¹ Sini, dimateng se kaling Gobernador nga si Festus te nayon te Judea. Minokit se telo si aldaw dimoton sikandin te Jerusalem lekat te Cesarea. ² Doton ig-indan kandin te kedegkelan te menge pari te menge Judio se kandan indan batok ki Pablo. Aw migpeido ido dan ki Festus nga begayan dan te pabor. ³ Nga ipeibing din si Pablo doton te Jerusalem. Meneng se kanday pakay kedi nga etangan dan si Pablo te dalan amon metayan. ⁴ Timaba si Festus doton den olo si Pablo te kelebosohan te Cesarea, eked a kenamay dini kay limiko a deleg doton. ⁵ Nayan petekini niyo kanak se kenyo menge pengolo aw doton niyo sikandin indani kon doen man neinang din medaet." ⁶ Kapin sebad ke simana nga migpetanan si Festus te Jerusalem. Pegkepenga lemiko sikandin te Sesarea. Pegkesonod adlaw mikunsad sikandin te okoman aw neg sogo nga peopen si Pablo. ⁷ Te peg-awop i Pablo iglibotan deleg sikandin te menge Judio nga lekat te Jerusalem aw medita se inikagi dan nga mebegat nga indan batok kandin nga eked dan gani ketinonoi. ⁸ Iglepindihan i Pablo se kandin keotawen, minikagi sikandin, "Wedad neinang ko sala batok te pune te menge Judio, te templo, o te emperadro ba heman te Roma." ⁹ Tepad kay ibeg heman i Festus nga meibigan sikandin te menge Judio ig-insa din si Pablo, "Meibeg ka ba nga domoton te Jerusalem aw doton hosayi se kaso no siine!" ¹⁰ Timaba si Pablo, "Seini a den neketineg din te korte te Emperador, aw dini a no angay okomi. Wedad neinang ko nga sala te menge Judio aw netegahan no ini onto. ¹¹ Kon nekelampas a man te pune aw angay a pulumenen te kemetayaen, akoen ko. Meneng kon wedad kebenalan te menge indan dan batok kanak, kena angay nga hugyan kandan. Nayan mapot a den olo te Emperador te Roma!" ¹² Nekig ondanen deteg se Festus te menge miyembro te korte aw pegkepenga minikagi sikanin ki Pablo," Tepad kay mapot ka te Emperador, ipeibing ko sikona kandan." ¹³ Penga minokit se pilabok aldaw, dimateng te Cesarea si Haring Agripa aw se kandin adi na si Bernice tepad kay ibeg dan leoyan si Festus nga Gobernador. ¹⁴ Nekeugpa dan doton te pipila ke aldaw. Igkagi i Festus te Hari se kaso i Pablo. Minikagi sikandin," Doen kineleboso dini nga igtenanan te Gobernador gebii nga si Felix. ¹⁵ Pegdoton ko te Jerusalem, sini nga otaw ig-indan kanak te kedekelan te menge pari aw te menge pengolo te menge Judio. Migpeido-ido dan onto kanak nga okoman ko den sikandin aw pelumunen. ¹⁶ Igkegihan ko sikandan nga kena ko oldin te menge Romanhon nga pelumunen se bisan sine nga weda peg-atbang te menge indan kandin, aw weda pa mebegayi te kehigeyonan nga metaba din se mge indan batok kandin. ¹⁷ Nayan timaking dan kanak peliko dini te Cesarea. Weda a pegbaet te penahon, te pegkesonod nga aldaw minonsad a te okomanan aw pigpetawal ko sini otawi. ¹⁸ Neke aneng-aneng a nga doen mebegat onto indandan balok kandin, meneng te migpeselohay den dan, wedad man kedi ikeindan dan nga medaet batok kandin. ¹⁹ Se menge kedonan nga iglentogi dan wedad lain kon kena sen tepad olo te kandan menge too too aw tepad te sebad ke otaw nga igngedanan ki Jesus. Nematay den ini nga otaw. Meneng sumala ki Pablo buhi sikandin. ²⁰ Weda a ketaga-taga kon eden se inangen ko kani nga kaso nayan ig insa ko si Pablo kon ibeg din nga domoton te Jerusalem aw doton mismo husayi se kaso. ²¹ Meneng nekeikagi si Pablo nga iapot din den olo se kandin kaso doton te Emperador amon se Emperador mismo se meg okom. Nayan igpebantay ko sikandin hangtod nga mepeibing ko sikandin te Emperador. ²² Minikagi si Agripa ki Festus, "Ibeg ko penulanen sini otowi." Minikagi si Festus na keladaw dinegen no sikandin. ²³ Pegkesonod aldaw dimoton te korte si Agripa aw si Bernice te mepesidengeg pegdateng dinoyagan te medita menge opisyal te menge aw menge bentogan nga menge otaw te nayon. Nayan migmando si Festus nga ibengen te dalem si Pablo te sian doton den te dalem si Pablo. ²⁴ Minikagi si Festus, "Haring Agripa aw kelahat niyo nga dini siini, sine se otaw nga ig-indan kanak te menge Judio dini te Cesarea aw te Jerusalem. Migpegais dan pa nga sini otawi angay nga imetayan. ²⁵ Meneng matod te kanak pegsusi wedan onto kinita ko nga hinungdan amon okomen sikandin te kemetayen. Aw tepad kay dimangop sikandin te Emperador, mig-okom a nga ipeibing sikandin te Emperador. ²⁶ Meneng wedad a onto nga ikesulat doton te Emperador nga igo nga hinongdan kon nenga ipeibing ko sikandin doton. Nayan igpeetobang ko sikandin kenyo aw labi den onto kamno Haring Agripa, amon nga penga tadon mesosi se kandin kasi, doen ikesulat ko den. ²⁷ Tepad kay eked keinang nga ipeibing ko te Emperador se sebad ke kinalaboso nga wedad metino nga indan batok kandin.