1
To pog-uma on to aldow to Pinticostis, ka tibo no magtutu-u niglimod diyo to sagboka no baloy.
2
Hoy to kalit duon niglaguros ligkat to langit iling to makusog no huros to kalamag hoy niglugub soin to tibo no baloy no inlilimoran dan.
3
Hoy duon nakita ran no hapuy no iling to dila no nig-untud diyo to matag sagboka kandan.
4
Kandan tibo napunu to Ispiritu Santu hoy niglalag to nigkaloin-loin no kinagiyan sumalo to inpalalag kandan to Ispiritu.
5
Diyo to Hirusalim to sooyjo no timpu, duo mo Hudiyu riliyusu amana no ligkat to nigloin-loin no ingod to kalibutan.
6
To pogkarinog to mo otow to magulob, nangdani sikandan hoy nabulong-bulong amana so ka karasagboka no magtutu-u nilalag to karasagboka no ikagiyonon to mo naminog.
7
Nokoy na-an to dakol dan no kabulong-bulong hoy kain-inu, nigkagi kandan, “Kono ba taga-Galiliya soin no otow?
8
Maniyo to nakakagi man sikandan to kanta no ikagiyon?
9
Kayi to kanta duon mo taga-Partia, Midia, Ilam, Misopotamia, Judia, Capadocia, Puntu, Asia,
10
Frigia, Pampilia, Ihiptu,hoy to mo banwa to Libya dani to Cirini ka duma ka kanta taga-Ruma.
11
No mo Hudiyu hoy kono no mo Hudiyu no nakatu-u to tinouwan to mo Hudiyu hoy duon duma kanta no taga Crita hoy Arabia di agad pad to soin, kanta tibo nakarinog kandan no nigkagi to kanta no matag-sagboka no ikagiyonon mayitongod to koin-inuwan no mo butang no inhimo to Diyus.”
12
Hoy to kandan no kainu-inu hoy kabulong-bulong, nanginso-ay kandan, “Nokoy ba ka kawolugan to soin?”
13
Di ka duma nigliyan-liyan no nigkagi, “Mo, nahobog soin no mo otawa.”
14
Hoy nigsasindog si Pidru duma to sampulu hoy sagboka no Apustulis hoy to makusog no lagong nigkagi kandan, “Mo sulud ko no mo Hudiyu hoy kaniyo tibo no kayi to Hirusalim, paminoga no soin iglalag ko kunto-on.
15
Soin mo otawa kono no hubog sumalo to kaniyo no insuman-suman so alas niuybe pad man kuntoon to masolom.
16
Di iyan soin ka inlalag ni Purupita Joel.
17
Iyan soin ka oghimuwan ko to katamanan to mo aldow, nigkagi ka Diyus, "Ig-ug-ug ko to tibo no otow ka kanak nu Ispiritu ka kaniyo nu mo anak no lukos hoy buyi, inlalag to ikagiyonon to Diyus, ka kaniyo no mo balu-batu ogmakakita to mo koin-inuwan, hoy ka kaniyo no mo manigoon ogmakakaroot.
18
Ho-o, agad ka mo uripon, mo lukus hoy buyi, ig ug-ug ko ka Ispiritu ko to sooyjo no mo aldow, hoy oglalag sikandan to ikagiyonon to Diyus.
19
Oghimo a to mo koin-inuwan diyo to kalangitan hoy mo kabulong-bulongan kayi to tano. Duon na-an langusa hoy makupal no ubol.
20
Ogkasagkup on ka aldow, hoy ka bulan ogkoyimo no malalab no iling to langosa, to kono pad ug uma ka dakol hoy mahimayaon nu aldow to Magbabayja.
21
Hoy ka ogsampit to ngaran to Magbabayja ogkaluwas.'
22
Mo taga-Israil, paminog kow! Si Hisus no Nasaritnon nu inpa-alap to Diyus kayi to kanta, hoy soin inpapitow to Diyus pinabayjo to mo koin-inuwan no inhimo rin pinabayjo ki Hisus. Kaniyo iyan nataga to soin tongod so soin tibo noyitabo kayi to kaniyo.
23
Ka Diyus sumalo to kougalingon din no palanu hoy pogbuot nigbogoy ki Hisus diyo to kaniyo. Inhimatayjan no sikandin pinabayjo to pogbogoy nu kandin diyo to mo makasasalo no iyan niglansang kandin to kurus.
24
Di inbaton sikandin to Diyus hoy inluwas ligkat to goom to kamatayjon so kono sikandin ogkapugungan to kamatayjon
25
Su si Dabid nigkagi moyitongod kandin, 'Ka Magbabayja nighun-a kanunoy kanak, nigduma kandin kanak oyjow kono a ogkawoil.
26
Tongod to soin nahulo amana ka goynawa ko hoy ka kanak no mo inlalag napuno to kahulo. Hoy ogmaalamon a agad namatoy on ka lawa ko.
27
Su kono no man og ongkoran ka gimukod ko diyo to Hadis, to kalibutan to mo minatoy. Kono no intugut no ogmowo ka in alam no.
28
Inpakita no kanak ka mo bayja-an poiling to kinabuyi hoy pinabayjo to koykow no pogpakigduma kanak, napuno a to kahulo.’
29
Mo sulod, iglalag ko kaniyo mayitongod ki Dabid no kanta no kamanigoonan. Namatoy kandin hoy inlubong hoy ka kandin no lubung kayi pad hantud kuntoon.
30
Sagboka kandin no Purupita hoy nataga no ka Diyus nigsaad to pogtuman to kandin no saad no oghimuwon no hari kasagboka to kabuwaran din.
31
Nataga on si Dabid to oghimowon to Diyus nokoy na-an niglalag kandin moyitongod to pogkabaton ni Misiyas to kandin no pogkagi: Waro sikandin in ongkoran diyo to Hadis ka lawa rin waro namuwo!
32
Inbaton to Diyus soin iyan Hisus, hoy kanami tibo makakita to soin.
33
Diyo kandin to kawanan to Diyus hoy indawat rin ka Ispiritu santu sumalo to insa-ad to Amoy rin hoy ka kaniyo no nakita hoy nadinog iyan ka gasa rin no inbubu to kaniyo.
34
Su si Dabid iyan waro nigkayab to langit di nigkagi kandin, ‘Ka Magbabayja migkagi to kanak no Magbabayja pinuu ka kayi to kawanan ko.
35
Hantud no oghimowon ko ka koykow no mo usig npo giokanan nu.’
36
Koy na-an, ka tibo no mo otow to Israil kinaanglan nog kataga iyan no soin si Hisus ka kaniyo’n inlansang to kurus inhimo to Diyus no Magbabayjo hoy Misiyas!"
37
To pogkadinog to soin no mo otow iling to inkoyjomot ka kandan nu pusung hoy inkagiyan dan si Pidru hoy ka duma no mo tinoonan, “Mo sulod, nokoy man kag himowon noy?”
38
Hoy nigkagi si Pidru kandan, “Ka matagsagboka kaniyo kinagulan no og pamuyjo to pasaylo hoy ogpabunyag to ngaran ni Hisu-Kiristu oyjow pasaylowon ka kaniyo no mo salo hoy ogkadawat now ka gasa to Diyus no iyan Ispiritu santu.
39
Su ka sa-ad to Diyus para man kaniyo hoy to mo anak now hoy to tibo no diyo to mariyu ka tibo no og umawon to kanta no Magbabayjo no Diyus diyo kandin."
40
Nigbogoy si Pidru to mohon-in no pogpamatuod kandan hoy nigkagi, “Luwasa no ka kankiyo no kawogalingon to logpad nog ka agiyan to soin mo maroot no otow!”
41
Mohon-in kandan ka nigtu-u to kandin no inlalag hoy nigpabunyag mo tatulo no libo (3,000) no otow ka natimulan to mo magtutu-u to sooyjow no aldow.
42
Hoy nigparayjon kandan to pogpaminig to mo intudlo to mo tinuonan, to pakigduma kandan, to pakigtugon to pogkoon hoy to mo pog-ampo.
43
Mohon-in mo milagru hoy mo himo no koin-inuwan ka nahimo pinabayjo to mo tinuonan, tongod to soin ka tibo in uma on to koin-inuwan duma to kahaldok.
44
Ka tibo no magtutu-u nigpanayjon to kandan no pakigduma hoy ka mo kalaglagan to karasagboka kandan.
45
Hoy inpamaligya dan ka mo kalaglagan dan hoy lka halin inpamogoy diyo to tibo sumalo to kinangulan to matag sagboka.
46
Nigparayjon kandan no niglilimod kada aldow diyo to timpulu hoy nigsagboka sikandan to pogpangoon duma to kaholo hoy mapaubid no goynawa diyo to kandan no mo baloy.
47
Indayjan dan ka Diyus hoy naliyagan sikandan to mo kaot otawan hoy to matag aldow intimulan to Magbabayjo ka kandan no pundok to mo otow no nangluwas.