¹ Hoy nanggugud mando si Hisus to mo otow, pinabayjo to mo sampitanon. ² "Ka poghari to Diyus iling to soini: Duo sagboka no Hari no nig gasto to sakat to anak din no lukos. ³ Woy pigpayipanow ka mo hibatoon din woy migkagi, 'Ipohondini on ka mo pighanggat to soini gasto,' di nig mangbalibad ka mo hinanggat. ⁴ Nigsugu mando man ka pangulu to loin no suluguon woy pigkagiyan din panghanggaton now on ka mo otow su andam on ka gasto. Noiyow on ka mo baka woy ka mo malambog no mo nati nohikoy on tibo ka gasto. Hondoni kow on to gasto to sakat.' ⁵ No, waro naminog ka mo otow no pighanggat to sooyo no gasto; nigparayjon dod to mo himu ran; ka sagboka nighondiyo to taligobo, ka sagbuka nighondiyo to boliyanan, ⁶ ka duma nigpandakop to mo hibatoon woy pigpanghulabus woy pig panghimatayjan. ⁷ Tongod to soin kan nabolu ka Hari. iyan iyak pig paalap din o ka mo sundalu woy pigpanghimatayjan ka nigpangimatoy rut mo hibatoon woy pigsangab ka nig ugpaan dan. ⁸ Hoy nangumow rin ka mo hibatoon woy pigkagiyan, 'Andam on gasto to sakat, di konog pokohondini ka mo inhanggat. ⁹ Koy naan pangondiyo kow to mo dalan woy hanggata now ka tibo nog kalambagan now. ¹⁰ Hoy ka mo hibatoon nigmangondiyo to karaldalanan woy pig pang alap dan ka tibo no nalambagan dan, maroyjow woy kono, woy naponu to otow duot gastuhanan. ¹¹ Hoy nigsolod ka hari oyjow to pog pitow to mo hinanggat woy nakita rin ka sagboka no magaliyug no waro nigkikinabo to maputi no kinabo. ¹² Pig-insoan dut Hari kandin, “pig monu nu to pogsolod to waro ka naka sasaluob to kinabo no pang sakat?" Waro makakagi soyjo otow. ¹³ Hoy nigkagi ka Hari dut mo hibatoon din, "Bakua now ka mo bolad woy ka mo paa rin woy ipahugawot kandin diyo to libwasan no marisilom. Woy in tapus ka sampitan ni Hisus to pog kagi rin, ¹⁴ “Dakol ka in hanggat, di doisok do ka napili.’’ ¹⁵ Nig libulung ka mo parisiyu hoy nigsasabot to og monuwon dan si Hisus tog hilot pinaybayjo to mo panginso. ¹⁶ Hoy inpan alap dan diyo ki Hisus ka hibatoon din duma rut sakup ni Hirudis. Nig kagi kandan, "talag-anad nataga koy no kono kag wawangal. Nig pang-anad ka to untul no maroyjow mayitongod to buut to Diyus diyo’t mo otow pigbalagad nud ka suman-suman to mo otow so waro now man tongtongi ko hontow kandan. ¹⁷ Hoy nangoni koy ko nokoy ka koykow ni suman-suman: Supak ba to kanta balaud ka pogbayjad to buwis diyo to empiradur to Roma, woy so kono?’’ ¹⁸ Di nataga si Hisus to maroot ka tuud dan, nigkagi kandin, “Kaniyu no tig poko-iling iling no mo otow?maniyu tog antijan a now? ¹⁹ Ipakita now kodi ka saapi no igbayjad to buwis? Woy pigpakita ran ka saapi. ²⁰ Hoy nanginso kandin kandan, “Hontow man no langlanguwan woy ngaran ka kayi ti soini?" ²¹ “To empiradur,’’ nigtabak kandan. Woy si Hisus nigkagi, “Ko iyan soikan, ibogoy diyo to empiradur ka kandin woy ibogoy mando diyo to Diyos ka kandin. ²² To pogkarinog dan to soini, nabolong-bolong lagboy kandan woy nig ongkoran kandin woy nangipanow. ²³ To soikan mando aldow duon mo Sadusiyu no nig dugok ki Hisus. Soini ka nigmangagi no waro namatoy nog manglibod. ²⁴ Nigkagi kandan, “Talag-anad, nig kagi si Mowisis, “Kog kammatoy ka sagboka no otow no waro anak, nog asawwoon din mando ka ipag no balu, woy makaanak kandan, woy duon kabuwaran dut namatoy. ²⁵ Duon nig susulod-sulod no pitu no buuk no mo lukos. Nakaasawwa ka kinakakayjan no namatoy no waro anak. ²⁶ No ka nabalu no boyi pig pangasawwa rut igkarangob no sulod. Woy namatoy mando ka igkarangob no sulod no waro mando anak. Woy noiling mando ka igkatolu poiling to igkapitu. ²⁷ To katamanan, namatoy mando ka boyi. ²⁸ Kuntoon, to aldow nog batunon o ka kag kamatoy, hontow buwad kag kaasawwa rin to tibo din man naasawa ka nig susulod-sulod? ²⁹ Di si Hisus nig tabak kandan, “Sayjop kow. Soini nayitabu su waro kow nataga to kasulatan woy gawom to Diyus. ³⁰ Su omun ogbatunon on ka mo namatoy, og koiling on kandan to mo angel diyo to langit woy kono og maasasawooy ka mo lukos woy mo boyi. ³¹ No hangkuwan mayitongod dut batunon on ka namatoy: Waro kow man buwa nakasabot to inbasa, no in kagi to Diyos kaniyo? Woy nigkagi kandin: ³² "Kodi ka Diyus ni Abraham ka Diyus to mo buhi, kono to mo namatoy.’’ ³³ Nabolong-bolong ka mo otow to pog karinog to soikan no pogpanganad din. ³⁴ To pogkarinog to mo Parisiyu no ka mo Sadusiyu naroog ni Hisus to katarongan, nig parumdumooy kandan poiling diyo ki Hisus. ³⁵ Hoy duon sagboka no talag-anad to balaud nig anti woy pighilot din si Hisus pinabayjo to mo panginso. ³⁶ Talag-anad, nokoy buwa ka pinakadakol no sugu to balaud? ³⁷ Si Hisus nig tabak, "Dakoli now to goyinawa ka Magbabayjo no Diyos to koykow no pusung woy to koykow no gimukud, woy suman-suman now. ³⁸ Soini ka dakol amana no sugu. ³⁹ Ka igkarangob no dakol lagboy no sugu iling dut nohun-a; dakuli now to goyinawa ka duma now iling to pogdakol now to goyinawa to kaugalingon now. ⁴⁰ Ka soikan daruwa no sugu nigligkat to balaud ni Mowisis woy ka mo anad dut nig magagano. ⁴¹ No noyimon on ka mo Parisiyu, nanginso si Hisus kandan, ⁴² "Nokoy ka suman-suman now moyitongod to Kristo? Hontow buwa kandin no kabuwaran?" Nig tabak kandan, "Ki David." ⁴³ Si Hesus nigkagi kandan, "Ko iyan soikan, maniyu man to nig umow si David kandin to 'Magbabayjo' su nigkagi man si David, ⁴⁴ 'Ka Magbabayjo nigkagi diyo to Magbabayjo ku, pinnuu ka kayi to kawwanan ku, taman tog himuon ku no diokanan ka usig nu. ⁴⁵ No ko si David nig umow kandin to 'Magbabayjo' ogmonuwon buwad to Kiristo nog koyimu no kabuwaran ni David? ⁴⁶ No waro sagboka no nakatabak ki Hisus. No likat to sooyjo no aldow warad nig-anti nigpanginso-inso kandin.