1
Kanak si Pablu ka miglikatan to soin no sulat, duma ki Silas hoy ki Timutiyu. Ogpangumusta koy kaniyu duon to Iglisya to Tisalunika no migtuu to Diyus no Amoy noy to Magbabayjo no si Hisu– Kiristu. Ka kohid–u hoy ka garasya to Diyus ogkaabin niyu.
2
Ogpasalamat koy layjun to Diyus tongod kaniyu tibo, woy kono koy og–ongkod to pogpanubad kaniyu.
3
To pogpanubad noy diyo to Diyus no Amuy ta, ogkasumansuman noy layjun ka karoyjow no himu niyu to pogtuu noy, hoy ka pogbulig to duma niyu dinumahan to dakol no goyinawa niyu, anat to maroson nu imman to kanta no Magbabayjo no si Hisu–Kiristu.
4
Mo sulod noy no inggoyinawaan to Diyus, nakataga koy no in–alam kow kandin oyjow ogkohimu no koot–otawan to din.
5
Su nigpapanlalag koy to maroyjow no Batbatonon kono to lalag da, ko kono to gowom to Ispiritu Santu. Hugut ka pogtuu noy no soin tutuu iyan. Nataga kow on no in–ay–ayjaran noy ka pog–ugpu noy to duma koy pad kaniyu, su soin oyjow to karoyjawan niyu.
6
Igkarangob inkanawo koy niyu hoy ka Magbabayjo, hoyagad nig–antus kow amana ligkat to pogkinawo niyu to lalag to Diyus, naholo kuw ro amana to kaholo no ligkat to Ispiritu Santu.
7
No sikan naan ka nohimu kow no maroyjow no paanatan to tibo no migtuu diyo to Masidunya hoy diyo to Grisiya.
8
Su pinabayjo kaniyu ka lalagon moyitongod to Magbabayjo miglugud diyo to Masidunya hoy to Grisiya. Migligub mando diyo to tibo no ingod ka Batbatonon moyitongod to pogtuu niyu to Diyus. No kono no koilangan no kanami pad ka ogpanglalag to agad hontow moyitongod to soin.
9
Su kandan mismu ka nigpanggugud ko inmomonu koy kaniyu to pogpakinawo to pogpanumbaloy noy diyo to kaniyu, hoy to pog–ungod niyu to pogsimba to diyus–diyus oyjow ig–alagad to tutuu hoy buhi no Diyus.
10
Nigpangguguran mando kandan moyitongod to pogtatagad niyu to Anak to Diyus no si Hisus no oglibod kani to ampow to tano no oglikat to langit. In–uyjag kandin to Diyus ligkat to kamatayjon hoy kandin ka ogluwas kanta ligkat to kabolu to Diyus no og–uma.