¹ Siini menge keduwa, peg-ampu kaw alang kenami, nga se kagi te Timanem ketegahan te duma pa menge ogpaanan aw dewaten te menge duma otaw se pegpesalamat te Timanem iling te kenyo ininang. ² I-ampo niyo peman nga ilikay kay te Timanem te menge otaw deotan, so kana kelahat nemenal te kenami egtulada. ³ Meneng simalig se Timanem, lig-onen kaw din aw penelipdan amon eked kaw keilebeti i Satanas. ⁴ Tepad te Timanem, simalig kaw nga tinuman niyo se kenami menge insugo kenyo aw megpedeleg kaw te peg-inang nini. ⁵ Tollolen kaw peden te Timanem nga kitaen kidoen kenyo se gugma te Timanem aw se pegkamainantoson i Cristo. ⁶ Menge keduwa, kagi te tolos binegay kenami i Ginoong Jesu-Cristo, simogo kay kenyo nga eked kaw pegduma te kenitadon menge keduwa nga metaka aw weda pegsunod te kenami egtulada kenyo. ⁷ Natagahan niyo den keilangan sunoden niyo se kenami ininang te kidoen kay pa kenyo weda kay pegketaka. ⁸ Weda kay dawat te pegkaen lekat kenyo nga weda day beyadi, aldaw aw delem neghago kay amon eked kaw kebegati te peg-etiman kenami. ⁹ Ininang day ini, kana aw wedad kay ketungod te pegpemoyo te tabang lekat kenyo alang te kenami keilanganen, ¹⁰ aw kana ibeg day nga aw meinang kenyo panig-ingnan te kidoen kay pa migduma kenyo, minikagi kay nag pengkey siini se eked pegtrebahu eked pakekaen. ¹¹ Egpehinomdoman day ini so nekebelita kay doen menge takahen kidoen kenyo wedad palos ininang se nengilabet te duma. ¹² So nayan kagi te ketungod nga egbegay kenami i Ginoong Jesu-Cristo, suguoen day sen siyan menge takahen mangamaha te kandang serili penginebuhian, aw eked daa pengilabet te duma. ¹³ Aw sikeyo, menge keduwa, eka niyo egkelumay te peg-inang te mepiya. ¹⁴ Aw doen eked toman te kenambi sugo pineokit te sulat siini, bentayi niyo dan aw eka niyo egduma kandin, amon metagahan din nga kana benal se kandin ininang. ¹⁵ Meneng eka niyo-eg-aneng-aneng kandin nga kalaban, pehimengnoi beling sikandin peg-iling keduwa kidoen ki Cristo. ¹⁶ Se Timanem nga linekatan te kelinaw yan onto se memegay gayed kenyo te kelinaw pengkey eden se kenyo pegkesaol, aaw tekingan din peden se kelahat tadon. ¹⁷ Siini siak si Pablo yan den mismo se menolat kani penghinaut se kanak pemeokit te kelahat menge sinolat ko. ¹⁸ Penelenginan kaw i Jesu-Cristo kinitadon Timanem.