¹ Penga te pegtolada i Jesus te sempolo tegdowa ki Tinoladaan din, dimoton sikandin te kesikbit nga menge lunsod amon megtolada aw megwali doton. ² Te doton pa si Juan nga tigbawtismo te dalem te prisohan, nekebelita sikandin bahin te menge pig-inang i Cristo, nayan impedoton din ki Cristo se kandin Tinoladaan. ³ Amon meg-insa, "Indani kay, sikona ba se kenami pigtegadan aw megtagad kay pa te lain?" ⁴ Tinaba dan i Jesus, "Liko kaw doton ki Juan aw indani niyo sikandin te kenyo kinita aw nedineg. ⁵ Indani niyo sikandin nga se menge bota kimita den, se menge kapig nekeipanaw den, se menge tompigen negolian aw melinis din, se menge bingelen dimineg den, se menge nematay nengeantay, aw se Mepiya Belita inwali den doton te menge pubri.' ⁶ Doen keluba se menge otaw na weda pegdowa-dowa kanak." ⁷ Te pegkesayo den se menge sinog i Juan, mig-insa si Jesus te menge otaw, "Te pegdoton niyo ki Juan te ewaaw nga lugar, eden lay se ibeg niyo kitaen? Dimoton kaw ba amon kitaen niyo se otaw nga egtakingtaking iling te kogon nge eg-adopen te kedog te kelamag? ⁸ Aw dimoton kaw doton amon kitaen se sebad ke otaw nga negsuot te mahalon nga kelewasen? Se menge otaw egsoot te mehalon nga kelewasen doton olo te balay te hari. ⁹ Meneng eden lay onto se indotan niyo doton? Kena ba amon kitaen niyo se Propita te Timanem? E, e inda, aw ikegihan ko sikeyo melangkaw pa onto sikandin te sebad te propita. ¹⁰ Kay sikandin se pighisgotan te Timanem kidoen te kesolatan, 'Ipeibing ko se kenaken minsahiro, mona pa kamno te pegpeketagad te kamno okitanan.' ¹¹ Dimogan pa si Jesus te peg-ikagi, "Se kebenalan, wedad pa nootaw te keneyonan nga melangkaw pa ki Juan. Meneng se onto medana te menge negesakop te peghari te Timanem labi pa melangkaw ki Juan. ¹² Lekat te pegwali i Juan lamig seini, negleges se menge otaw te meapil te peghari te Timanem. ¹³ Kay te weda pa dateng si Juan, se kedita te menge propita aw se punu negtolada den tepad te peghari te Timanem. ¹⁴ Aw kon pemenalan niyo se kandan menge inikagi, si Juan yan si Elias nga inpakay nga domateng. ¹⁵ Keilangan onto niyo melebetan se dinineg niyo seini. ¹⁶ Nayan, eden se peg-ilingan ko te menge otaw te penahon siini? Iling den te menge mengesu, nga nennoo te pedyanan se sebad ke pundok minikagi te sebad, ¹⁷ 'Pigtogtogan day sikeyo te sonata alang te peipid, meneng weda kaw sayaw, pigkentahay day sikeyo te menge kanta alang te nematay, meneng weda kaw heman pegkelag.' ¹⁸ Iling heman kenyan se menge otaw te penahon siini, kay te pegdateng i Juan, kinita da nga negpuasa sikandin aw weda inom te binu, aw yan nekeikagi dan nga doen medaet bosaw kidoen kandin. ¹⁹ Aw siak se Bata te Otaw, pegdateng ko, kinita da nga kimaenaw meninim a, 'Aw yan nekeikagi dan nga legoken a.' Aw palainem. Mekeikagi dan heman nge emigo a te mengoliktahay te buhis aw te doma pa nga eg-inang te sala. Meneng wedad bali niyan, kay se menge otaw nga negsonod te ibeg te Timanem negpekita te benal se ininang te Timanem." ²⁰ Penga niyan, minikagi si Jesus tepad te menge lungsod kenan doton sikandin peg-inang te medita kepelahan, tongod kay se menge otaw sida nga menge lungsod weda dan pegselsel te kandan menge sala. ²¹ Minikagi sikandin, " Mekekeido kaw menge tege-Corasin aw sikeyo menge tege-Bitsayda! Kay se menge kepelahan nga ininang ko diya kenyo ininang ko te Tiru aw te Sidon, nenamay den dan peden negsoot te sako aw negbodbod te abo te kandan olo te pegkilala te negselsel dan te kandan menge sala. ²² Nayan eneng-enengi niyo nge te aldaw te okom mas labaw pa se pelemun te menge tege-Tiru aw tege-Sidun se kenyo medawat. ²³ Aw sikeyo menge tege-Capernaum neg-eneng-eneng na iduyen kaw te kedita. Meneng te imperno kaw beling egbeli. Kay kon se menge kepelahan nga ininang ko fiya kenyo ininang ko pa te Suduma, negpetanan pa peden se Suduma hangtod siini. ²⁴ Nayan eneng-enengi niyo nga te aldaw kwani na se Timanem meg-okom, se pelumun nge kenyo mekinawa mas labi pa te silot te tege-Suduma." ²⁵ Aw yan negtawal-tawal si Jesus, "Ama, tigapo te langit aw te tana, induyun ko sikona tongod se kebenalan na inbolo no te menge otaw nga kinilala nga biyasa aw doen melangkaw nga netegahan. Impekelabet no te menge otaw nga deitek olo se kebiyasa iling te menge mengisu. ²⁶ Ama, salamat onto na yan se kamno ibeg." ²⁷ Aw yan minikagi so Jesus, "Imbegay den kanak nga kandin bata aw se kimilala te Amay. Siak lang gyod olo nga kandin bata aw se menge otaw nga ibeg ko komilala kandin. ²⁸ Dolod kaw kanak, sikeyo kelahat nigkelomay aw nebegatan, aw ipeotod ko sikeyo. ²⁹ Taking kaw aw negpetolada kanak kay melomo a aw mepaubsanon mekeetod kaw. ³⁰ Kay se kanak itolada mon sonoden, aw se kanak sogo mola inangen."