¹ Isip keneleboso tepad te kanak pegsilbi te timanen, menghangyo a kenyo te pegkibohi nga angay te menge tinawal te Timanem,. ² Pagmapainubsanon kaw aw inangi nga melomo se kenyo posong, peghigogmaay, mepeseyloay, aw megpeilob kaw te kekolangan te sebad-sebad. ³ Peningkemoti niyo nga megpedeleg se kenyo pegsebad nga lekat te Ispirito Santo pineokit te kenyo mepiya nga pegdomaay. ⁴ Kay sikita nga menge egpemenal sebad olo ke lawa aw doen olo ke Ispirito Santo nga negedolog kenitadon. Sebad se kenitadon peglaom, kay mig-unawa kidon man kelahat nga megtagad te kanding pakang te siyon igtawal kidon din. ⁵ Doen kidon sebad ke Timanem, sebad ke pegtoo, aw sebad ke bautismo, ⁶ doen kidon sebad olo ke Timanem aw sikandin yan se amay te kelahat, sikandin se neghari, eg-iwal, aw negedolog kinadon kelahat. ⁷ Meneng bisan sebad kidon ke lawa, doen negkelain-lain nga menge inangenen nga binegay i Cristo te tegsebad-sebad kenitadon somala te kandin pegboot, ⁸ "Te sida mikayab sikandin doton te langit medita menge binihag se kandin inibing. Aw igbegayan din te negkelain-lain nga menge gasa se menge otaw." ⁹ Siini, eden may se kedegdagan te inikagi nga, "Mikayab sikandin doton te langit?" SIni nedagdag nga mikunsad ona sikandin dini tana. ¹⁰ Aw sikandin mikunsad yan heman se mikayab te lanto pa te kelengitan amon mepeno din se kelahat. ¹¹ Se doma ininang din menge apostolos, se doma menge propeta, se doma menge megsesangyaw te mepiya belita, aw se doma mennge pastor aw menge megtolodaay. ¹² Ininang din ini amon mekeandam se menge otaw te Timanem te pegsilbi, aw amon tomilles dan aw meinang melig-on isip lawa i Cristo, ¹³ pineokit nini megsebad kidon te pegtoo aw pegkilala te bata te Timanem, amon sikita meinang obawen te kenitadon peggawi aw me iling kidon ki Cristo. ¹⁴ Aw kon mehitabo ini kenitadon, kena kidon den kowani meiling te bata nga medani te negkelain-lain nga menge pegtolada te menge otaw nga eg-imanday aw egtipaas te kebenalan. ¹⁵ Meg-ondanen kaw beling te kebenalan doma te dogma, amon meiling kidon ki Cristo nga kenitadon pengolo. ¹⁶ Pineoked te kanding pegdomala, ae tibok lawa nga yan se menge megsebad, aw se kada bahin nini nga negkesompay egtinabangay. Aw kon hosto se igpeinang te kada bahin tepad te gogma te sebad-sebad se tibok nga lawa tomilles aw melig-on. ¹⁷ Nayan te ngadan te Timanem, igpeeneng-enengan ko sikeyo nga ika niyo gayed egkinabuhi nga iling te weda kilala te Timanem. Se kandan menge aneng-aneng wedad kekemowan. ¹⁸ Tepad kay nengit-ngitan se kandan kelebetan te pegsabot te ispiritohan nga menge kedonan. Nahimulag dan te pedowan nga binegay te Timanem tepad kay ignoranti dan man, kay lamig dan man te kekagsen te olo. ¹⁹ Wedad den keyaya dan, nayan medaet se kandan ininang, aw migpatuyang dan te peg-inang te kelipaan. ²⁰ Meneng kena iling siyan se kenyo netegahan bahin ki Cristo. ²¹ Kena ba nga netegahan man niyo se bahin ki Cristo, aw lepad kay sikeyo kedoen kandin, igtolodaan kaw te kebenalan nga kedoen kandin? ²² Nayan tenani den niyo se kenyo daan nga oldin kay sini igtig-apo te aan niyo nga pedowan. Sine daan nga oldin yan se megdagdag kenyo pineokit te keda tan nga menge pakay nge egtinang kependayan kenyo. ²³ Kelingi niyo se kenyo posong aw aneng-aneng, ²⁴ pekitai niyo nga igkalingan kaw den te Timanem aw binegayan ta pedowan nga kaling kandin. Se benal nga pedowan nga matarong aw belaan. ²⁵ Nayan ka niyo den egkebolalaw se sebad-sebad meg-ikagi te kebenalan te kandin kedowa ki Cristo, kay kelahat tadon menge sakop den te sebad ke lawa. ²⁶ Kon meopal kaw peg-aha nga eked kaw pekesala, aw ika niyo egpeapet se kenyo keopal te tibok aldaw. ²⁷ Ika niyo egpemegay te higayon ki Satanas nga menintal kenyo te pegpekesala. ²⁸ Se otaw keilangan den penakaw, kon kena manginabuhi sikandin te mepiya nga pemeokit, amon mekebegay heman sikandin te menge kabos. ²⁹ Ika kaw peg-ikagi te medaet, kon kena sen meketabang olo te kenyo isig ka otaw aw sen metokma heman te higayon, amon mekebegay kaw te kepiyaan te menge nekedineg. ³⁰ Ik niyo egpegool te Ispirito Santo te Timanem, kay sikandin yan se pengilala nga sikeyo iya te Timanem, aw se kesigorohan te pegtobos kenyo te domatengay nga aldaw te peg-okom. ³¹ Tenami niyo se kelahat kiligotgot, kebensi, aw keopal, Ika den niyo egpemelikas, o peg-ikagi te medaet batok te sebad-sebad o pegdomotay, ³² hinoon meg-imandayay aw megmelomo kaw te sebad-sebad, aw megpinasayloay kaw iling te pegpesaylo te Timanem kenyo pineokit ki Cristo.