¹ Yóm tau ke hentahuhen Jisas yóm Misaya, yóm deng nélék Dwata, du se yóm tau deng baling ngà Dwata. Yóm tau ke bong nawahen ke Dwata, yóm Mà tekuy, kenbongen nawa snéen yó kem dumu tau deng baling ngà Dwata. ² Ke bong nawa tekuy ke Dwata ne ke gel nimón tekuy yó kem hlauhen, yó se gónón dilô yóm kbong nawa tekuy yó kem tau deng baling ngaen. ³ Yó gónón gdilô yóm kbong nawa tekuy ke Dwata ke hol nimón tekuy yóm kun hlau. Yó kem hlauhen yó, là katen mgel, ⁴ abay se ke deng tekuy baling ngà Dwata, gbek tekuy matù bè yó kem sideklem nim benwu ni. Yó gónó tekuy matù lan tekuy deng hemtahu. ⁵ Tau du se gembek matù bè yó kem sidek lem nim benwu ni? Tek són yóm tau hemtahu du yóm kngà Dwata ke Jisas. ⁶ Bè yóm tehe ksut Jisas Krays lem nim benwu ni, wen gónó tekuy dmilô du ke du yóm hol Ngà Dwata, duhen bè yóm tehe kehbabtaysen, ne bè yóm tehe kgamà litóen bè yóm katayen. Là olon du bè yóm kehbabtaysen yó, okóm yóm kgamà litóen snéen. Yó hol gemtanud du yóm ktahuhen nim monu ni koni, duhen yóm Tulus Dwata. Yóm Tulus Dwata, sok wen monen, deng duhen yó. ⁷  Wen tlu gónó tekuy dmilô du ke du yóm hol Ngà Dwata: ⁸ Duhen, yóm kegtanuden du yóm Tulus Dwata, ne yóm kehbabtaysen, ne yóm kgamà litóen bè katayen. Nim tlu ilóen ni, sal tek sotu tendok le, duhen yóm kngà Dwata ke Jisas. ⁹ Ke gel hentahu tekuy yó kem deng gtanud yó kem dumu tau, sélét mom tô là hentahu tekuy du ne yóm kun deng gtanud Dwata. Du se gemtanud du yóm hol kngaen ke Jisas. ¹⁰ Yóm tau ke deng hentahuhen yóm Ngà Dwata, deng nô lem hendemen ne yóm ktanud Dwata yó koni. Okóm yóm tau là hentahuhen du, deng henkéngen Dwata yóm tau yó, abay se là hentahuhen du yóm deng tulón Dwata gbak ebè yóm Ngaen. ¹¹ Ni sii yóm deng mon Dwata: Wen klowil laen dù sónen deng blayen tekuy hlanen bè yóm Ngaen. ¹² Yóm tau ke deng henmóyóen yóm Ngà Dwata, deng gutahen ne yóm klowil laen dù sónen. Okóm ke là henmóyóen du, là kô gutahen du yóm klowil yó. ¹³ Yu kem tau deng hemtahu bè kun Ngà Dwata, yó gónóhu smulat ebélê ye ni anì hol tngón ye yóm deng eles kwen yóm kuy klowil laen dù sónen. ¹⁴ Ne tey kegléd nawa te du yóm gel kni tekuy bè Dwata, abay se tendo hnungolen yóm kni te ke segtón ebè yóm kun kóyô bélê tekuy. ¹⁵ Ke tngón tekuy yóm eles gel kehungolen du balù kihu hni tekuy, bud tngón tekuy snéen yóm kguta tekuy du yóm hni tekuy yó. ¹⁶ Ke ton ye yóm sotu dumu ye hemtahu deng btang elem salà, okóm ke sundu elem hatay laen dù sónen nefeten yóm salaen yó, hol utóm ye bè Dwata, ne blayen du yóm klowil laen dù sónen, syan ke là mefeten elem hatay laen dù sónen yóm salà nmoen yó. Okóm wen se yóm salà hol nefeten elem hatay laen dù sónen. Là monu du mò kuy hni ye bè Dwata yóm tau yó. ¹⁷ Tódô kentihen nmò sidek, hono salà. Okóm wen se yóm salà là mefeten elem hatay laen dù sónen. ¹⁸ Deng tngón tekuy se ke deng baling ngà Dwata yóm tau, là kô senflósen du mò salà, abay se yóm Ngà Dwata fen tendo kemlung du, ne laen dù bud gmò Seitan béléen. ¹⁹ Deng tngón tekuy ne yóm kfun Dwata tekuy. Yó kem dumu tau nô lem benwu, hono kem kun tau nogot Seitan. ²⁰ Ne deng tngón tekuy se yóm tehe kógówen edini yóm Ngà Dwata mò na a hetngón du tekuy yóm hol tahu Dwata. Deng tekuy ssotu ne bè yóm hol tahu Dwata lemwót bè yóm deng kessotu tekuy bè yóm Ngaen Jisas Krays. Du se yóm hol tahu Dwata, ne du se gónón lemwót yóm klowil laen dù sónen. ²¹ Yó ne kóó, kem ngà. Hol ye hlayuk bè yó kem dwata kéng.