¹ No kunad nu kinaanglan nu ugsulatan ku pad kaniyo mayitungod to sikan so igbulig to kaot-otawan to Magbabayjo diyo to Hirussalim. ² Nataga a nu amana kow iyan nu ogbulig hoy in pangarol kod on sikan diyo to Matig-Masidunya Inguguran ku kandan to ligkat pad to karun-naan, andam kow on ka matig-Akaya nu ogbulig, nu ligkat duon, ogkaliyag on daan nu ogbulig ka kasuhulan kandan. ³ Ni igpa-alap ko soini so mu suwod ta to pogpalintutu-u oyjow ogkayimu nu waro karugan to pagarol doy mayitungod kaniyo, hoy oyjow ogpakaandam kow to igbulig now sumalo to ku kandan. ⁴ No ko duon ogduma kanak no matig- Masidunya, no ogpakapitow no kuno kow nu andam ogkapasiporan koy on iyan tungod su nig-iman-iman koy nu nakaandam kow on, nu labow kow on iyan daan ogkapasiporan!. ⁵ Koy naan nasuman-suman ku nu kinaanglan nu oghulu-an ko ka mu suwod ta nu ogpuhundini kud duon to kaniyo oyjow ogbulig ogpanhulos to insaad now no panalangin, oyjow tahan on ugkaandam to poghunduon ku.Di ogkaliyag nu ogbugoy kow duon to kaniyo iyan nu pogbuot, kuno nu ligkat su napugos kow. ⁶ Sum-sumana now soini! ka ogpamula to doisok, doisok daan ka ogkaani. ka ogpamula to dakol, dakol daan ka ogkaani. ⁷ Koy naan tagsagboka, kinaanglan nu ogbugoy sumalo ko nukoy ka nasuman-suman din, nu kuno kandin ogkataong hoy ogsuman-suman nu napugos do, so ka diyus ogkagoynawaan ka nigbugoy nu malipayon. ⁸ Ka Magbabayjo ka ogpanalangin kaniyo to subla-subla oyjow kuno kow ogkaa-waan to agad to tibo nu kinaanglan now! hoy oyjow ogpakabulig kow pad to duma. ⁹ Sumalo to nasulat to kasulatan, Amana nu dakol ka inbugoy rin diyo to ogkaayu-ayu, hoy kuno ogkalingawan ka katarong din    to agad huntow. ¹⁰ Ka Magbabayjo ka ogbugoy diyo to mo talagpamula to buno hoy to ogkakoon, hoy kandin dod daan ka ogbugoy hoy ogpamasalig ko nuko'y ka duon to kaniyo oyjow ogkatimulan pad ka kaliyag now to pogbugoy. ¹¹ Igpagatu kow layjun to Magbabayjo oyjow mabugoy-bugoy kow to tibo nu panahon.hoy mohon-in ka ogpasalamat to Magbabayjo tungod to ogkarawat dan nu igkaliyag now kanami. ¹² No tungod to soini so pogbugoy now, ogkabuligan to kinaanglan dan sooyjo so kaot-otawan to Magbabayjo hoy mohon-in pad daan sooyjo so ogpasalamat to Magbabayjo. ¹³ Hoy tungod to matularong to iyan pog-alagad nu mohon-in ka pogpalintutu-u now hoy ogkabantug ka Magbabayjo, tungod so ogkapitow ran nu nigsunod kow to in-abin now nu Maroyjow nu batbatunon mayitungod ki Kristo, ogsayjuun dan ka Magbabayjo tungod pogkamabugoy-bugoy kandan hoy to duma pad. ¹⁴ Koy naan duma to dakol nu giynawa, og-ampo kandan kaniyo hoy amana daan ogkaliyag nu ogpakigkita kaniyo tungod to kuin-inuwan nu kaliyag hoy kuhoy-u to Magbabayjo nu inbugoy rin kaniyo. ¹⁵ Ogpasalamatan ta ka Magbabayjo tungod to gasa rin nu kuno ogkabayjaran.