¹ Ó kem weu do dumu sogot nawa, bê ye kendel tódô hentahu ke wen tau mon du nô béléen kun yóm Tulus Dwata. Ke yó se gel mon le, na ye na hol nilô bè ktolok le ke tahu lemwót bè Tulus Dwata duhen ke là. Yakà dengen tey dê tau tódô lembù tmugod ke Dwata nim kmoen ni. ² Yó mò ilô ye du ke tahu Tulus Dwata yóm fen malak du yóm tau: Ke hentahuhen yóm deng tehe kehbalingen tau Jisas Krays, du se yóm tau deng nô béléen yóm Tulus Dwata. ³ Okóm ke là hentahuhen du, sundu Tulus Dwata du yóm malak du yóm tau yó, kaem tulus lemwót bè Seitan, yóm hohon Krays. Deng eles tehe gel gungol ye se yóm angat ksuten. Duhen ni sem deng sut ni kmoen ni. ⁴ Okóm yó dum kuy, kem ngà, Dwata se hol mfun kuy, ne deng ye matù bè yó kem tau gel tmolok sekban yó, abay se deng nô bélê ye yóm Tulus Dwata, ne tey bong mfasang senta yóm tulus nô bè yó kem tau là hemtahuhen. ⁵ Yó kem tau lembù tmugod ke Dwata yó, tódô lemwót lem nim benwu ni yóm kul gel tolok. Ne móyô le hmungol kul yó kem tau là hemtahuhen, abay se gfi le bélê le. ⁶ Okóm tekuy, deng nfunen tekuy Dwata. Sok fes tau temngón ke Dwata, gel hnungol le yóm ktolok tekuy. Okóm yóm tau là tngónen ke Dwata, là kóen móyô hmungol du yóm tolok tekuy. Bè ni se gónó tekuy dmilô du ke lemwót bè Tulus Dwata yóm ktolok le, duhen ke lemwót bè yóm tulus kéng. ⁷ Hol tekuy gel sbong nawa, kem weu do dumu sogot nawa, yakà bè Dwata du gónón lemwót yóm kesbong nawa. Yóm tau kenbongen nawa yó kem dumuhen, yó se yóm tau deng baling ngà Dwata, ne deng tngónen Dwata. ⁸ Yóm tau laen dù nawahen ebè kem dumuhen, là kô tngónen ke Dwata. Kaem yóm Dwata kun, bong nawahen yó kem tau. ⁹ Yó se gónón gfan yóm kbong nawa Dwata tekuy yó bè yóm tehe khógówen elem benwu yóm Ngaen tek sotu, anì mlan béléen yóm kwen klowil tekuy laen dù sónen. ¹⁰ Nim kbong nawa monu ni koni, sundu yóm kbong nawa tekuy ke Dwata, okóm tódô kun kbong nawa tekuy Dwata, hlanen bè yóm tehe khógówen yóm Ngaen mò lanen hmifót du yó kem salà tekuy. ¹¹ Ke lómón ni se yóm kbong nawa Dwata tekuy, kem weu do dumu sogot nawa, yake hol tekuy sbong nawa sen. ¹² Laen kô dù tau deng mton ke Dwata. Okóm ke hol tekuy sbong nawa, yó se gónó tekuy ssotu bè Dwata. Ne yóm kessotu tekuy bè Dwata yó, yó se gónón baling gulit yóm kesbong tekuy nawa. ¹³ Deng hol tngón tekuy se yóm deng kessotu tekuy bè Dwata, abay se deng suen bélê tekuy yóm kun Tulus. ¹⁴ Deng hol ton me se kum yóm deng khógów yóm Mà tekuy bè longit yóm kun Ngà mò lemwà tekuy gu lem hatay, ne ni se yóm gel tulón me. ¹⁵ Ke wen tau mon du hol Ngà Dwata yóm Jisas Krays, deng le ssotu Dwata ne yóm tau yó, ne hlós nô béléen Dwata. ¹⁶ Deng tngón tekuy ne yóm tey kbong nawa Dwata tekuy, ne yó se gel genléd nawa tekuy. Tey bong nawahen tau yóm Dwata. Yóm tau ke kenbong nawahen yó kem dumuhen, deng le ssotu Dwata ne yóm tau yó, ne hlós nô béléen Dwata. ¹⁷ Lemwót bè yóm deng kessotu tekuy bè Dwata yó, là kô tekuy na a likò béléen bè yóm kdaw kkukumen tekuy. Yó se gónó tekuy là likò, abay se deng tekuy gbót ne bè yóm kun kmò Krays bè nim igò tekuy mowil te tonok ni. ¹⁸ Laen dù bud knikò tekuy ne lemwót bè yóm kbong nawahen tekuy Dwata. Yóm nawahen tekuy yó, tódô ket du, ne gbeken mkó du bélê tekuy yóm klikò tekuy. Okóm yóm tau gel likò, là deng hentahuhen du he kun yóm kbong nawa Dwata du. Yó gónón likò, abay se nangaten yóm ktafak Dwata du. ¹⁹ Deng gegna ne yóm kbong nawa Dwata tekuy, yó se lewót yóm gónó tekuy kembong du nawa. ²⁰ Ke yó mon yóm sotu tau, ke monen, “Bong nawahu ke Dwata dou,” okóm ke tolo knutó nawahen yóm dumuhen hemtahu, odoyen yóm monen yó. Ke là bong nawahen du yóm dumuhen hemtahu yóm hol hyu ton matahen, sélét mom tô kenbongen nawa Dwata ne, yóm là ton matahen du. ²¹ Ni sii yóm hlau lemwót bè Krays, monen, “Ke bong nawahen ke Dwata yóm tau, hol kenbongen nawa dumun tau snéen.”