¹ Datem te doton si Apolos te Corinto, dimoton si Pablo te menge bontod te probinsya hangtod dimateng sikandin te Efeso. Doton doen kinita din menge egtolo te Timanem. ² Ininsa din sikandan, "Nekinawa lay den niyo se Espirito Santo te dihang nemenal kaw?" Timaba dan," Weda kay palos pekedineg te doen tinawal Espirito Santo." ³ Mig-insa si Pablo kandan," te eded pegbonyag sikeyo pigbonyagan," Timaba dan te bonyag i Juan." ⁴ Minikagi si Pablo diya kandan se bonyag i Juan alang te mge migselsel te kandan menge sala, meneng minikagi si Juan te menge otaw keilangan dan memenal te somelilin kandin, wedad lain awkena si Jesus." ⁵ Pegdineg dan nidekey, pegbonyagan dan ayae te ngadan i Ginoong Jesus. ⁶ Igpemaed i Pablo se kandin menge belad kandin dimateng? Kidoen kandan se Esperito Santo, Nekeikagi dan te mge medita demolo kagi weda dan ketegahi, aw kimeliwat dan heman te menge kagi lekat te Timanem. ⁷ Menge sempolo teg dowa ke maama kelahat dan. ⁸ Dalem te telo se bolan, dimeleg se pegdoton i Pablo doton te Simbahan te menge Judio. Weda sikandin kelemitan mikagi te menge otaw nakiglantugi sikandin aw impekelabet diya kandan se tepad te peglowan te Timanem. ⁹ Meneng se doma kandan nemekagsen onto aw eked pemenal, aw kidoen te keditaan te mge otaw pig-inang dan medaet se peokit te Timanem. Nayan nesayo si te kandan Simbahan, aw inibing se menge egpemenal ki Jesus, aw aldaw-aldaw doton sikandin te eskwelahan ni Tirano dimeleg te pagpakiglantogi te menge otaw. ¹⁰ Lamig te dowa se omay yan ini se kandin ininang, nayan se kelahat neg-ogpa doton te probinsya te Asya, Judio aw kena Judio, dimeneg se kate te Timanem. ¹¹ Medita telagsa menge kepelahan se ininang te Timanem pineokit ki Pablo. ¹² Pengkey se menge kelobaw aw se menge penenaktan eggamiten din ibingen doton te menge mesakiten aw megolian dan, aw se menge medaet Espirito eglowa heman lekat te menge otaw eg-ewopan dan. ¹³ Seini, doen menge Judio egpelibot - libot egpemekadas te menge medaet espirito pelowa te menge otaw neewopan. Gisulayan dan gamiten se ngadan i Ginoong Jesus amon pelowaen se menge medaet espirito. Minikagi dan doton te menge medaet espirito," Te ngadan i Jesus intolada i Pablo, insogo ko sikeyo lomowa." ¹⁴ Iling heman kenyan se ininang te pito ke bata maama i Esceva. Seini si Esceva sebad te kedekelan te menge pari te menge Judio. ¹⁵ Igsulayan dan pelowaen se medaet espirito te ngadan i Jesus. Meneng timaba se medaet espirito minikagi," kinilala a ki Jesus, aw kinilala ko heman si Pablo, meneng sine kawlay?" ¹⁶ Penga niyan pinengayaw dan te otaw neopon te medaet espirito aw impeeleg. Wedad palos neinang dan, nayan kimaganan dan pesalo te mediyo te balay sidekey menge nelingkasan den aw nepelian. ¹⁷ Seini nehitabo nedengeg te kelahat menge Judio aw menge kena Judio menogpa doton te Efeso aw nelemitan dan, aw induyun pa onto se ngadan i Ginoong Jesus. ¹⁸ Medita menge egpemenal doton se migpedapag nengangkon aw migindaw te menge medaet eg-inangen dan. ¹⁹ Aw medita heman se mge bisaya egdelikmata se nengibing te kandan menge libro eggemiten te delikmata, aw igsanog dan kidoen etobangan te kelahat. Gibanabana dan minilyon se keelaga te kelahat menge libro sinonog. ²⁰ Pineokit nini penghitabo nedingeg pa onto se tolos se kagi te Timanem te logar sidekey. ²¹ Penga te nehitabo sidekey mig-aneng-aneng si Pablo mokit te masidonya aaw te Gresya te eked pa sikandin doton te Jerusalem. Aw minikagi pa sikandin te lekat te Jerusalem keilangan din pa domoton heman te Roma. ²² Impeona din te Masidonya se dowa te kandin menge ketabang si Timoteo aw si Erasto, dalem te sikandin negpatamando ona doton te probinsya te Asya. ²³ Te adlaw sidekey doen dakel kesamok nehitabo te Efeso tanda so se doma doton eked keibeg se menge egpemenal tepad te peokit te Timanem. ²⁴ Doen sebad ka platero eg-ingedomak Demetrio sikandin aw se kandin menge trabahante egpenginang te deditek menge templo-templo ininang te plata impesopo te templo i Artemis Timanem dan, aw nekekwarta dan te dakel pineokit nini. ²⁵ Nayan tinawal din se kandin menge trabahante aw se doma pa menge plater. Aw minikagi sikandin diya kandan, "Menge kedomaan, netegahan niyo se kenitadon peg-oswag te penginabuhi tanda te seini kenitadon pengita. ²⁶ Kinita niyo aw dinineg se ininang te seini otaw si Pablo. Minikagi sikandin se menge Dios eg-inangen te otaw kena benal menge Dios. Aw midita se nemenal kandin, dini te Efeso aw te tayod te probinsya te Asya. ²⁷ Nayan dilikado seini kenitadon pengita, so kwani medaet den ini te menge otaw. Aw kena olo siyan, dilikado heman se templo te menge kenitadon bentogan diosa si Artemis so kowani kesedadan ini te polos aw eked den kilelai te menge otaw se kenitadon diosa egsimbahen kena olo dini te Asya aw kena te tayod heman te keneyoana!" ²⁸ Pegdineg nidekey te menge otaw nepal dan onto aw negsagod te pegpemegais, "Melangkew si Artemis te menge tege Efeso!" ²⁹ Aw se kesamok dimateng te natayod se siyodad. Dinakep dan se menge doma i Pablo si Gayo aw si Aristarco menge tege masidonya. Aw kimadas se kelahat dan pesalo te kamdan egsebadan ginoyod se dedowa. ³⁰ Ibeg peden mikagi si Pablo te menge otaw, meneng pinogongan sikandin te menge egtaking ki Jesus. ³¹ Don menge sigalak si Pablo menge opisyal te probinsya te Asya. Sikandan ini migpesogo doton ki Pablo aw mepakay eked sikandin doton te kandan egsebadan. ³² Penga niyan dakel se kesamol te menge otaw doton lain se pinegais te sebad lain heman se doma, tanda te deditaan kandan weda pekelabet nenga netipon dan doton. ³³ Doen otaw doton si Alexander intolod te menge Judio te etobangan amon manalipod sikandan menge Judio wedad labet te eginangen dan i Pablo. Pigsebad din se kandin belad amon menepak se menge otaw. ³⁴ Meneng te pegketagataga te menge otaw te sikandin Judio, menegais se kelahat dan, "Melangkaw si Artemis te menge tege-Efeso!" aw delem te dowa se oras yan do idekey se kandan gayed pinegais. ³⁵ Te kemodiyan, netipenek den olo se egpengibing te siyudad se menge otaw. Penga niyan minikagi sikandin, "menge sakopt te tege- efeso se kelahat menge otaw neketaga-taga kidon menge tege-Efeso yan se egsaman te templo i Artemis melangkaw aw te sagrado nge bato nedagdag lekat te langit. ³⁶ Wedad mekeeles nini nayan ketingaen kaw olo aw ika eg-ayas-ayas. ³⁷ Inibing niyo dini seini menge otaweni, meneng weda dan pales penakaw te kenitadon templo aw weda pegtempeyes te kenitadon diosa. ³⁸ Aw si Demetrio aw te kandin menge doma menge platero doen indan tepad ki pengkey sine, doen menge korte aw doen mge maghuhukom tedon, ebingen dan doton kandan se kandang menge indan. ³⁹ Meneng aw sikeyo doen doma menge indan siyan keilangan osayen te neandan tedon penegsebad te menge lumulupyo. ⁴⁰ Seini dilikado kidon te seini kenitadon ininang, so kwani aw iindan kidon te menge pengolo te Roma neg-inang kidon te kesamok. Wedad palos kenitadon itaba aw menga ininang tedon ini." ⁴¹ Pegkepenga din peg-ikagi nini impeoli din se menge otaw.