¹ Kaniyo no mo agalon, tolaronga now tog dumalo ka kaniyo no mo sulugu-on. Sumsumana now no duon da-an agalon now diyo to langit. ² Pasalamat kow kunalyjon ko’g ampu kow, hoy ko kamulu kow og ampu bantayji now ka kaniyo no mo suman-suman. ³ I ampu koy now ro nog bugayjan koy to Diyus to timpu nog makapanlalag to batbaton mayitongod ki Kristu no inhulus nauna. Soin ka hinungdan no napirisu a, su inlalag ko ka moyitongod kandin. ⁴ Hoy I ampu da-an no ogkarayjag ka maroyjow no lalagon sumalo to angayjan kog himowon. ⁵ Bantayji now ka mo hinang now taliwaro to kono no tumutu-u. Hoy ay-ayjari now ka tibo no timpu no ogmakapanlalag kow mohitongod to kaniyo no pogtu-u. ⁶ Ko oglalag kow diyo to kandan, lalag kow to mo lalagon no maroyjow oyjow og paminog kandan. Hoy angayjan nog katagaan now kog monowon to pogtagbak to mo panginso ni agad hontow. ⁷ Mohitongod to kanak no kahimtang dini to ita no pinaanga su-un no Tikiku no iyan og nangon kaniyo. Kasaligan kandin nog bulig hoy duma to diyo topog alagad to Magbabayjo. ⁸ Inpohondiyan ka kandin oyjow ignangon din kaniyo ka kanami no kahimtang kayi oyjow kono kow ogkatalong. ⁹ Duma rin da-an ka ita no pinaangga no su-uin no si Onisimu. Ogkasaligan da-an kandin, hoy duma now ro. Kandan kag panlalag kaniyo to tibo no noyitabu kanami. ¹⁰ Duma ka dini no pinirisu no si Aristarku nanginginso kaniyo. Nanginginso dod ma kaniyo si Markus no su-un ni Birnabi. (Insulatan kow on tahan ko nokoy kag himuwon now kog uma si Markus, koy na-an kog uma kandin iparayjon now. ¹¹ Si Hisus no pigngaranan da-an to Husto nanginginso da-an kaniyo. Tutulo ro na-an soin mo Hudiyu no duma ka dini no nig alagad to kapanguluhan to Diyus. Nakaransog kandan kanak. ¹² Nanginginso da-an ka mo duma now no si Ipapras sagboka rod ma kandin no alagad ni Kristu Hisus kunlayjon kandin og ampu hoy dansog kaniyo nog pabilin kow no marigon, higpit, namaan to tibo, no pogboot to Diyus. ¹³ Kanak iyan kag makapamatuod no si Ipapras nig alagad iyan para to kaniyo no karoyjawan hoy to karoyjawan to mo su-un ta diyo to Lawdisiya hoy to Hirapulis. ¹⁴ Si Dimas hoy ka pinaanga tan Doktor no si Lukas nanginginso da-an kaniyo. ¹⁵ Inangon now dod ma ka kanami no panginginso koy dod ma diyo to mo su-un ta diyo to Lawdisiya, hoy ki Nimpas, hoy to tumutu-u no niglilimodlimod diyo to baloy rin. ¹⁶ Ko ogkaponga now tog basa soin sulat, ipabasa now dod ma diyo to mo tumutu-u to Lawdisiya. Hoy basaha now da-an ka sulat ko no inpa-alap ko to Lawdisiya. ¹⁷ Nangoni now si Arkipu no ogpongahon din ka himowon no indihal. Kandin to Magbabayjo. ¹⁸ Ko kanak si Pablu no nigsulat to soin no mo panginginso: Ogpanginginso a kaniyo tibo. Hoy paliyog sumsumana anow ro kayi to pirisuhan to kaniyo no mo pog-ampu. Purun nog panalanginan kow iyan to Diyus.