¹ Inlalag ko soin kaniyu oyjow kono kow ogkaawo-an to kaniyo no pogtu-u. ² Ogdogilon kow nikandan ligkat to mo sinaguga hoy ug-uma ka panawon nu ka oghimatoy kaniyu, ogtu-u no nighimo sikanndin to ogkaliyagan to Diyus. ³ Soin oghimowon dan kaniyu, so waro ma kandan mokoila to Amoy hoy kanak. ⁴ Di ogkagiyan ko kaniyo to soin oyjow no ko oghimo sikandan to soin, ka suman-suman now ka inlalag ko kaniyo, waro ko kaniyo inkagiyan to soin mo butang to hun-a pad, so kanak duma man kaniyo. ⁵ Hoy kuntoo no oghondiyo a to nigpa-alap kanak, di waro agad hontow kaniyo ka nig-inso ko hondoi a ogparulog. ⁶ Di kuntoo no inkagiyan kud kaniyo, natalong kow amana. ⁷ Di ka tutu-u iyan ka ogmaka maroyjow kaniyo no og ongkoran ko kaniyo so ko kono, mkono oghondini kaniyo ka talagbulig. ⁸ Hoy to pog-uma rin kayi to kalibotan, ogkagiyan ka mo otow to kalibotan mayitongod to salo dan hoy to pogkamatalong hoy to logpad. ⁹ Poilahon sikandan to mo salo dan so waro man sikandan nigtu-u kanak. ¹⁰ Hoy ogpoilahon sikandan nokoy ka matalong so oghondiyo ato amoy hoy kono kow on ogmakakita kanak. ¹¹ Ugpoilohon sikandan to logpad so ka nigpariralom to soin kalibotan inlogparan on. ¹² Mohon-in pad purun ka iglalag ko kaniyo di kuntoo konow kow pad ogmakasabot to soin. ¹³ Di to pog-uma to Ispiritu to kamalugutan, ugturu-an kow to tibo no kamalugotan kono sikandin uglalag to koogalingod din no pogbuot to kono ogkagiyan kow to narinog din hoy to mo butang to mowuri no aldow. ¹⁴ Ogsayjon a rin so kakayi to kanak ogkinawoon din hoy iglalag kaniyo. ¹⁵ Ka tibo no diyo to amoy, kanak nokoy na-an og lalag a no ogkinawoon to ispiritu ka igbogoy ko kandin hoy iglalag din to kaniyo. ¹⁶ To kono ogkalogoy kono a no ogkakita di to malupot no panawon igkakita a ni mandu. ¹⁷ Pipila to mo tinuonan din nanginso to karumahan din, ‘Nokoy ka kahulugan to soin inlalag din kanta no to kono ogkalugoy kono tad sikandin ogkakita di ponga to malupot no panawon ogkakita ta rod na-an sikandin? Hoy nokoy ka pasabut to inlalag din no oghondiyo kandin to Amoy rin? ¹⁸ Nokoy ka kahulugan to soin inlalag din to kono ogkalugoy nanginso sikandan. Kono ta ogkasabot ka inlalag din!” ¹⁹ Si Hisus nataga no ogkaliyag sikandan og panginso kandin nokoy na-an nigkagi sikandin, “Nigkagi a to kono ogkalugoy kono ad nikaniyo ogkakita di ponga to malupot no poanawon ogkakita a no rod soin buwa ka nalibugan now? ²⁰ Ogkagiyan ko kaniyo ogdalogmatoy kow ogsinogow di og koholo ka kalibutan ogkaaras kow di ogkohimo no kaholo ka katalong no. ²¹ Ko ka sagboka no malitan maranid og anak, ogkaaras sikandin so nig-uma on man oras to pog antus din. Di ko ogka otow on ka bato ogkalingow sikandin to pog-antis din so ogkoholo man kandin no naotow ka sagboka no bato. ²² Iyan da-an soin ogkoyitabo kaniyo. Kuntoo naaras kow di ogpogkita a ro kaniyo isab hoy ogkoholo kow amana ogkoholo no waro ogmaka agow ligkat kaniyo. ²³ To pog-uma to sooyjow no aldow kono kow pamuyjuo kanak agad nokoy kagiyan ko kaniyu ka Amoy ogbogoy kankiyo agad nokoy ka ogpamoyjo on no pinabayjo to ngaran ko. ²⁴ Taman kuntuu, waro ko pad namoyjo to agad nokoy pinabayjo to ngaran ko. Pamoyjo hoy bogayjan ko oyjow malugot ka kaniyo no kahulo. ²⁵ Inlalag ko soin pinabayjo to sampitanan. Di og uma ka panawon no kono ad on og gamit to mo sampitanan ko kono og panlalag a kaniyo mayitongod to Amoy pinabayjo ta mo ikagiyonon din. ²⁶ To pog uma to sooyjow no aldow ogpamoyjo kow kandin pinabayjo to ngaran ko hoy kanak kono iling no ogpamoyjo a para kaniyo. ²⁷ So ka Amoy iyan nagoynawa kaniyo duo goynawa rin kaniyo so nagoynawaan a no man kanak hoy nigtuo no kanak ligkat to Diyus. ²⁸ Tu-u iyan no kanak ligkat to Amoy hoy nighondini to kalibutan hoy kuntuon og ongkod a to kalibutan oglibud to Amoy. ²⁹ Hoy ka mo tinuonan din nigkagi, “Kuntoon kalaro iyan ka inlalag no hoy kono no pinabayjo to mo sampitanan. ³⁰ Nataga koy on kuntoon no nataga ka to tibo no butang hoy waro ka nigkinangulan no duon pad ogpanginso koykow. Nokoy na-an nigtu-u koy no koykow ligkat to Diyus. ³¹ Si Hisus nigtabak kandan, “Kuntuo nigtu-u kow on? ³² 32Ka panawon ug uma hoy kuntoon iyan on no ogmokasowoy-sowoy kaniyo tibo. Ogmamaoli ka diyo to kaniyo hoy og ongkoran a no di kono a ogpakasabsagboka so ka Amoy nigduma kanak. ³³ Inlalag ko soin kaniyo oyjow duonj karoyjow di kono kow kahaldok so naruog kod un ka kalibotan.