¹ Ligkat ki Pablu no pigngaranan pogka Apustulis kono no ligkat to otow o pinabayjo to otow, ko kono no pinabayjo ki Hisu-Kristu hoy to Diyus no Amoy no nig-uyjag kandin. ² Koddi hoy tibo no kootawan no duma koddi nigpangumusta to mo simbaan to Galasya: ³ Ka Diyus no Amoy ta hoy Magbobayjo no si Hisu-Kristu ogbogoy kaniyu to garasya hoy kalinaw. ⁴ Si Kristu no inbogoy din ka ugalingon din tongod to mo salo ta oyjow ogluwas kanta ligkat to karootan to soin panawon sumalo to kabubut-un to Diyus ta hoy Amoy. ⁵ Himayaon ka Diyus hangtud to kaangturan! Amin. ⁶ Noinu-inu a no saguguno no niglaguy kow kandin no nig-umow kaniyu pinabayjo to garasya ni Kristu hoy nigdawat kow to loin no maroyjow no lalag. ⁷ Ka tutuu kaling ka waro loin no maroyjow no lalag, di pigkagi ku soin su duon mo otow no nigsinamuk kaniyu hoy nig-amos-amos no igposuwoy to maroyjow no lalag ni Kristu. ⁸ Di agad kanami o sagboka no diwata no ligkat to langit ka ogpanulu kaniyu to maroyjow no lalag no loin to kanami no pigpanulu, kohimu poron kandin no pigtungajawan! ⁹ To pigkagi doy on hoy kuntoon ogdayjanon ku to ogkagi: ko duon ogpanulu kaniyu to maroyjow no lalag no loin to kaniyu no nadawat, matungajawan kandin! ¹⁰ Nigpasabut ba soin no nigkinangulan a to mo otow? Waro! Kinangul a no ogkaholo-an a to Diyus! Nanamantaman a no ogkohimu a no pig-ila? Ko nanamantaman a ro naan to soin, kono a poron ogkohimu no suguanon ni Kristu. ¹¹ Mo sulod, uyjuni a no ogkagi kaniyu to soin: ka maroyjow no lalag no piglalag panulu ku ligkat to otow. ¹² Waro ko nadawat soin ligkat to agad hontow waro nig-anad koddi to soin ko kono pigpahayag soin ni Hisu-Kristu. ¹³ Natagaan now on ka koddi no pogkootow nahun-a. Nighogot a to pogtuu to mo Hudiyu hoy piglogparan a to waro kohid-u ka simbaan to Diyus hoy pighimu ku ka tibo oyjow lagoy to soin. ¹⁴ Labow a to kamatinu-uhun to tinu-uhan to mo Hudiyu su to kohon-inan to mo Hudiyu no koddi no ka idad. Amana o pad nighugut to pog-ikul to inbilin no in-anad hoy to batasan to mo kaap-apuan. ¹⁵ Di ka Diyus, tongod to grasya din nigpili koddi to waro pad nootow hoy to nig-umow koddi oyjow to pog-alagad kandin. ¹⁶ Hoy to duon no pigpapitow din koddi ka anak din oyjow igpanlalag ku kandin diyo to kono no Hudiyu waro a nigpaambag to agad hontow. ¹⁷ Waro a nighondiyo to Hirusalim oyjow to pogpapitow to mo nahimu no mo Apustulis hun-a koddi. Nighondiyo a ro iyan to Arabiya hoy nigliku a ro nig-isab diyo to Damasku. ¹⁸ To pogligad to tatolu nu tuid hun-a a nighondiyo to Hirusalim oyjow to pogpapitow ki Pidru hoy nigpaongkod a duma kandin suud to sapulu hoy lalima(15) no aldow. ¹⁹ Waro loin no Apustulis no pigpapitow ku aynaan ki Santiyagu, ka suun to Magbobayjo. ²⁰ Tutuu soin pigsulat ku hoy nataga ka Diyus no waro a nig-uubat. ²¹ Hoy nighondiyo a to loin-loin no banwa to Sirya hoy to Silisiya. ²² Nahun-a no panawon ka mo sagkup to mo simbaan no nigtuu ki Kristu diyo to Hudiya waro pad iyan nakapitow koddi. ²³ Nataga kandan mahitongod koddi tongod to pigkagi to duma, “Kandin no niglogpad kanta nahun-a no nigpamatbat on kuntoon to tinuuhan to nahun-a pigpanamantamanan din nogkaawo.” ²⁴ Tungod to sion pigdayjayn kandan to Diyus.