¹ Nig-awu si Hisus to sikan no banwa hoy nigpauli to kandin no ongod, hoy nigduma kandin ka mo tinounan din. ² To sikan no aldow to pogpohimoloy, nighondiyo kandin to limoranan hoy nigpanudlo to mo otow no masalig. To pogkarinog dan kandan noinu-inu kandan tibo. Koy naan ka nanginso kadan, “Hondoi rin man natouni soin tibo? Hondoi rin buwan napurut ka natounan din? Hoy nigmono rin to nighimu ka mo kabolonganan? ³ Kono ba no iyan kandin ka talaghimu to baloy no anak ni Mariya hoy sulod ni Santiyagu, ni Husi, hoy Hudas hoy ni Simun? Kono ba ka sulod din no mo boyi dini man nangugpo?” Tongod to sikan waro nigtahud kandin ka mo otow. ⁴ Hoy nigkagi si Hisus kandan, “Ka ogpagagano intawaod to tibo no banwa waro labut to kaugalingon din no ingod, mo duma rin hoy kadumahan." ⁵ Waro kandin nokohimu to kabolongan diyo, ko kono, ka poggungun to pipilahon no maraluwan hoy to pogpouli kandan. ⁶ Inu-inu kandin to waro pogtuu ran, hoy nighondiyo si Hisus to marani no mo banwa oyjow ogpanudlu to mo otow. ⁷ Hoy inlimud din ka sampulu hoy daruwa no tinounan hoy inpaalap no tagdaruwa hoy nigbogayjan kandan to gohom no ogpakaalow to mo busow. ⁸ Hoy nigkagihan kandan, “Kono kow alap to koonon, hoy hambag, hoy salapi hoy agad nokoy, ko kono ka tukod do. ⁹ Sasandal kow, kono kow alap to loin no kinabo, ko kono iyan do ka insaluub niyu. ¹⁰ Nigkagi mando kandin kandan, “To pog-uma niyu diyo to lunsud, pamanoyik kow to baloy no nig-imbitar kaniyu hoy kono kow alin to loin no baloy hantod to og-ongkod kow on to sikan no ingod. ¹¹ Ko ogpoko-ondiyo kow to sagboka no banwa, no ka mo otow kono ogdawat hoy kono ogpamminog kaniyu ongkori now sikan no banwa, hoy itaktak ka abog diyo to paa no oyjow ogpatahanan kandan." ¹² Koy naan ka nagipanow kandan hoy niglalag no ka mo otow kinahanglan no og-ongkud to mo salo dan. ¹³ Inpan-alow dan ka mo busow hoy nigpoyiran to lana hoy nigpoulian ka masalig ka nigdaralu. ¹⁴ Ka pangulu no si Hirudis, nigdinog to sikan tibo so nabalogbog on man ka ngaran ni Hisus. Duon mo otow no nigkagi, "Nigbaton on si Huwan no Magbubunyag! Iyan hinungdan no nohimu din ka kabolonganan." ¹⁵ Hoy duon nigkagi kandin si Ilyas. Di ka duma nigkagi, "Ogpagagano kandin iling to mo nabalogbog to nouna no panahon." ¹⁶ To pogkarinog ni Hirudis to nighimu ni Hisus, nigkagi kandin, ”Kandin si Huwan no Magbobonyag no inpapongolon ko to ulu, di inbatunan.” ¹⁷ Si Hirudis iyan ka nigsugu to pogpadakop ki Huwan hoy nigpaprisu. Nighimu rin soin tongod ki Hirudiyas no inpangasawa rin agad si Hirudiyas no asawa ni Pilipi no sulod din. ¹⁸ Su si Huwan angod ogpanapad ki Hirudis, “Kono maroyjow no ogpangasawa ka to ipag nu.” ¹⁹ Tongod to soin nigdomot si Hirudiyas ki Huwan hoy nigpalanu no oghimatayjan din. Di waro din mokohimu kandin , ²⁰ su waro man tuguti no Hirudis. Nahaldok si Hirudis ki Huwan su nataga man kandin no si Huwan maroyjow hoy balaan no otow. Koy naan inpanaliporan din si Huwan. Agad masamuk ka sumansuman ni Hirudis. Ko ogkarinog din ka tibo no igkagi ni Huwan ogpammingon din giyapon kandin. ²¹ To koopusan nokouma rod ka panawon no nigtatagaran ni Hirudiyas. Nohitabo soin to aldow no kaotawan ni Hirudis. Niggastu kandin oyjow to mo gaalon to matig-Galiliya, ka mo kapitan to mo sundalo hoy ka mo inila no mo otow. ²² To sikan no aldow, nigsulod ka malitan no anak ni Hirudiyas hoy nigsayjow. Naliyag amana si Hirudiya hoy ka mo magaliyog. Koy naa ka nigkagi si Hirudis to boyi, “Pamoyjo ka koddi agad nokoy no ogkaliyagan nu, igbogoy ku koykow.” ²³ Hoy nigkagi pad kandin to malitan, “Ogpanaad a koykow no agad nokoy no ogpamoyjoon no koddi igbohoy ku koykow, agad katonga pad to karatuan ku.” ²⁴ Niglihawan ka malitan hoy nanginso to inoy rin ko nokoy ka ogpamoyjoon din. Nigtabak ka inoy din no ogpamoyjoon din ka ulu ni Huwan no Magbubunyag. ²⁵ Hoy nig-agpas kandn no niglibod diyo to Hari. Pog-uma din diyo nigkagi kandin, “Ka igkoupii ku kuntoon no igbogoy nu kanak ka ulu ni Huwan no tigbawtismu no nakatago diyo to bandiharo.” ²⁶ To pogkarinog to hari natalong amana sikandin. Di tongod to nakapanaad man kandin hoy nigdinog ka mo magaliyog din, kono kandin ogkoupii no ogkapakysas ka saad din to malitan. ²⁷ Duon-duon insugu din ka sagboka no sundalo no og-alapon diyo to kandin ka ulu ni Huwan. Koy naan to nighondiyo on ka sundalo to pirisuhan hoy nipangolan ka ulu ni Huwan. ²⁸ Intahu din diyo to bandiharu hoy intalad to malitan, hoy intalad din mando diyo to inoy din. ²⁹ To pogkarinog to mo tinounan ni Huwan mohitongod to nohitabo, nighondiyaan dan hoy inpurut ka lawa ni Huwan hoy inlobong. ³⁰ Ka mo tinounan ni Hisus no nighipanow to pogpanaysay na nanakalibod on diyo to kandin. Inkagi dan kandin ka tibo no inhimu hoy inpanudlu dan. ³¹ Tongod to masalig no mo otow no nigsosoip-soiopo no ogmokouma hoy ogpangipanow, waro on panawon dan agad to pogkoon. Koy naan ka nigkagi ni Hisus to mo tinounan, “Paragas, oghundiyo ki to kohilawaban oyjow ogpokohimoloy kow agad doisok.” ³² Koy naan nig-untud kandan to untoranan hoy nighondiyo to kohilawban. ³³ Di noilahan kandan to masalig on mo otow no nakakita to poghipanow dan. Koy naan namalagoy ka mo otow ligkat to nigkoloin-loin no mo ingod pohondiyo to banwa no oghondiyaan ni Hisus, hoy nokohun-an pad kandan nokouma diyo. ³⁴ To poglono ni Hisus to unturanan, nakita din ka mohon-in amana no mo otow no nangalimod diyo hoy nohoy-u kandin kandan, su iling kandan to mo karniru no waro kamunoy. Koy naan nigtudloan din to masalig no kalaglagon. ³⁵ To pogkamahapon on, nigdani kandin ka mo tinounan din. Nigkagi kandan, “Mahapon on, no kayi ki pad to kohilawban. ³⁶ Pohondiya nud ka mo otow diyo to mo bariyu hoy to mo sityu to palibut oyjow ogpakabuli kandan to ogkaoyjagan." ³⁷ Di nigkagi si Hisus kandan, “Kaniyu ka ogbogoy kandan to ogkakoon.” Nanginso kandan ki Hisus, “Oghipanow koy ba hoy ogboli to paan no ogkantidad to balig walo no bulan no suhol to sagboka no otow oyjow igpakoon kandan? ³⁸ Nigkagi si Hisus kandan, “Pila no buuk ka paan duon? Pitawa now.” To duon no nasusi dan on nigkagi kandan, "lalimma no paan hoy daruwa no isda.” ³⁹ Insugu ni Hisus ka mo tinounan no ogpapinnuohon ka mo otow no oglalimma no ogrupu-grupu duon to lagot. ⁴⁰ Koy naan naminnuu ka mo otow no nigrupu to tagsongo-gatus hoy kalimmahan. ⁴¹ Hoy inpurut ni Hisus ka lalimma no paan hoy daruwa no isda. Nigtunggak kandin hoy nigpasalamat to Diyus. Hoy nigporipori din ka mo paan hoy inbogoy diyo to mo tinounan din oyjow iglugob to mo otow. Hoy inbabaad-baad din duon ka isda to tibo. ⁴² Nakakoon kandan tibo hoy nangahantoy. ⁴³ Ponga ran nakakoon, inlimod dan ka mo subla no paan hoy isada hoy sampulu hoy daruwa no liyan ka naponu. ⁴⁴ Lima no libo ka kohon-inan to mo lukos no nakakoon. ⁴⁵ Ponga to sikan, insugu ni Hisus ka mo tinounan din no og-untud to unturanan hoy oghun-a diyo to Bitsayda, doyipag to lanow tagood no inpauli din ka mo otow. ⁴⁶ To nakaligkat ka mo otow nigtakorog kandin diyo to bubungan oyjow og-ampu. ⁴⁷ Pogkamarusilom, ka balangoy diyo on to pagtongaan to lanow, di si Hisus diyo pad to bubungan no nigsasagboka. ⁴⁸ Nakita din no niglisod kandan to pogpanarok su ogkatagbu dan ka kalamag. To ogpamigatpigat on, nighondiyo kandin diyo to kandan no nighipanow ampow to wohig. Ogligad do poron kandin diyo to kandan. ⁴⁹ Di to pogkakita dan kandin no nighipanow ampow to wohig, nangahaldok kandan hoy nangngiyak, ⁵⁰ “Gimukud!” Di nigkagi si Hisus “Kono kow kahaldok, kanak soin! Kabbulut kow! ⁵¹ Hoy nig-untud kandin to balangoy hoy nighagtong on ka maagbot no kalamag. Hoy noinu-ino kandan. ⁵² Agad nakitaan on ka koin-inuwan no nihimu din duon to paan, waro pad giyapon kandan nakasabut to buut pasabut to sikan no makohal ka ulu ran. ⁵³ To pog-uma dan diyo to doyipag, nidoong kandan to Ginisarit hoy diyo dan intagu ka balangoy. ⁵⁴ To poglonu dan, noilahan dayjon to mo otow si Hisus. ⁵⁵ Koy naan ka nig-agpas ka mo otow to poghondiyo to palibot to mo banwa hoy inpoyimotang toa mo hibatan ka mo maralohon hoy in-alap dan to banwa nonigdinog dan no diyo si Hisus. ⁵⁶ Agad hondoi kandin ogpoiling, to mo sityu, to mo baryo, hoy to mo lunsud, ko ogkarinog dan no diyo si Hisus, og-alapon dan ka mo maralohon dan to banwa no kanunay no ogkalimoran to mo otow. Inhangyoon dan si Hisus no ogsugotan din ka maralohon no oggungun kandin agad diyo to ogbas do to kinabo din. Hoy ka tibo no ogpakagungun kongoulian.