¹ Siini menge keduwa ko, tepad te pegliko te kenitadon Ginoo Jesu-Cristo aw te kinetadon pengetipon te pegbagbak kandin, negpekeido kay kenyo. ² Eked kaw kebeleng p mebalaka tepad te menge otaw nge eg-ikgai nga se Ginoo dimateng den. Pengkey pa mikagi dan nga yan sidekey se inikagi te Espirito Santo kandan, pengkey pa mikagi dan nga dinineg dan o nebasahan dan se kenitadon solat, eka niyo egpemenal kandan. ³ Eka niyo eglimbong kandan pengkey eden pa se kandan ikegihen. So te eked pa dateng se Ginoo, se menge otawsumopak te Timanem aw dumateng se otaw medaet nga tapay den gitakda nga laglagen. ⁴ Bentoken din se kelahat nga kinilala aw egsimba te menge otaw man ekon Dios aw ipekilala din se kandin pegkeotawen nga sikandin se melangkaw te kelahat. Monsad sikandin kidoen dalem te simbahan te Timanem aw mikagi nga sikandin se Timanem. ⁵ Pig-indanan ko man sikeyo nini kedangan kidoen apa migduma kenyo? ⁶ Aw netagahan niyo peman aw eden se nekepugong kandin siini te pegdateng. Meneng dumateng sikandin te penahon din den. ⁷ Benal siini doen menge negsupak den te Timanem, meneng aw eden se inangen nidekey otaw medaet weda pa ini katagahi siini. Aweden man ugaling se kandin inangen eked pa ini kegemaki taman te eked pa kaabat se mekepugong te kandin peg-edop. ⁸ Meneng aw maabat den ini. Megpekita den sikandin. Meneng te pegdateng i Ginoong Jesus laglagon din se otaw siini daotan. Paahen din ini pineokit ulo te kandin peg-edop. ⁹ Aw megpekita den se otaw siini siini, gemiten din se tolos i Satanas. Aw meinang sikandin te kelahat matang te menge kepelahan aw menge inang nga kepelahan iling lekat te Timanem. ¹⁰ Aw gemiten din se duma pa pemeokit amon melimbongan se menge metalon kan ini se kandan dangatan so weda dan kehigugma te kebenalan yan peden se mekepeluwa kandan lekat te sala. ¹¹ Tepad niyan kebiyaan den dan te Timanem nge melimbongan dan amon memenal dan te kebolalaw, ¹² amon mesilotan se kelahat negselikway te kebenalan aw neluba te peg-inang te sala. ¹³ Menge keduwa, negpeselamat kay gayed te Timanem tepad kenyo menge hinigugma te Timanem, aw angay kay megpesalamat kandin kay pinemalli kaw den dapay te Timanem nga mekeluwa kaw pineokit te tolos te Espirito Santo nga neglinis te kenyo pedowan aw pineokit te kenyo pegpemenal te kebenalan, ¹⁴ tinawal kaw te Timanem pineokit te Mepiya indan nga kenami egsangyaw kenyo, aw amon mekeapil kaw te kedungganan te kenitadon Ginoong Jesus. ¹⁵ So nayan menge keduwa, lig-oni niyo aw empingi niyo te mepiya se menge egtulada te kidoen kay pa migduma kenyo, apil se kenami pighisgotan te kenami sulat kenyo. ¹⁶ Se kenitadon Ginoong Jesu-cristo peden mismo aw se kenitadon Timanem Amay yan se megdasig aw meglig-on kenyo amon mepiya gayed se kenyo meinang aw mikagi, eghigugma kidon te Timanem, ¹⁷ aw tepad te kandin grasya desigen ki den te wedad tinemanan, aw bagayan ki din te lig-on nga paglaum.