¹ Yóm tehe yu ekni, gel wen se kem tau gel sut tódô tô lembù tmugod ke Dwata. Senged se ni kmoen ni, wen tau sut na a tmolok sekban lem blóng ye. Hono kéng yóm gel tolok le. Ke lolò ye, hensideken ktau ye. Sal henkéng le yóm gónó tekuy mogot igoen du yóm tehe msok kul gu lem hatay. Yó gónóm mon, angat tódô kento genlà Dwata lu yó kem tau yó. ² Ewenem, sana tey dê tau hemtahu gbót bè yóm gel ksamuk le. Ne yó se lewót yóm kesedekà yó kem dumu tau du yóm tahu tolok. ³ Lemwót bè yóm kebel le filak, tey dê gel tulón le kuy hono kem tulón lemambù. Deng legen ne eles kbuteng Dwata du ne yóm angat ktafaken kul. Són féten, là dengen hto he yóm butengen mò du. ⁴ Tehe yu ekni, wen sidek nmò yó kem tehe hógów Dwata gu bè longit, bede là kô tódô bayà Dwata du kul. Yó tafaken kul, tódô boten lu elem yóm tey sol leyóng kmifu mò gónón bmanggù kul efet kehto yóm buteng kkukumen kul. ⁵ Dalang se yó kem tau gnan bè yóm tehe kun kdaw Nuwa ekni, tey kegsalà le. Bede là kô tódô bayà Dwata du kul yóm kegsalà le yó. Yó tafaken kul tódô gotu hlumfaken elem benwu le yóm tey dunuk él, ne gotu le meglà. Són Nuwa là matayen, ne yó kem hitu fes lówóhen. Gu laanen là deng sut yóm dunuk, tódô henlel Nuwa tmolok yó kem tau anì hentedeng le kmò le. ⁶ Tehe yu ekni, tódô tnafak Dwata yó kem tau menwu bè yó kem syudad Sodom ne Gomora lemwót bè yóm tey kegsalà le. Yó nmò Dwata, tódô ntemen lu. Yó gónón gemlà kul mò ton yó kem dumu tau yóm gónón e kól yóm tau laen dù klikoen ke Dwata. ⁷ Bè yóm keglà Dwata kul yó, gna lensoen Lat, sotu tau hyu kmoen. Nim Lat ni, sidek keblat nawahen bè yóm gel kmò le samuk yó kem tau gel mò sidek bè yóm kul benwu yó. ⁸ Tódô nô lem blóng le Lat, bede ket kdawen tey gel blat nawahen bè yóm sidek gel tonen ne yóm gel gungolen. ⁹ Bè ni kem tulónu kuy ni koni gónó tekuy mton du yóm tey khulung Dwata lemwà yó kem tau gel mimón du ke wen gel gfà le. Ne tnafaken yó kem tau gel mò sidek, bede yó he hol kehdengen du kesok kól bè yóm angat kkukumen tau. ¹⁰ Hol néen yó kem tau tódô lolò le yóm sidek knóyô lówó le, ne gel natù le Dwata. Ni kem tau tmolok sekban ni, laen kô dù nadat le, ne tey kehegmón le. Balù yó kem alì mfasang gel nô bè longit, sana kehnê le kul. ¹¹ Okóm yó kem gel hógów Dwata gu bè longit, là kô nmò le du kul yóm yó. Balù yóm tey kfasang le senta yóm kul kfasang yó kem tau tmolok sekban, ewenem bè yóm ktifù le kul bè solu Dwata, là kô le mudél hemnê. ¹² Okóm yó kem tau gel tmolok sekban yó, laen kô dù ledem le, hol le mkél bè yó kem ógóf lem bnes, són mu le mò dnulok ne mò hnatay. Senged se yó kem tau monu yó koni, gel hennê le yóm kul là deng tngón du. Elem hatay nefeten yó dum nmò le yó. ¹³ Angat gotu hulék Dwata eta le yóm sidek deng gel nmò le bè dumu tau. Ni kem tau ni, balù kemdaw sana kbeyen le mò du yóm kul knóyô lówó. Tey mungu ke segbót le mken bélê ye bè yóm gel kestifun ye, yó se gónó ye myak bè dumu tau. Lel le mken bélê ye he, lel le smukat kuy. ¹⁴ Són libun tendo henklol le. Là dengen gsengel nawa le mò du yóm sidek baluen ke hilu dulék le semsulit mò du. Gel hegbóy le yó kem tau là dengen dmolil kehtahu le. Deng hol tahu knalam le yóm knawa sbì. Kaem deng nô ta le ne yóm kegtafak le bè Dwata. ¹⁵ Deng tnagak le ne yóm lan tedeng, deng le mom hetlas. Deng glolò le yóm tehe nmò Balam, ngà Biyur, sotu tau tehe tmugod ke Dwata ekni. Okóm là kóen bê mò du yóm sidek ke wen filak gutahen. ¹⁶ Bede bnólów Dwata yóm sidek tô nmoen. Tódô hudélen yóm kudà snakayen anì là gehlósen yóm sidek tô nmoen yó. ¹⁷ Yó kem tau tmolok sekban yó, hol le mkél bè yóm kokol deng kti, duhen ke yóm lobun mung hfolis bè lenos, bà setlek él ke hebtangen. Deng wen ne yóm alì gónón kmifu deng eles hetfing Dwata bélê le. ¹⁸ Tey le hulung mudél, okóm laen dù lemen. Gel hegbóy le yó kem tau hanà lomi kmogol du yó kem knóyô lówó. Yóm kehegbóy le kul, hlan le bè yó kem sidek knóyô lówó le. ¹⁹ Yó fasad le kul, mon le, “Ke lolò ye nim kum tolok, laen kô dù hlau bud gónó ye gfét ne.” Okóm là kô dog tngón le du yó kem tau tmolok sekban yó yóm tey kegfét le bè yóm sidek gel nmò le. Yó se henged fét le yóm alì óyô le mò sidek. ²⁰ Wen se kem tau deng tebel le yó kem tehe nmò le sidek lan le temngón yóm gónó tekuy mogot Jisas Krays, yóm deng lemwà tekuy gu lem hatay. Okóm sentahen bè yó, mom bud senfulék le yóm sidek tehe gónó le gfét. Ke yó nmò le, milud he yóm kegfét le du. Deng mom ni ne yóm ksideken senta yóm là deng kehtahu le. ²¹ Mom hyu bélê le ke là deng tehe tngón le du yóm lan tedeng senta yóm deng ketngón le du, ne omin le kmogol du yóm hlau Dwata deng tehe hetngón le kul yó. ²² Yó gónón tahu yóm gel mon yó kem tau gnan ekni, yóm mon le, “Yóm ohu, bud gel kenen yóm lewólen. Ne yóm sdô lomi denyo, mom bud gel hlulid lem hitok.”