¹ Nim bud hlolou kóm ni, tngón Dwata ne tngón Krays Jisas. Du yóm angat kmukum yóm kdéen tau, yó kem tau tolo mowil senged se yó kem deng matay. Ne lemwót bè yóm angat bud kesfuléken edini mò mogot yóm klamangen benwu, ni se hol hlolou kóm. ² Hol béem tenflok tmulón du yóm Udél Dwata. Tnanahem hból du nim kmoen ni, kihu ke hnungol le duhen ke là. Hol heglilebem kul yóm là tedengen. Bnólówem ke wen gónó le tlas, ne hol gendufem lu bè kehtahu le. Hol hanayem nawahem tmolok kul. ³ Yó gónóhu mon du yóm yó, wen kdaw le là bud hemkmón du yóm tahu tolok yó kem tau. Mom yó lolò le yóm kul knóyô. Ne tey dê tau gónó le htolok, ne són tolok le kul, són yóm nóyô le mò lelen nawa le. ⁴ Là kô hnungol le du yóm ktahuhen, mom knogol le. Mom tu alì henklingu le yó kem tulón lenbù nmò yó kem tau gnan. ⁵ Okóm kóm, hol tenngelem kmoem. Hol henbalahem yóm gel keglayamem. Hol gel nwitem yóm Tulón Hyu. Béem tenflok yóm hmò Dwata kóm. ⁶ Béléu dou, là holen bud té ne nim dou knô te tonok. Móyónen hto yóm dou buteng. ⁷ Deng hotuhu són gelu mò du yóm deng hmò Dwata dou, lómón ke skuyahe mlóy, ne ni ne yóm deng kdengen, là kóe na a kemsil. ⁸ Ne ni, wen deng eles henyu yóm gónó tekuy mogot mò ofolu, yóm ofol blayen bè yó kem tau deng tedeng kmò le. Angat suen béléu bè yóm kdaw kekukumen tau, ne tey tedeng yóm kkukumen. Là kô són du ou se yóm wen ofolen, senged nóm se yóm kdéen tau deng eles tendo hemdón du yóm ksuten. ⁹ Holi hgéhél mógów dou edini. ¹⁰ Ke Dimas kun, deng mom tódô tnagaken ou lanen dê kenbeyen nawan lem nim benwu ni. Ne ni deng mom kól bè syudad Tisalunika. Lemwót ke Krésén, deng kól bè prubinsya Glasya, ne fen kól bè Dalmasya ke Taytus. ¹¹ Tek són Luk yóm gel dumuhu bè ni. Soki mógów edini, hol slobem dou Mark, wen tey gónón gemtóbóng dou bè ni. ¹² Lemwót ke Tikikus, deng hógówu ebè Ifisus. ¹³ Soki mógów edini, hol nitem dou yóm kgal mfólu. Tehe tebelu dyó bè Truas, bè gónô le Karpus. Ne homong nitem dou yó kem boku, ne hol néen yó kem dumu sulat. ¹⁴ Ya tey kehlayamen dou yóm Aliksandér, yóm tau gel temwél. Dwata he yó fen malà du. ¹⁵ Gel nabungem se kóm, yakà tey sidek kekbéen du yóm gel tolok te. ¹⁶ Bè yóm tanay kbalau yó kem tau kmukum dou, balù sotu ke wen mfi do, deng mom gotu sentagak le ou. Deng hnihu bè Dwata anì là snoloen du bélê le. ¹⁷ Okóm yóm gónó tekuy mogot, là kô bayaen dou, ne du fen temgel nawahu anì hol gotu gtulónu yó kem tau là Ju le bè yó yóm mò lan le gewà gu lem hatay. Ne deng lenwà Dwata ou bè yóm tô khatay le do. ¹⁸ Ne angat bud lenwaen ou he yóm gónó tekuy mogot ke wen bud tô dumu gfau, ne hlós nwiten o ebè tum kun benwu nogot bè longit. Bê te abay lensón yóm kut kdóyón du. ¹⁹ Hol hgefetem dou bè Prisila ne Akila ne yó kem kun fes lówó Unisifurus yóm tey kólómu kul. ²⁰ Tolo nô bè Kurin ke Irastus, ne tebelu bè Militus ke Trufimus, abay se tolo wen desen. ²¹ Holi hgéhél dou edini nim gu laanen là deng bud sidek kdaw. Tey gel kólóm le kuy snéen kul le Yubulus ne Pudin ne Linus ne Klawdya, dalang se kdê yó kem dumu tau hemtahu bè ni. ²² Yó hem gónó tekuy mogot hol nô béléem. Dwata he hol tmóbóng kuy.