¹ Ni mò hentulónem nawa, ke sok deng móyón moni yóm hol són kdaw, tey dê gónó le glayam kem tau. ² Yó kmò kem tau, sbì le, ne seglom le, lel le hton salù, ne heklabak le. Yó mò kul, sidek kebkó le, ne là kô nimón le kem tuha le. Hono kem tau laen dù ledem le, là kô nadat le ke Dwata. ³ Yó alì mò kul, laen dù nawa le ebè kem dumu le, balù udì ke wen keskodu le, gel sentulón le kem dumu le, tey kosut nawa le, mahil le hlóbô, mom kenbê le yóm hyu. ⁴ Gel natul le kem dumu le, tódô fà le knawa le, tey le alì hegmón. Són nô bè nawa le yóm kenbeyen le, là buden nô bè nawa le Dwata. ⁵ Ya mo kmung le sbung bè simbahan du, okóm là kô le himón. Béi hegbool bélê le kóm. ⁶ Wen se bélê le gel motun bè yó kem gmónô anì wen libun hemklingu kul mò mimón yóm tolok le. Yó kem gel hemklingu kul yó, són yó kem libun gel mahil gmung. Yó mò kul, tendo blat kegnóm le du lemwót bè yó kem sidek tehe gel nmò le, kem libun mahil gmung bè yó kem knóyô lówó le. ⁷ Sónmò le móyô htolok yó kem libun yó, okóm là kô glileb le du yóm ktahuhen. ⁸ Ni kem tau sekban ktolok le ni, mkél le bè tehe Janis ne Jambris, kem tau tehe tô matù ke Musis ekni. Senged se bè ni kem tau sekban ktolok le ni, mom natù le yóm ktahuhen. Deng semyat kehedem le, sekban yóm kehtahu le. ⁹ Laen dù sfuhen yóm ktolok le yó. Kaem gfan bè kdéen tau yóm ungel le, lómón yóm tehe kegfan yóm kul ungel le Janis ne Jambris. ¹⁰ Okóm kóm du, deng gotu loloem ne yó kem gel toloku ne yóm kekdolu ne yóm hol sen‑galuhu bè klowilu. Deng gotu tngónem se yóm kehtahuhu ne yóm khanayu nawahu, ne yóm kbong nawahu kem dumuhu, ne yóm khulungu hbala. ¹¹ Deng gotu tngónem yóm gel kehsidek le dou ne yóm gel keglayamu. Deng tngónem yóm gfau bè yó kem tau bè Antyok ne bè Ikunyum ne bè Listra. Tey keglayamu, bede sal gel lenwaen ou yóm gónó tekuy mogot. ¹² Ke wen tau hol sen‑galuhen kguliten lanen mimón ke Krays Jisas, wen gónón glayam bè yó kem dumu tau là hemtahuhen. ¹³ Yó kem tau deng solò kmò le sidek ne yó kem dumu tau sekban ktolok le, tódô hlós temnù ksidek nmò le. Snukat le kem dumu le, ne bud le gsukat se kul. ¹⁴ Okóm kóm du, henlósem lemolò du yóm tahu tolok deng dnalangem ne deng hentahuhem. Yóm dnalangem yó, sal lemwót bè yó kem tau genléd nawahem. ¹⁵ Hentulónem nawa yóm deng dnalangem bè Sulat Dwata lemwót bè yóm hanà kudiem. Yó se gónóm temngón du yóm kehewà Krays Jisas kóm gu lem hatay mlan bè yóm kehtahuhem béléen. ¹⁶ Kdê yó kem Udél Dwata deng tehe hsulaten, tey wen muhen bè yóm gel ktolok yóm ktahuhen, ne bè yóm gel kbólów yóm tolok sekban, ne bè yóm gel kestódô yó kem tau deng gesyat, ne yóm kehlau yó kem tau bè yóm kmò kwit le ktau le. ¹⁷ Mlan bè yóm kehnagien du yóm Sulat Dwata gónón baling sikof kehedemen yóm tau mò nmò bè Dwata. Balù kihu hmò Dwata du, gbeken.