¹ Bud ou se Simun Pitér gónón lemwót nim sulat ni, yóm sotu gel tóbóng lówó Jisas Krays, yóm gel hógówen. Bude smulat ebélê ye yu kem tau deng hemtahu bè Jisas Krays, yóm Dwata tekuy, yóm deng lemwà tekuy gu lem hatay. Lemwót bè yóm ktedeng nawahen, yó gónón hembaling kuy tau hemtahu béléen hol lómón yóm tehe kehbalingen kum tau hemtahu béléen. ² Yake hol temnù yóm któbóng Dwata kuy ne yóm kenek nawa blayen kuy mlan bè yóm ketngón ye ke Dwata ne yóm gónó tekuy mogot Jisas. ³ Lemwót bè yóm alì kfasang Dwata gónón tódô ket du yóm któbóngen tekuy anì gulit tekuy bè yóm klolò tekuy du. Ne mlan bè yóm deng ketngón tekuy ke Jisas Krays, gónó tekuy gomong béléen bè yóm tey kegetahen ne yóm tey kehyuhen. ⁴ Ni se gónón dohò yóm tehe fasaden tekuy, duhen yóm kun tóbóng alì hyu. Ne lemwót bè yóm kun tóbóng yó, gónó tekuy gewà du yó kem dê sidek knóyô tau te tonok, yóm gbeken hemsidek ktau tekuy. Ne bud lemwót bè kun tóbóng, yó gónó tekuy gomong bè yóm kun kehyu kmò Dwata. ⁵ Yó gónóm mon, hotu ye gel ye anì hmung ye bè yóm kehtahu ye yóm kehyu kmò. Ne bè yóm kehyu kmò ye, hol hmung ye du yóm khulung ye hedem. ⁶ Bud bè yóm khulung ye hedem, hol hmung ye du yóm khulung ye mafas nawa. Ne bè yóm khulung ye mafas nawa, hol hmung ye du yóm khulung ye hbala. Ne bè yóm khulung ye hbala, hol hmung ye du yóm hol kgulit klolò ye ke Dwata. ⁷ Ne bè yóm kgulit ye yó, hol bud hmung ye du yóm kbong nawa ye kem dumu ye hemtahu. Ne bè yóm kbong nawa ye kem dumu ye hemtahu, hol homong ye yóm kdéen tau. ⁸ Ke lómón yó yóm tendo gel nmò ye, ne ke là hluda ye mò du, tey wen uléken yóm deng ketngón ye yóm gónó tekuy mogot Jisas Krays. ⁹ Okóm yóm tau ke là dog nmoen du ni kem ni koni, hol lómón ke là buden mton. Deng mom klifóten yóm deng kkó Jisas du béléen yó kem tehe salaen. ¹⁰ Duhen yó, kem dumuhu setwoli, hol hotu ye són gel ye mò du nim monu ni koni mò gónó ye hton du yóm deng tehe ktaba Dwata kuy, ne yóm deng kéléken kuy. Ke henlel ye mò du nim ni, là kô na ye e gbek kmogol du yóm kehtahu ye bè Dwata. ¹¹ Ne angat tey khódóhen tekuy bè yóm kun benwu nogot yóm gónó tekuy mogot Jisas Krays, yóm tehe lemwà tekuy gu lem hatay. Ne yóm benwu nogoten yó, benwu laen dù tul sónen. ¹² Yó gónóm mon, senflósu se hegtulón du bè nawa ye ni kem ni koni, baluen ke deng tngón ye, ne deng tey mbegel kogot ye du yóm ktahuhen. ¹³ Hendemu dô yó se dou snolu ke tódô senflósu ne semgduf kuy mò du yóm hyu efet kukol towoku. ¹⁴ Deng eles tngónu là buden té ne duen yóm dou ktau, yakà deng hetngónen du dou yóm gónó tekuy mogot Jisas Krays. ¹⁵ Yó gónóhu hol smulat du ebélê ye ni kem ni mò hentulón nawa ye soke mfu lem blóng ye. ¹⁶ Yóm gel tulón me kuy lemwót bè yóm tey kfasang yóm gónó tekuy mogot Jisas Krays ne yóm angat bud kesfuléken edini, là kô lenbù tutul du. Kaem deng hyu ton me se kum yóm tey kehegeta Dwata du. ¹⁷ Tehe me nô béléen bè yó bè yóm tehe kdóyón Dwata du, yóm Maen, ne yóm tey kehegetahen du. Tódô gungol me udél Dwata, yóm hol geta bè kdéen. Yó monen, “Ni se Ngau hol gónóhen nô nawahu. Bong hyu nawahu du.” ¹⁸ Deng gungol me se kum yóm udél Dwata gu bè longit yó bè yóm tehe kmung me ke Jisas ebè yóm bulul gónó Dwata hloni ebéléen. ¹⁹ Yó gónóm mon, deng hol temnù ne yóm kehtahu me du yóm deng tehe eles tulón yó kem gna tugod Dwata ekni. Hol hentahu ye se kuy yóm deng eles tulón le yó. Hefeng tekuy du yóm tehe gel tulón le, lómón ke solok mnóng bè gónóhen kmifu efet mwas, efet mnóng ebélê tekuy yóm blotik semla gel mnóng bè kwasen, duhen Jisas Krays. ²⁰ Ni se yóm bong muhen mò nit nawa ye. Laen kô dù tau ke gbeken hemlan du yóm tehe gel tulón yó kem gna tugod Dwata ekni ke són du. ²¹ Abay se yóm tehe eles gel tulón le yó, là kóen lemwót bè kehedem tau, okóm bè Dwata gónóhen hol lemwót, yóm Tulusen fen hemlan du bélê le bè yóm kehtugod Dwata du kul.