^{7 8} Kay se kelahat memoyo te temamen ko mekekiminawa, se megpedapag kandin tabang din aw sen megtawal-tawal tabahen din. ⁹ Sikeyo menge obanen, aw memoyo te kanen se kenyo mengeso, begayan niyo ba te bato? ¹⁰ Kon memoyo sikandin te ikan, begayan niyo ba te memokan? So, eked! ¹¹ Aw sikeyo menge otaw medaet mepanday memegay te mepiya kekana doton te kenyo menge mengese, eden lebo se kenyo amay te langit! Ibegay din onto se menge mepiya kekana kandan te menge memoyo kandin. ¹² Inange te doma se ibeg niyo inangen dan diya kenyo aw iyan se benal te pegtolo te sugo i Moises aw se menge sinolat te menge propita. ¹³ Awop kaw te mesigpit nga pultahan kay loag se poltahan aw mebelad se dalan pesalo te Imperno, aw medita se menge minokit kani nga dalan. ¹⁴ Meneng mesingpit se pultahan aw melima se dalan pesalo te pedowan nge wedad tenowanan, aw silabok olo se neketoltol kani nga dalan. ¹⁵ Peginap kaw te menge mini nga propita, se menge otaw siyan aw tengtengan ilinga te menge metinunu, meneng se benal iling dan te menge mebalot na menge menanap. ¹⁶ Kelelaen dan niyo pineokit te kandan menge inang iling te menge tigisen menge tinanem, eked ini pemongo te igos aw obas. ¹⁷ Se kayo mepiya memongo te mepiya, meneng se kayo medaet memongo te medaet. ¹⁸ Se mepiya kayo eked pemongo te medaet, aw se medaet kayo eked pekepemongo te mepiya. ¹⁹ Se kedita kayo te eked pemongo te mepiya tepoen aw sonogen. ²⁰ Soyan iling kani se mini nga propita, kilelaen niyo heman pineokit te kandan menge inang. ²¹ Kena kelahat tomawal kanak, 'Timanem, Timanem,' mekesipat te pegpengolo te Timanem. Se negtoman te ibeg te Amay ko te langit iyan se mekesipat te kandin pegpengolo. ²² Te aldaw te peghukom medita kwani se mikagi kanak, 'Timanem, Timanem, kena ba te ngadan nikaw migkeliwat kay man te kamo inikagi, piglalag se medaet Espirito, aw ininang se medita milagro?' ²³ Aw mikagi a kandan, 'Weda a kilala kenyo, pediyo kaw kanak sikeyo se neg-inang te medaet. ²⁴ Nayan bisan sine se nenenalan aw negtoman te kanak intolada iling sikandin te otaw medalem se netagahan, te negpetindeg te kandin bala diya te lanto te bato. ²⁵ Awbisan modan te magsen aw meglaneg, aw kesokesohan te magsen kelamagse kandin balay, eked ini kegobal kay neketindeg ini diya te magsen pundasyon. ²⁶ Nayan se otaw nenenalan te kanak intolada, aw weda tolo kani, iling te otaw book se negtolok te kandin balay diya te anay. ²⁷ Aw kon modan te magsen aw meglanag, aw kosokosohen te magsen kelamag se kandin balay, mepilay ini aw megobal." ²⁸ Te pegkepenga i Jesus te peg-ikagi kani nepela onto se menge otaw, ²⁹ tongod kay doen tolos se kandin pegtolada, aw kena iling te kandan menge megtetelada te menge sugo.