1
Nayan inindanan si Jesus si kandin menge tinoledaan te sebad ke tegdeyanan amon toledaan dan te pegtawal-tawal gayed aw eked kewedadi te peglaom.
2
Minikagi sikandin, “Te sebad ke lonsod doen sebad ke Huwes wedad lamit te Timanem aw wedad peg-aneng-aneng te kandin duma otaw.
3
Aw te lonsod siyan doen sebad ke balo egliko-liko te Huwis amon tebangan sikandin te kandin kaso.
45
Te kelekat eked dapit se Huwes, meneng te kemodiyan, tanda so egliko-liko se balo, neke aneng-aneng sikandin te pengkey aw wedad lamit din te Timanem aw wedad peg-aneng-aneng te kandin doma otaw, domapit den beling sikandin so limokas den sikandin te pegliko-liko te balo.
6
Nayan minikagi si Ginoong Jesus kandan, “Na, kinita niyo se inikagi te huwis pengkey kena sikandin egpenimanem?
7
Se Timanem oa kaha! Eked kepakay aw eked sikandin dapit te kandin menge pinemalli te egtawal-tawal kandin aldaw aw delem amon molutaw ang kaangayan. Sigurado onto te eked din dan kebeiyai.
8
Te benal, eked kenamay tebengan din dan. Meneng aw lomiko a den nga bata te otaw dini te keneyonan, doen kitaen ko pa lebo menge otaw nga doen pegpemental?”
9
Doen menge otaw doton nga egpemental te sikandan olo se matarong aw eglindoen dan se doma. Nayan inikagihan dan i Jesus seini tegdeyanan.
10
Doen dowa otaw dimotan te simbahan amon te pegtawal-tawal. Se sebad parisiyo aw se sebad iskribinti.
11
Timindeg se Pirisiyo aw migtawal-tawal tepad te kandin keotawen te iling kani, ‘E Timanem, egpesiontong a diya kamno so kena a iling te doma menge otaw-menge eg-akal, eglapang, eglakad, aw kena a heman iling sida iskribinti.
12
Kedowa a megpowasa kelikit te simana, aw imbegay ko se iksesempolo te ketenga te kelahat egkitaen ko.’
13
Se Iskribinti timindeg te mediyo aw eked sikandin palos sikandin palos lengag te langit. Meneng dinapi din se kandin kagpa te pegselsel aw minikagi, e Timanem keidohi a so sebad a makasasala.’
14
Te kebenalan, seini otaw eni, aw kena se Parisiyo, se minolo nga gikapa-matarong te Timanem so pengkey sine megpelangkaw te kandin keotawen ipedana te Timanem, meneng se megpedena te kandin keotawen ipelangkaw.”
15
Sebad ke aldaw niyan inibig te menge otaw doton ki Jesus se kandan dedeitek menge bata amon pemadan din te kandin belad te pagpamalangin kandan. Meneng pegkita te kandin menge tinoledaan ti inibing te menge otaw si kandan mengise doton ki Jesus sinagda dan sikanda.
16
Meneng tinawal i Jesus se menge bata megpedapag kandin, aw minikagi sikandin te kandin menge tinoledaan, “Kebiyai den niyo se menge bata megpedapag kenak. Ika niyo dan egpogongi, so se menge iling kandan nesakop te peglowan te Timanem.
17
Te kebenalan, pengkey sine nga eked pegpesakop te peglowan te Timanem nga onawa te pegpesakop te menge mengise seini eked gayed pekeapil te peglowan te Timanem.”
18
Doen sebad ke obanen te menge Judiyo mig-insa ki Jesus, “Mepiya egpenolada, eden lay se kenak inangen amon meabat ko se pedowan wedad temanan?”
19
Timaba si Jesus kandin, “Nenga minikagi ka nga mepiya a? Wedad pengkey sine mepiya olo Timanem.
20
Tepad te kamno insa, netaga-taga ka den te inikagi te kasugoan: ika eglakad, ika egimatay, ika egpenakaw, ika egikagi te kebolalaw, tahora se kamno amay aw inay,”
21
Timaba se otaw, “Siyan kelahat igtolo ko lekat pa te kenak pegkebata.”
22
Te pegdineg i Jesus te kandin taba, minikagi sikandin sebad mendad ka butang se nikaw inangin. Beligyai se kelahat kedonan nikaw, aw se halin begayi te menge wedad palos keabatan. Aw mainang ka meyaman doton te langit. Pegkepenga, liko aw telokon ka kenak.”
23
Meneng te pegdineg din nini, nepulak sikandin tanda te meyaman man onto sikandin.
24
Nayan kinita i Jesus te nepulak sikandin, minikagi si Jesus, “Melima onto diya te meyiman se pegpesakop te peglowan te Timanem.
25
"Mola pa se peg-okit te menanap nga kamilyo te awang te dagen kaysa pegsesakop te meyaman te peglowan te Timanem. “
26
“Nayan mig-insa se menge dimineg te inikagi i Jesus, “Aw iling kenyan, sine den olo se melowas?”
27
Tinaba dan i Jesus, “Se eked keinang te otaw mainang te Timanem.”
28
Nayan minikagi si Pedro, “Pigtenanan day man se kenmi kedonan aw timaking kay kamno.”
29
Minikagi si Jesus kandan, “Te kebenalan, ikagihan ko sikeyo wedad pengkey sine nga tomanan te kandin balay, esawa menge kedowa, inay aw amay o menge menginse tanda te pegpasakop din te peglowan te Timanem.
30
Nga eked pekedawat te aldaw seini labi pa dakel nongka te kandin pigtenanan, aw te umaabot doen pa pedowan din nga wedad temanan.”
31
Pigtani i Jesus se kandin sempolo tegdowa ke tinoledaan aw inikagihan, “Penalan kaw! Migpesalo kidon te Jerusalem, aw doton metoman se menge insolat te menge propeta tepad kenak nga bata te otaw.
32
So ibegay a doton te menge otaw kena Judiyo. Kebeyatan a dan, yayaen aw tepteoan.
33
Beda sen a dan heman aw imetayan, meneng te iketelo te aldaw meantay a.”
34
Meneng weda palos pekelabet se menge apostoles aw eden se ibeg ipasabot i Jesus, so imbolon diya kandan se kedegdagan te kandin inikagi.
35
Te medapag den dan si Jesus te Jeriko, doen sebad ke bota minonsod te kilid te dalan aw egpemoyo.
36
Pegdineg din te medita se limak-lak nig-insa siknadin aw eden idekey.
37
Inikagihan dan ini te minokit si Jesus Tege-Nasarit.”
38
Pegdineg din nini nemegais sikandin, “Jesus bowad-bowad i David, keidowi a bag.”
39
Sinagda sikandin te menge otaw amon mepenek. Meneng pigpekagsen din beling onto se pegpegais, bowad-bowad i David, keidowi a bag!”
40
Nayan simagked si Jesus aw simogo te ibingen se bota doton kandin. Pegdating te bota ininsa ini i Jesus,
41
Eden se ibeg no inangen ko diya kamno?” Timaba se bota, “Timanem, ibeg ko komita toda.”
42
Minikagi si Jesus kandin, “Komita ka den se kamni pegpemental migpegoli kamno.”
43
Aw kidoen gayed kimita sikandin. Timaking gayed sikandin ki Jesus aw migdayen te Timanem. Pegkita te menge otaw nini, dimayen dan heman te Timanem.