¹ Parayjona ka poggoynawaay nuiling no mo sulod duon ki Kristu. ² Kono kow kalingow to pogsima-sima to mo ug-uma to baloy now duo duma nighimu to iling duon di waro daan natagahi no ka mo diwata ka insima-sima dan. ³ Sumsumana ka duon to pirisohan, anat no napirisu kow duma kandan sumsumana sooyjow nig-agwanta iling no nig-agwanta kow duma kandan. ⁴ Litus nugpabantugan to tibo ka asawooy hoy kono ogpaliblibugoy ka alunggun ug lugparan to Diyus sooyjow ug pang-agad hoy ka ogpanlibug. ⁵ Kono no goynawa ka soloppi olog on ka duon to kaniyu so nigkagi ka Diyus, " kono ko iyan kaniyu ug-ongkoran hoy og-iniyugan." ⁶ Koy naan kono ki ogkoho no ogkagi, "ka Magbabayjo ka tagbulig ko kono a ugkahaldok so nokoy man kag kohimo to otow kanak?" ⁷ Sumsumana ka kahiyu no mo panguu nun-a nu nigpanulu kaniyu to lalog to Diyus, sumsumana ko inmonu dan to pogkinabuyi hoy pogpakamatoy, hoy ikula ka kandan no pogtuo. ⁸ Si Hisus Kristu kono ogkabalbalawan ligkat pod dungan kuntoon hoy to waro katamanan. ⁹ Kono now i-oyjon no ka loin nu mo pogpanulu ug makasuwoy kaniyo ligkat to matularong no bayja-anan maroyjow iyan no mahiroson ka kanta no gimukud pinabayjo to kuyid-o to Diyus hoy kono nu pinabayjo to pogtuman to mo balaud no moyitongod to koonon su waro makibulig ka sikan no balaud to sooyjow nigtuman to soini. ¹⁰ Waro katongod to pogkoon to talapag no duon to kanta no talapagan ka mo pari no nig-alagad to Hub to Hudiyu. ¹¹ In-alap to mo panguo to pari to diyo ka langusa to mo ayjam diyo longod to labow no balaan oyjow igtalapag para to salo to otow di insilaban ka lawwa to mo ayjam to libwasan to kampu. ¹² Tongod to sikan namatoy daan si Hisus to libuwasan to gumawanaan to siyudad oyjow pog-awwo to salo to mo otow pinabayjo to kougalingon din no langosa. ¹³ Koy naan ughondiyo ki kandin hoy oglagkos ki to kasiporan din. ¹⁴ Su waro ug lugtad no mo siyudad kayi to kalibutan namitow ki to siyudad noghinguma. ¹⁵ Koy naan himuwon ta kanunoy ko talapog to pogdayjan to Diyus pinabayjo ki Hisus pasalamatan kamunoy to kanta no lagong ka ngaran din. ¹⁶ Kono kow kaling to poghim to maroyjow hoy pogbinuligay kono so iyan soini ka mo talapag mo ug makapahulo to Diyus. ¹⁷ Tawaro ka kaniyu no mo panguu hoy tumana ka kandan mo igsugu so waro himoloy dan to pogtularong to kaniyu no mo gimukud di igbogoy man kandan to kahusoy to hinimuwan dan kog taworon now kandan so ko kono ugkabugatan kandan to pog-a-timan kaniyu hoy sikan kono ug makabulig kaniyu. ¹⁸ Papayjon kow to pog-ampu kanimi nataga koy no maroyjow ka kunsinsya dog so inhimu noy man kanunoy ka matularong. ¹⁹ Hoy inholo ko kaniyu no ug-ampu no paliboron a to Diyus duon to kaniyo to kono malugoy. ²⁰ Inbaton to Diyus si Hisus no kanta Magbabayjo no iyan ka ganhanan no talagtamong to mo kalniro hoy pinabayjo to langosa rin napamalugotan din ka waro katammanan no kasabutan. ²¹ Ka diyu to kaawang ug bogoy porom kaniyu to tibo no karoyjawan no inkinangulan no oyjow pogtuman to pogbuot din, hoy pinabayjo ki Hisus Kristu himuwom din puron kayi kanta ka ug makapahulo kandin hoy himayaon puron si Kristu to waro ogtamanan malugot iyan. Amin. ²² Mo sulod holo-un ko kaniyu to og-ayjad nugpamminog to soini iglalag to pogdasal ko kaniyu su kono man soini malayjat nu sinulat. ²³ Ug patagahon ko kaniyu no si Timutiyu no sulod ta inlukaan on ligkat to pinisohan kog mokolibod kandin ug dumahon ko kandin koy lo-uy ad kaniyu. ²⁴ IpangumUsta a to tibo no panguu now hoy to tibo no kaot-otawan to Diyus nangumusta kaniyu ka mo sulod to Italya. ²⁵ Ka grasya to Diyus ugduma pOrom kaniyU tibo.