¹ Yó gónóhu smulat ebélê ye ni, abay se tulónu kuy yóm Jisas Krays, yóm bnoluy le Udél Hlowil Tau. Gu laanen là deng wen benwu he, deng sana kem yó ne kun. Ne deng na me hol gungol udélen, ne deng hol kum mata se mton du yóm lówóhen ne deng nogot me snéen. ² Deng henbaling Dwata tau yóm monu Udél Hlowil Tau yó, deng na me ton se. Laen kô dù buten ne laen se dù sónen yóm klowilen yóm knóen bè Maen. Ni se yóm deng tehe baling tau. Ne ni se hol bótóng yóm tulón me kuy. ³ Yóm deng ton me ne yóm deng gungol me béléen, yó se heglalag me bélê ye anì tilob kesfulung tekuy ebè yóm Mà tekuy bè longit ne ebè Jisas Krays yóm Ngaen. ⁴ Ni se gónó me smulat ebélê ye ni anì hol gsengel kehligal tekuy. ⁵ Ni sii yóm deng tehe gel gungol me tulón Jisas, yóm Ngà Dwata, ne ni se yóm bud heglalag me bélê ye: Lómó kmoen kun yóm Dwata, lómón ke yóm layag, ne laen kô bang bolen kifu bè yóm layag monu yó, bà udì. ⁶ Duhen yó, ke gel mon ye, “Deng me sfulung Dwata ne kum,” okóm ke tolo ye nô bè gónón kmifu, kéng ye yóm mon ye yó koni, deng tódô dilô bè yóm nmò ye.  Okóm ke deng ye nô lem layag, lómón yóm kun knô lem layag Dwata, yó he gónón wen kesfulung tekuy. ⁷ Ne yóm litô tehe namà Jisas, yóm Ngà Dwata, yó se fen tendo mkó du bélê tekuy yóm ket salà gel nmò tekuy. ⁸ Ke yó mon ye, “Laen kô bang salau dou,” ten‑geed ye tmondo knô ye, là dengen nô bè nawa ye he yóm ktahuhen. ⁹ Okóm ke gotu benkas ye ebè Dwata yó kem salà ye, là gbeken du ke là hnifóten kuy, yakà wen yóm tehe fasaden tekuy. Gotu hnifóten yó kem salà tekuy, ne gotu kóhen bélê tekuy yóm kdê nmò tekuy là hyuhen. ¹⁰ Ke wen mon du, “Là kóe mò salà se dou,” deng henkéngen ne yóm mon Dwata, ne là kóen nô bè nawahen yóm udélen.