le mò ke Pol, “Tulónem kum kun yóm kóm lomi tolok gel tulónem ni. ²⁰ Wen se gel tulónem là deng gungol me du he. Kóyô me ke hol tngón me lanen.” ²¹ (Yó gónó le mon du nim ni, abay se yó kem tau bè Atin, ne yó kem dumu tau milo menwu bè yó, tódô senflós le hmungol du ke wen lomi tulón gel sut bélê le mò bud gel tulón le se kul.) ²² Omin Pol hebekó mdà lem belóng yó kem tau mogot kukum bè yó, monen, “Yu kem tau menwu bè ni bè Atin, deng tonu yóm tey keget klolò ye du yóm kuy hentahu. ²³ Denge mogow gu lem nim syudad ye, gotu tonu yó kem gónô gónó ye gel tmaba ebè yó kem kuy dwata. Ne hyu tonu se yóm sotu gónó ye gel demsù, ne wen snulat ye bè yó, yóm monen, ‘Yóm dwata laen dù temngón boluyen.’ Yóm dwata là tngón ye du boluyen yó,” mon Pol, “ni sem yóm Dwata dou tulón ni. ²⁴ Yóm Dwata ni, du se deng dmimun yóm klamangen benwu ne kdéen ton lemen. Du se yóm hol gónó mogot bè longit dalang se talak tonok. Là kóen ne e nô bè yó kem gónô nmò tau kun. ²⁵ Ne laen se kô gónón htóbóng bè tau, abay se laen dù gónón élél. Mem du ne hlowil tau, ne bemlay kul nawa le, ne kdê yó kem wen mu le du. ²⁶ Tek sotu tau nifil Dwata bè kbuten,” mon Pol. “Yó se gónón lemwót kdéen kay but tau. Hnóen lu bè klamang benwu nmoen. Eles tngónen snéen yó kem benwu gónón hemsù kul yó kem ket but tau, ne tengónen snéen yóm kegen le nô du. ²⁷ Yó gónó Dwata mò du yóm ni anì hol henebel nawa le Dwata yó kem tau, ne anì wen lan le setngón ebéléen. Okóm yóm Dwata, là se kóen ne e mayuk bélê te. ²⁸ Wen tehe tulón yóm sotu tau, monen, ‘Yake lemwóten béléen yóm klowil tekuy, ne yóm kekedol tekuy, ne yóm ketau tekuy.’ Hol lómón se yóm gel men yó kem tau lemingón bélê ye, yóm mon le, ‘Tekuy senéen ngà Dwata.’ ²⁹ Ne tahu se yó,” mon Pol, “kaem mekél tekuy béléen. Yó gónóhem mon, bê tekuy tô hendem yóm Dwata ke mekél bè yóm lenenged nmò tau lemwót bè belówón mélél duhen ke bè blówón bukay duhen ke bè botu, yóm olo nmò tdok tau. ³⁰ Tehe yu teganay,” mon Pol, “là senolò Dwata du yó kem sidek nmò tau bè yóm klawi le là setengón ebéléen. Okóm nim kmoen ni, deng henauhen yóm kdéen tau bè klamangen benwu anì hol kenogol le yó kem sidek gel nmò le. ³¹ Yakà dengen medengen kbuteng Dwata du yóm enget kkukumen yóm kdéen tau, helanen bè yóm tau deng néléken, ne tey tedeng yóm enget kkukumen kul. Wen gónó Dwata hdilô du bè kdéen tau yóm tau deng néléken yó, duhen yóm deng kehlowilen du.” ³² Timbow gungol le yóm mon Pol mowil, wen se bélê le mom knuli le. Okóm yó mon kem dumu, “Móyô me bud hmungol du he sotu kdaw yóm kóm tulón ni.” ³³ Omin Pol lemwót bè yóm gónó le skukum yó. ³⁴ Okóm wen se bélê le mung béléen ne baling le tau hemtahu. Sotuhen, yóm tau boluyen Junisyus, sotu tau mogot kukum bélê le. Bud yóm libun boluyen Damaris, ne wen he kem dumu tau baling hemtahu.