¹ Bè yóm kul kógów le Pol lewu le Silas, mlan le bè syudad Dérbi ne Listra. Ne bè yó bè Listra, wen sotu tau hemtahu bè Jisas bè yó boluyen Timuti. Hemtahu snéen yóm yéen. Libun Ju se kun, ne tau Grik yóm maen. ² Yó kem tau hemtahu bè yó bè Listra ne bè Ikunyum, tey gel kdóyón le du yóm kmò Timuti. ³ Móyô Pol ke niten Timuti bè yóm kógów le. Yó nmoen, nan tenulì anì là kenbê le du yó kem Ju ke gbol lem blóng le. Abay se tódô kdê le bè yó, gotu tngón le tau Grik yóm maen. ⁴ Tahu se, mung Timuti. Tódô ket benwu lan le sal gel hetngón le bè yó kem tau hemtahu yóm hlolò yó kem tau tehe hógów Jisas nô bè Jirusalim dalang se yó kem tuha gel malak bè yó. Sal gel hget le bélê le yóm kehlolò le du kul yó kem hlolò le kul yó. ⁵ Tahu se, tey wen gónón temnù kehtahu le yó kem tau hemtahu. Tódô ket kdaw sónmoen tendo temnù tau hemtahu bè Jisas. ⁶ Bè yóm kógów le Pol, tódô lengeb le prubinsya Frigya ne Glasya. Tô le móyô hlós mool ebè prubinsya Asya, okóm là bayaen kul yóm Tulus Dwata. ⁷  Timbow le kól bè kilil yóm prubinsya Misya, bud le tô móyô hlós subô ebè prubinsya Bitinya, bud là bayaen kul yóm Tulus Jisas. ⁸ Tódô le hlós mlan elem Misya efet le kól bè Truas, yóm syudad bè kilil mohin. ⁹ Bè yóm kifu yó, wen hegfan Dwata bè Pol bè knahen, yóm sotu tau lemwót bè prubinsya Masdunya. Yó henkoduhen bè Pol, monen, “Holi mifal kum edini bè Masdunya nam e tnóbóng mi.” ¹⁰ Tahu se. Lemwót bè yóm kna Pol, tódô me kendel htifes lemwót ebè Masdunya. Tódô dilô me yóm kun kóyô Dwata ke na me e hetngón yóm Tulón Hyu ebè yó kem tau bè yó. ¹¹ Kewót me bè Truas smakay me kafal, mifal me etu ebè yóm sotu hungul benwu udì boluyen Samutris. Hayahen bè yó bud me smakay kafal etu bè yóm benwu boluyen Nyafulis. Kmó me bè yó, ¹² ne tódô me tmonok subô ebè syudad Flipay, yóm benwu snakuf Masdunya, okóm tey dê tau Rom nô bè yó snéen. Na me na legen udì bè yó. ¹³ Timbow deng hto yóm Kdaw Kehegnô, mógów me ebè yóm él bè kilil yóm benwu yó. Hendem me déke bè yó gónó le gel stifun mni bè Dwata yó kem Ju menwu bè yó. Yóm kkól me bè yó, tódô glo me yó kem libun deng gna kól bè yó, omin me myón ne e nit me lu stulón. ¹⁴ Yó boluy yóm sotu libun hmungol kum Lidya, lemwót bè syudad Tyatira. Yó nmoen, gel hembalù nes ginggung tey mebtes. Hemtahu bè Dwata se kun. Bè yóm igoen hmungol ke Pol, Dwata fen htengon du béléen yóm hnungolen, ne hentahuhen. ¹⁵ Bè yóm deng kehtahuhen, ominen hbabtays, gomong se yó kem fes lówóhen. Kogol yóm kehbabtaysen, tinoken mi ebè gónóen, ne monen mò kum, “Deng tngón ye se yóm dou kehtahu bè Jisas. Yake ne ye nô bélê me bè ni.” Ne tahu se, nimón me. ¹⁶ Sotu kdaw bè yó, yóm igò me tolo mógów ebè yóm gónó me gel stifun mni bè Dwata, geslong me yóm sotu ngà libun sideknmoen, okóm wen genbeken. Tey filak gel guta yóm tau gónón sideknmoen, abay se wen kegbeken tmulón yóm angat sut elem haya lemwót bè yóm gel malak du. ¹⁷ Bè yóm igò me mógów, tódô lemangat huli kum, yó udélen, monen, “Ni se kem tau tóbóng lówó yóm Dwata hol geta bè kdéen. Yó nógów le ni,” monen, “na le e tulón kuy yóm gónó ye gewà gu lem hatay.” ¹⁸ Hilu kdawen todo gel semsulit du yóm monen yó efet tmakas Pol. Tódô beklil ebéléen, monen ebè yóm busaw malak du, “Lemwót bè kun boluy Jisas Krays, mdóhi béléen yóm ngà libun nalakem ni.” Tahu se, sen gengen se tódô mdó béléen yóm busaw malak du. ¹⁹ Timbow tngón yó kem tau mfun du yóm ngà libun ni yóm klaen dù bud lan le gemwa filak béléen, tódô kenfô le Pol ne Silas, nit le lu ebè yó kem tau genlal gel kmukum bélê le. ²⁰ Hdà le lu bè solu yó kem tau mogot kukum bélê le lemwót bè Rom, ne mon le mò kul, “Ni kem tau Ju ni, sónmò le hmala yó kem tau bè yóm syudad tekuy. ²¹ Gel tolok le yóm tólóng adat igoen là hyu bè yóm kut udin. Tau me Rom se kum, là hyuhen bélê me yó kem adat gel tolok le.” ²² Balù yó kem dumu tau bè yó, gotu gbót hnobo le Pol ne Silas se kul. Lemwót yó kem tau mogot kukum, wen tau dók le mò mlus nes le Pol anì hfes le lu. Ne tahu se, tey kat kfes le kul. ²³ Deng kat kfes le kul, omin le tmenes kul lem blanggù. Mon le bè yóm tau mentey blanggù, “Hol hgetem yóm bakdol.” ²⁴ Tahu se. Suen lu bè yóm hol són dfél lem blanggù, ne gotu lok le lem kfal nsol ti le. ²⁵ Timbow deng dô sóól buteng, mni le bè Dwata le Pol lewu le Silas, lel le semngal yóm sngal dmóyón ke Dwata. Hnungol le lu snéen yó kem dumu tau bnanggù bè yó. ²⁶ Yóm igò le semngal, tódô mbel yóm tey linol bong. Tódô msinsig yóm blanggù gónó le nô, tódô gotu lemungkà yó kem bengen ne tódô gotu bkas snéen yó kem kdina fét le yó kem tau bnanggù. ²⁷ Tódô gebtik se yóm tau mentey blanggù. Timbow tonen yó kem beng blanggù gotu lemungkà, kmonedu kun ke deng le gotu mlóy yó kem tau bnanggù. Yó gónón dmilot sudengen, tódô tô hnatayen knóen. ²⁸ Okóm kendel hetê ebéléen Pol, monen, “Bê. Béem nmò yó. Tolo me nô bè ni he kdê me.” ²⁹ Ominen kendel tmaba mni solok yóm tau mentey blanggù, tódô kendel mógów ebè le Pol lewu le Silas, tódô hegluduk bè solu le, lelen tódô setbol kkelen. ³⁰ Ominen mit kul hewà, monen, “Ó kem Sér, bon se tô nmou du anì gewae gu lem hatay?” ³¹ Mon le Pol se mò du, “Hol hentahuhem Jisas, yóm hol gónó mogot, ne angati gewà, dalang se yó kem fes lówóhem.” ³² Ne hlós gotu tulón le du yóm udél Dwata dalang se ebè yó kem dumu tau bè gónóen. ³³ Bè yóm uras kifu yó, yó nmò yóm tau mentey blanggù yó koni, gotu noloben halì le Pol lewu le Silas. Ne kendel tódô hbabtays yóm tau yó dalang se yó kem fes lówóhen. ³⁴ Ominen mit kul le Pol elem gónóen, ne henkenen lu. Ya tey kehligal le yóm kdê le, abay se deng le gotu hemtahu bè Dwata. ³⁵ Timbow hlafus bè yó, lemwót yó kem tau Rom mogot kukum, wen kem fulis dók le ebè yóm tau mentey blanggù anì hewaen le Pol. ³⁶ Tahu se. Mon yóm tau mentey blanggù mò ke Pol, monen, “Wen udél hwit yó kem tau mogot kukum anì hewau yu kun. Yó ne, yake hewà ye ne. Dwata he hol henek nawa ye.” ³⁷ Okóm yó mon Pol mò yó kem fulis, “Deng nfes le mi lem blóng yó kem tau igò le là deng smólók kum ke bon salà me. Lel me tau Rom se kum. Ne deng tenes le mi lem blanggù. Ne ni kendel bud tô lifut hewà le mi. Là. Là tagad me hewà he. Tódô lu dé mógów edini yó kem tau Rom mogot kukum yó. Lu dé hewà kum.” ³⁸ Omin le lemwót yó kem fulis na le e tulón yó kem tau Rom mogot kukum yóm udél Pol. Ya tey sidek klikò le yóm kungol le kul tau le Rom le Pol. ³⁹ Omin le tódô gotu mógów ebélê le lem blanggù, na le e mni seflifót bélê le. Omin le mit kul hewà gu lem blanggù, ne hni le bélê le anì géhél tnagak le yóm benwu yó. ⁴⁰ Tahu se, lemwót le Pol lewu le Silas, hlós le ebè gónô Lidya. Sentifun le yó kem dumu le hemtahu bè yó, bud sengeduf le lu bè kehtahu le, omin le yó bud lemwót.