¹ 1 Yó gónóhu smulat ebélê ye ni kem ngà, anì bê ye bud mò salà. Okóm ke wen bélê ye gemsalà, deng wen ne fen blóng tekuy ebè Dwata, yóm Mà tekuy, duhen Jisas Krays, yóm hol tedeng kmoen. ² Hol du se mò lanen yóm gónó Dwata hmifót du yó kem salà tekuy. Là sónen du yóm salà tekuy hnifóten, okóm hnifóten snéen yóm kentihen salà tau bè klamangen benwu. ³ Wen gónó ye milô du ke tahu yóm deng ketngón ye ke Dwata, duhen ke deng nimón ye yó kem kun hlau. ⁴ Ke wen tau mon du, “Deng tngónu Dwata se dou,” okóm ke là dog nimónen du yóm hlau Dwata, odoyen yóm monen yó. Là kóen nô bè nawahen yóm ktahuhen. ⁵ Okóm yóm tau gel nimónen yóm kun udél Dwata, hol tahu duhen ne yóm kbong nawahen ke Dwata. ⁶ Ke mon yóm sotu tau, “Deng me ssotu ne Dwata,” yake hol nulit nmoen sen yóm kun kmò Jisas Krays. ⁷ Kem weu dou dumu sogot nawa, nim hlau sulatu ebélê ye ni, sundu lomi hlau du. Sana kem hlau labi tenbut tngón ye bè yóm kbut kehtahu ye ke Jisas. Deng tehe gel gungol ye nim hlau labi ni, duhen bè yóm kesbong nawa. ⁸ Bede boluy tô duónen là lomi du nim hlau ni? Yó se gónón lomi bélê ye, abay se deng ton ye ktahuhen lemwót bè yóm kimón Krays du, ne lemwót bè yóm deng kimón ye se kuy minut mkó ne yóm kifu ne deng nbuten se gfan yóm tahu layag. ⁹ Ke wen tau mon du, “Denge nô lem gónóhen lemayag dou,” okóm ke tolo gel knutó nawahen yóm dumuhen hemtahu, tolo nô lem gónón kmifu he yóm tau yó. ¹⁰ Okóm yóm tau ke kenbong nawahen yó kem dumuhen hemtahu, deng nô lem yóm gónóhen lemayag ne. Yó gónón là gel tlokob, abay se wen layag hton du. ¹¹ Okóm ke gel knutóhen nawa kem dumuhen, tolo nô lem gónón kmifu he. Yóm tau ke mógów lem kifu, laen bang tngónen lan loloen, abay se kifu mit du là mton. ¹² Yó gónóhu smulat ebélê ye ni, kem ngà, abay se là bud snolò Dwata du bélê ye ne yó kem salà ye lemwót bè yóm deng nmò Krays bélê ye. ¹³ Ne smulate ebélê ye snéen yu kem mà, abay se deng tngón ye Krays se kuy, yóm sana mowil tenbut bè kbuten. Ne smulate ebélê ye snéen kuy, yu kem hanà lomi lemnok, abay se deng ye matù ne bè Seitan. ¹⁴ Ne yu kem ngà, yó gónóhu smulat ebélê ye, abay se deng tngón ye ne yóm Mà tekuy bè longit. Ne yu kem mà, yó gónóhu smulat ebélê ye, abay se deng tngón ye se kuy Krays, yóm sana mowil tenbut bè hol kbuten. Dalang se bè yó kem lomi lemnok, yó gónóhu smulat ebélê ye, abay se tolo ye tey kemgis. Ne alì nô bè nawa ye yóm kun udél Dwata, ne deng ye matù bè Seitan. ¹⁵ Hol bê ye abay genmung nawa nim benwu ni, ne yó kem dê gel kenbeyen nawa ton lemen. Abay se ke genmung nawa ye lu, là kóen bong nawa ye du tum Mà ye bè longit. ¹⁶ Yó kem dê kenbeyen nawa ton ye lemen, yó kem dê knóyô lówó ye, ne yó kem dê ton mata ye, ne yó kem dê gónó ye hton salù, là kóen lemwót bè yóm Mà ye bè longit yó kem yó. Sal lemwót bè knóyô tau te tonok. ¹⁷ Wen sónen nim benwu ni, dalang se yóm kdéen kenbeyen nawa nô lemen. Yóm tau gel mò yóm kun kóyô Dwata, laen kô dù tul sónen yóm kun klowil. ¹⁸ Ó kem ngà, deng móyónen gesón ne nim benwu ni. Deng eles gungol ye ne yóm ksut yóm hmohon ke Jisas. Balù nim kmoen ni, deng dê ne yóm sut hmohon du. Yó se mò ilô tekuy du yóm móyón kegesón nim benwu ni. ¹⁹ Yó kem tau hmohon du yó, deng le tehe gel mung bélê tekuy snéen, okóm là tahu le hemtahu, yó gónó le tmagak tekuy. Ke tahu le hemtahu, là kô deng tnagak le tekuy. Yóm ktagak le tekuy yó, yó se gónón gfan yóm là klolò le du yóm kut lolò. ²⁰ Bong kuy du, deng sù Krays bélê ye ne yóm Tulus Dwata. Yó se gónó ye hulung temnef du yóm ktahuhen. ²¹ Sundu mon dé ke yó gónóhu smulat ebélê ye ke là deng tngón ye du yóm ktahuhen. Okóm yó gónóhu smulat, abay se deng tngón ye, ne deng tngón ye snéen laen kô dù kéng ke tmowok gu bè yóm tahu. ²² Tau du se yóm bong kéngen? Kaem yóm tau henkéngen ke Jisas yóm Misaya, yóm deng nélék Dwata mò hkamalen yóm klamangen. Yó se yóm tau hohonen Krays. Deng kenbéen yóm Mà tekuy lewu le yóm Ngaen. ²³ Abay se yóm tau ke kenbéen yóm kun Ngà Dwata, kenbéen snéen yóm Maen. Okóm yóm tau ke hentahuhen yóm Ngà Dwata, hentahuhen snéen yóm Maen. ²⁴ Duhen yó, hol henlel ye hemsù du bè nawa ye yóm tulón hyu deng gungol ye lemwót bè kbut yóm kehtahu ye. Ke là lanahen bélê ye yóm tulón yó, tódô senflósen ne yóm kessotu ye bè yóm Ngà Dwata lewu le yóm Maen. ²⁵ Deng wen tehe fasad Krays tekuy, duhen yóm klowil laen dù sónen. ²⁶ Yó gónóhu smulat du ebélê ye nim ni, abay se wen kem tau tendo gel tô smukat kuy. ²⁷ Okóm yó dum kuy, deng sù Krays bélê ye yóm kun Tulus. Anien he ke laen dù tau bud tmolok kuy syan ke senflósen nô bélê ye yóm kun Tulus. Abay se du fen tmolok kuy yóm kdéen, ne laen dù kéng boolen yóm gel toloken kuy, hono tahu. Yó gónóm mon, hol gel nimón ye sen yóm gel toloken kuy yóm Tulus Dwata, ne hol henlós ye yóm kessotu ye bè Krays. ²⁸ Tahu se, kem ngà, hol henlós ye sen yóm kessotu ye bè Krays anì laen dù gónó tekuy likò sok semfulék edini, ne laen dù gónó tekuy myak béléen snéen bè yóm kdaw kesfuléken yó. ²⁹ Lemwót bè yóm ketngón ye du tey tedeng yóm Krays, bud tngón ye snéen ke tedeng kmoen yóm tau, du se yóm tau deng tahu ngà Dwata.