¹ Simakay si Jesus aw se kadin doma diya te belangay aw timabok te lanaw, aw minli dayon si Jesus te kandin lungsod. ² Se doton den sikandin doen menge otaw nengibing doton kandin te otaw kena egpekehipanaw te minibat daya te ikan. Te nekita i Jesus se kandan pegpemenal, minikagi sikandin te kana egpekehipanew, "IKaw egkepelek, kay se kamno sala pigwedad den!" ³ Nayan doen doton megtetolada e punu se nekedineg, aw minikagi sikandan diya te kandan aneng-aneng, "Pegtompeyus te timanem se inikagi te otaw siini." ⁴ Netagataga si Jesus se kandan aneng-aneng, nayan minikagi sikandin kandan, "Ngalay meg-aneng-aneng kaw te medaet? ⁵ Eden lay se mola se peg-ikagi, 'Pigwedad dan se kamno menge sala,' aw te peg-ikagi, 'Tindeg kaw ipanaw ka?' ⁶ Seini, ipekita ko kenyo na siak bata te otaw doen tolos dini te keneyonan te pegwedad te menge sala." Aw minikagi te kena egpekeipanaw, "Tindeg, ibingi se kamno ibetanan aw oli ka!" ⁷ Timendeg se kane egpekeipanaw aw minoli. ⁸ Te pegkita te menge otaw kenyan nelemitan dan, aw pigduyun dan se Timanem se nemegay te otaw te tolos te iling kenyan. ⁹ Nayan Timanem si Jesus te tepad siyan, aw te peg-ipanaw din, kinita din se egpengolikta te buhis si Mateo te minennoo te tepad kenan egbeyadan se buhis. Minikagi si Jesus kandin, "Ayas ka taking ka kanak." Aw timendeg si Mateo aw timaking ki Jesus. ¹⁰ Nayan, te higayon te pegkaen i Jesus aw se kandin tinelodaan doton te balay i Mateo, medita se menge mengoliktahay te buhis aw medita pa se kinilala na menge mekesasala dimatang aw nokigdoma te pegpengaen. ¹¹ Kinita ini te menge Pariseo, nayan ininsa dan se kandin menge tinoladaan, "Ngalay nekigdoma man te pegpengeen se kenyo megtetolada te menge mangoliktahay te buhis aw doma pa menge mekesasala?" ¹² Pegdineg i Jesus kani, timaba sikandin, "Se otaw mepiya lawa weda penginahanglan te duktur, se menge mesekiten olo. ¹³ Susihi niyo aw eden se kehologen te inikagi te insolat, 'Weda a peg-aneng-aneng te kenyo menge bowang.' Se ibeg ko keidohan niyo se doma niyo otaw, weda a dini amon pegtawan te sida nemenal na sikandan menge buutan, kena te menge mekesesala." ¹⁴ Doen menge tinoledaan i Juan na Tigbawtismo dimoton ki Jesus aw neg-insa, "Sikami aw se menge Pariseo gayed egpewasam meneng ngalay eked man pegpowaen se kamno Tinelodaan?" ¹⁵ Timaba si Jesus kandan, "Megod ba se menge bisita samatang doma dan se meama ipeipid? So eked meneng domateng se aldaw abaten se meama ipeipid lekat kandan, aw te aldaw siyan megpowasa dan." ¹⁶ Minikagi pa si Jesus, "Wedad megtumpal te kaling tila te tapay kelewasen, kay komotot se kaling tila aw melebahan aw onto pa megkedakel se kandin lisi. ¹⁷ Wedad heman meg-awop te kaling bino te tapay solanana linanit kay megkadael se solanan aw meola se bino aw se solanan eked din keposli. Meneng, doton dan soli se kaling bino te kaling solanan na linanit amon se seini dedowa eked pegkedaet. " ¹⁸ Nayan dalem pegtolada i Jesus minikagi pa si Jesus, dimateng se sebad ke pengolo te sinagoga te menge Judio, limohod sikandin diya ki Jesus aw negpeido-ido minikagi, "Se kanak bata baye kaling pa nematay, menneg kon dotonan no sikandin awtedong no se kamno belad kandin, nemenal a te meantay sikandin toad." ¹⁹ Aw yan timandeg si Jesus aw timaking kandin, timaking heman se menge Tinelodaan i Jesus. ²⁰ Nayan dalem te peg-ipanaw dan doen sebad bayi dimolod diya te getan i Jesus. Se beyi sidekey pigbegwasan awop te sempolo teg dowa siomay. ²¹ Kay mig-aneng-aneng sikandin, "Mekeilam kanak te saol i Jesus megolian a gayed." Nayan pigilam din se sael i Jesus. ²² Nayan limingi si Jesus te pegkita din te bayi, minikagi sikandin, "Ta, keleba ka! Se kamno pegpemanal kanak yan neeholi kemno." Nayan negolian sikandin. ²³ Dimeleg si Jesus doton te balay te pengolo. Te peg-awop dini, kinita din se menge menogtogay te peglubeng aw menge otaw negkelag. ²⁴ Nayan minikagi sikandin te menge otaw, "Lowe kaw ona! Weda kematay se bata- olo sikandin timedogi." Pigkebeyatan dan si Jesus. ²⁵ Se nekelowa den se menge otaw, minawop si Jesus soton te tambi te bata, inewidan din se belad te bata aw minenaw ini. ²⁶ Nayan nedengeg se peg-antay i Jesus te medapag lungsod te ogpeanan siyan. ²⁷ Te pegtenan i Jesus te tepad siyan doen dowa ke bata timelokon aw timawal kandin, "Bowadbowad i David, keidowi kay bag!" ²⁸ Pegdateng i Jesus te balay pig-ogpaan dini dimolod kandin sengkey dowa ke bata. Pig-insa dan i Jesus, "Nemenal kaw ba nga meinang ko se peggoli kenyo?" Ee, nemenal kay. ²⁹ Nayan inewidan i Jesus se menge mata dan aw minikagi, "Tanda te kenyo pegpemenal metoman iyan diya kenyo." ³⁰ Aw yan egolian se kandan menge mata aw kinita dan. Yan pigpunuan dan i Jesus te eked dan peg-indan-inda te bisan sinu: ³¹ Meneng minesayo dan aw mig-indan-inda te ininang i Jesus diya kandan. ³² Nayan te ne kesayo den dan, doen inibing doton ki Jesus nge sebad ke otaw nge neomong kay pig-awopan te busaw. ³³ Penga te pegpelowa i Jesus te busaw, nekeikagi se omo nepela onto se menge otaw minikagi dan, "Lekat te kelakat wedad kidoen pa kinita te iling kani dini te Israel." ³⁴ Meneng minikagi se menge Pariseo, "Se pengelo te menge busaw yan se nemegay kandin te tolos amon mepelowa din se busaw." ³⁵ Miglegeb te menge lungsod aw te menge baryo, aw migtolada sikandin diya te menge simabaan te menge Judio. Pigwali din se Mepiya Indan bahin te peghari te Timanem aw piggoli din se menge otaw nga doen menge mesakit. ³⁶ Pegkita din te medita otaw, neido onto sikandin kandan so onto medita se kandan kelimahan so wedad egtabang kandan. Iling dan te karniru wedad eg-ipat kandan. ³⁷ Yan minikagi si Jesus te kandin tinelodaan, "Medita se genihen, meneng pilabuk do se meglegenihay. ³⁸ So yan pigtawaltawal kaw te Timanem amon megpeibing sikandin te medita meglegenihay."