¹ To duon no marani on si Hisus diyo to Hirusalim hoy diyad kandan to baryo to Betfage no diyo to kohilawan to Olibo. Hoy inpohun-a ni Hisus ka daruwa rin no binasbas. ² Nigkagi kandan, hun-a kow on diyo to hunaan no baryu to pogsolod now, duon og kitoon now no asnu no duon duma rin no nati. Hubara now hoy alapa now dinit kodi. ³ Ko duon ogpanginso kaniyu tabaka now, kinanglanon soini to Magbabayjo, hoy ig paalap din kaniyu. ⁴ Soini ogkohitabo oyjow ogkatuman ka nigkagi to ogpagagano. Nigkagi kandin, ⁵ "Nangoni now ka taga-Sion no duon on ka Hari dan, mopoilobon kandin hoy og moko-umo-on kandin no og sakoy to Nati no asno." ⁶ Koy naan ka nangipanow ka daruwa no binasbas hoy intuman dan ka sugu ni Hisus. ⁷ In-alap dan ka asnu hoy ka nati diyo ki Hisus. Inhanigan dan soini to tinabo dan hoy nigsakoy si Hisus. ⁸ Diyo ka dakol no otow no nig darampil to tinabo diyot dalan. Ka duma nig tampod to sanga hoy intagu diyot dalan. ⁹ Nangulaluy ka tibo no otow nighun-a hoy ka nig-alundug kandin. Dayjanon ta ka kaliwat ni David! Nig panalanginan to Magbabayjo ka pina-alag din! Dayjanon ta ka Magbabayjo! ¹⁰ To pogsolod ni Hisus diyo to Hirusalim nagobot ka mo otow diyo. Nigkagi kandan, hontow man sikan no otow? ¹¹ Nigtabak ka mo otow no duma ni Hisus, iyan sika ka og pagagano no si Hisus no taga-Nasarit, no sakop to Galiliya. ¹² Nigsolod si Hisus diyo to timpulu hoy inpaawwo din ka tibo no namalit hoy namaligya diyo. Inpamolod din ka mo lamisa to mo nangilis dut salapi hoy ka pinu-uwan dut tog pamaligya to salapi no hahalaroy. ¹³ Nigkagi kandin kandan, "Nignangon ka Magbabayjo diyot kasulatan ka baloy ku og umawwon to baloy alapoan. Di nig himu now nasi soini no baloy to tulisan!" ¹⁴ Duon mo butud hoy bungul no nig-dani kandin diyo to timpulu hoy nigbawian din kandan. ¹⁵ Nabolu ka tibo no agalon to mo pari hoy ka tibo no talag-anad to kasuguan to duon no nig kita ran ka koin-inuwan no botang no inhimu rin, to duon no nigdinog dan ka mo bato no nig ulaluy no nigkagi, og dayjanon ta ka kaap-apuan ni David. ¹⁶ Koy naan ka nig kagi kandan ki Hisus, "Nig dinog nu ba ka in kagi ran?" Nigtabak si Hisus, "Ho-o maniyu waro kow ba nakabasa to inkagi dut kasulatan no agad ka doroisok no bato no in anad to Dios to og sayjo kandin?" ¹⁷ Hoy nig-ongkoran kandan ni Hisus. Niglibuwas kandin diyo to siyudad to Hirusalim hoy nig hondiyo kandin to Betaniya hoy diyo kandin nig hirogo. ¹⁸ To sikan no masolom, to poglibod ni Hisus to siyudad to Hirusalim niggutasan kandin. ¹⁹ Hoy nigkita kandin to kayjo no Higira diyo to dapig to dalan. Koy naan ka nigdanihan din sikan, di wa nig kita rin no unud kono iyan do ka dowun. Hoy nignangonan din ka kayjo, sukad kuntoon kono kad ogpangunud! Hoy duon-duon nagangu on ka Higira. ²⁰ To duon no nigkita dut binasbas din nabolong amana kandan. Nigkagi kandan, "Maniyu man tokow nagangu ka kayju no Higira?" ²¹ Nigtabak si Hisus kandan, "Ka tutuu ko duon pogtuu now no konog duwa-ruwa ogkohimu now giyapon ka nighimo ku dut Higira. Kono don sikan ko no ogmakamando kow kat bubungan, no ig halin diyot dagat, hoy og koyitabu sikan. ²² Ka agad nokoy no og pamuyjuon now, pinabayjo to pog-ampu ogkapurut now, ko ogtuu kow. ²³ Nigsolod dayjun si Hisus diyo to timpulu hoy nanudlo to mo otow. Diyo duon mo agalon to mo pari hoy mo agalon to mo Hudiyu no nigdani kandin hoy nanginso, "Nokoy man ka katongod no to poghimu to sikan no mo botang kayi to timpulu? Hontow ka nig buguy koykow to katongod?" ²⁴ Nigtabak si Hisus kandan, "Songog panginso-a daan kaniyo. Ko og katabak now soini, ogtabakon ko daan kaniyu ko nokoy ka katongod ku to poghimu to soini no mo botang. ²⁵ "Hondo-i man nig ligkat ka katongod ni Huwan to pogpamawtismu, to Diyos ba ko otow?" Nigpomoin-insooy kandan ko nokoy ka igtabak dan. Nigkagi kandan, "Ko og kagi ki no diyo nigligkat to Diyos, ogkagi kandin, 'Maniyu man to waro kow nigtuu ki Huwan?' ²⁶ Ko ogkagi ki to nigligkat to otow, di klaro ko to mo otow so nigtuo kandan no si Huwan og pagagano ligkat to Diyos. ²⁷ Koy naan ka nigtabak kandan ki Hisus 'waro koy natou.' Hoy nigkagi si Hisus kandan, "Ko sikan manaan kono ko daan kaniyu ogkagihan ko hondo-i ligkat ka katongod ku to poghimu to soini. ²⁸ Nigkagi mando si Hisus kandan, "To kaniyu no sumsumanon, nokoy man ka buut pasabut to soini? Duon sagboka mo otow no duon daruwa no anak no lukos. Nighondiyaan din ka kakoy no anak din hoy nigkagihan, 'Tato, oghondiyo ka kuntoon to tanomanan to Obas hoy og tarabawu. ²⁹ Nigtabak kandin, 'Konaa!' Di to katapusan, naloin ka sumsumanan din, hoy nighondiyo kandin to tanomanan din, hoy nig tarabawu. ³⁰ Nighondiyaan daan to amoy ka anak din no Hari hoy nigkagihan daan iling to inkagi din to kakoy. Nigtabak ka hari, 'Oho, Amu,' di waro kandin nigtuman. ³¹ Hondo-i to kandan ka nigtuman to sugu to Amoy? Nigtabak kandan, 'Ka kakoy.' Nigkagi si Hisus kandan, "To pogkatinuud, nahun-a pad kaniyu to pogpasakop to poghari to Diyos ka mo maniningil to buwis hoy ka mo malitan no namaligya to kandan no pogkomalitan. ³² So si Huwan talagbawtismo oghandini hoy nigpanudlu kaniyu to tumanan no paagi para og kohimo kow no matarong tangkaan to Diyos. Di waro kow nigtuu kandin. Ka mo maniningil to buwis hoy ka mo malitan no namaligya to pogkamalitan dan iyan nasi nigtuu kandan. Hoy agad nakita now on soini, waro giyapon kow nighural hoy nigtuu kandin. ³³ Nigkagi si Hisus kandan, "Pamminoga now ka sagboka no sampitanan: Duon sagboka no otow no duon tano din no inpatanoman to Ubas. Nigpaalad din hoy nigpohimo to lungag diyo to dakol no bato oyjow og pogaanan to Ubas. Nigpoyimu mando kandin to sagboka no baloy no holunganan. Pogkaponga nigpatagooran din pad ka tanomanan din hoy nighondiyo to Mariyo ingod. ³⁴ To panawon on to pog gaani to Ubas insugu din ka mo tinoohan din diyo to sinaligan din oyjow to pogpurot to bayin din. ³⁵ To pog-uma to mo tinoohan, inpandakop kandan to sinaligan, in-lamposan dan ka sagboka, inbanggalan dan to bato ka sagboka, hoy in himatayjan dan on ka sagboka. ³⁶ Pogkaponga to sikan nigsugu dayjon ka kamunoy to mohon-in pad no tinoohan kono dot nahun-a. Di iyan mando giyapon ka inhimu kandan. ³⁷ To kohuriyan insugu to kamunoy ka anak din. Nigsuman-suman kandin no og tawuon dan ka anak din. ³⁸ Di to pogkakita to mo sinaligan no ka anak din on ka noko-uma, nigkagi kandan, "Soini on ka anak to kamonoy no iyan ogmakapangamonoy." Nigkagi kandan, paragas, "Og himatayjan ta oyjow kanta on ka og makapangamonoy." ³⁹ Koy naan ka indakop dan kandin hoy in-alap diyo to libwasan to tanomanan hoy in himatayjan. ⁴⁰ Hoy nanginso si Hisus, "Ko og libod ka kamonoy to tanomanan, nokoy man kag himuwon duon to sinaligan?" ⁴¹ Nigtabak kandan, "Pangimatayjan din ka maroot no mo sinaligan hoy kono din og kohoy-uwan. Hoy ogpasambayjan din ka tanomanan din to mo sinaligan no ogbogoy kandin to bahin kara ani." ⁴² Nigkagi mando si Hisus kandan, "Wa now ba nabasa ka inkagi diyo to kasulatan? Ka batu no in ongkoran to mo talaghimu to baloy iyan nasi nohimo no pabunsuran. Iyan soini ka inhimo to Magbabayjo no og ka bolbolongan ta. ⁴³ Nigparayjon si Hisus no nigkagi kandan, "Iyan soini ka hinongdan no ka gingharian to Diyos ogpuruton ligkat kaniyu hoy igbogoy diyo to mo otow no nigtuman to mo inpoyimo din. ⁴⁴ Agad hontow no otow ka ogkoulug to soini no batu og ka loplopuan. Di kandin no og koulugan to batu ogkalupot iyan. ⁴⁵ Pogkarinog to mo pangulu to mo Pari hoy mo Parisiyu to mo sampitan ni Hisus, nasabot dan no kandan ka in tumung din. ⁴⁶ Hoy naan ka ogdakopon dan on porom si Hisus di nahaldok kandan to mo otow so in-ila ran si Hisus no sagboka no og pagagano.