¹ Tapos to sikan, duon do naan napitow ku no diwata no gohomanon no nig pamanowog ligkat to lngit. Na bukasan ko gabon, hoy duon nakalimod no bulugto to ulu rin. Nigmalayjag ka lawlangowan din ka anat to Aldow, hoy ka mo kubong ka anat to niglayjab-layjab no hapuy. ² Duon piggun-gunan no doisok no basahon no nabuklad. Pog-uma rin to ingod, igdoik din ka kawanan kobong diyot tano. ³ Hoy nigpangiyak kandin ka lagong din ka anat to liyon no nig agolo. Tapos kandin nigpangiyak, nigtabak ka pitu no lanog. ⁴ Insulat ku poron ka inkayi to pitu no lanog, di duon narinog ku no lagong no ligkat to langit no nigkagi, “Kono ipanlalag ka pigkayi to pitu no lanog. Kono soini isulat.” ⁵ Dayjon ka diwata napitow ku no nigsasindog diyot dagat hoy to tano inbayjow rin ka kawanan no bolad diyot langit. ⁶ Hoy nigsasapo to ngaran to Diyus, ka Diyus no waro kamatayjon, no nighinang to langit, tano, dagat, hoy to tibu mo butang no kayi, migkagi ka diwata ka prupita, “Kono kad langan-langan, ⁷ su ko igpatarog to ka ikapitu no diwata ka prupita rin, oghimuwon to Diyus ka waro din ipataaga no palanu sumalo to kandin no inlalag diyo to mo purupita.” ⁸ Migkagiyan a isabi to lagong no ligkat to langit, “Hondoyoi ka diwata no nigsasindog diyo to dagat hoy to tano, hoy puruta no ka basahon no inbukad diyo to bulado din.” ⁹ Koy naan ka mighondiyo a to diwata hoy pigboyjo ku ka doisok no basahon. Pigkagiyan a rin, “Soin puruta no hoy koonan. Ka-anat to doga ka omis ko diyo pad to bobo, di ko diyod togotok nu mo poit on soin.” ¹⁰ Pigpurut ku ka basahon diyot bolad din hoy pigkoon ku dayjon. Ka anat to doga ka omis kayit bobo ku. Di to poglam-od ku mopoit on soin kayi gotok ku. ¹¹ Hoy duo migkagi kanak, “Kinaanglan isab nu igpanlalag ka pigkayi to Diyus mohitungod to nigkoloin-loin no mo banwa, kabuhalan, ginagiyan, hoy mo panguu."